Asidegen ti Aldaw ni Jehova

¹ Sigagagar a tartarigagayan dagiti Kristiano ti iyaay ti aldaw ni Jehova, inton dadaelenna ti agdama a dakes a sistema ti bambanag ken mangipasdek iti baro a lubong ti kinalinteg. (2 Ped. 3:12, 13) Tangay saantayo nga ammo no kaano ti eksakto nga idadateng dayta nga aldaw, masapul nga agtultuloytayo nga agbantay ken tulongantayo dagiti sabsabali a mangaramid met iti kasta. (Ezeq. 33:7-9; Mat. 24:42-44) Ti panangutob iti naimpadtuan a Sao ti Dios pabilgenna ti pammatitayo a “ti dakkel nga aldaw ni Jehova asidegen.”—Sof. 1:14.

² Panagsasaganad Dagiti Pannakabalin ti Lubong: Kas nailanad iti Apocalipsis 17:9-11, dinakamat ni apostol Juan ti “pito nga ar-ari,” a mangirepresentar iti panagsasaganad dagiti pito a pannakabalin ti lubong. Dinakamat met ni Juan ti “maikawalo nga ari,” a mangirepresentar ita iti United Nations. Adda pay kadi dagiti padpadaanantayo a sumaruno a pannakabalin ti lubong? Awanen ta kuna ti padto a daytoy maikawalo nga ari ket ‘agturong iti pannakadadael,’ ket kalpasan dayta awanen ti nadakamat a sumaruno nga ar-ari ditoy daga. Matulongannakayo kadi daytoy a padto a mangkita no ania a panawen ti pagbibiagantayon?

³ Tulongannatayo ti Daniel 2:31-45 a mangtarus no kaano ti iyaay ti aldaw ni Jehova. Iti dayta a padto, ti nagdakkelan a ladawan a nakita ni Nabucodonosor iti tagtagainepna irepresentarna ti panagsasaganad dagiti pannakabalin ti lubong. Nagturayen ti tunggal maysa kadagitoy a pannakabalin. Ania a pannakabalin ti agturturay itan? Iti periodo nga isimsimbolo ti saka ti ladawan. Silalawag nga iladawan ti padto no ania ti sumaruno a mapasamak. Naan-anay a madadaelto ti turay ti tao, ket sumukat ti ‘pagarian nga agtalinaed agingga iti tiempo a di nakedngan.’ Makitayo kadi no kasano nga ipamatmat daytoy nga asidegen ti aldaw ni Jehova?

⁴ Kanayonan nga Ebidensia: Masaksaksiantayo ti kanayonan nga ebidensia nga asidegen ti aldaw ni Jehova. Makitkitatayo ti kaitungpalan ti padto ni apostol Pablo maipapan kadagiti kababalin dagiti tattao “kadagiti maudi nga aldaw.” (2 Tim. 3:1-5) Ken makiramramantayo iti sangalubongan a panangsaksi a masapul a maaramid sakbay a dumteng ti panungpalan. (Mat. 24:14) Sapay koma ta ti ministeriotayo iti publiko iparangarangna ti kinaganat ti iwarwaragawag ti anghel: “Agbutengkayo iti Dios ket idayawyo, agsipud ta dimtengen ti oras ti panangukomna.”—Apoc. 14:6, 7.

Paset 8—Panangikondukta Kadagiti Progresibo a Panagadal iti Biblia

Panangiturong Kadagiti Estudiante iti Organisasion

¹ Ti panggeptayo a mangyadal iti Biblia ket saan laeng a tapno mangisuro kadagiti doktrina no di pay ket tapno tulongan dagiti iyad-adalantayo nga agbalin a paset ti kongregasion Kristiano. (Zac. 8:23) Makatulong kadatayo a mangibanag iti dayta a panggep ti broshur a Dagiti Saksi ni Jehova—Siasinoda? Ania ti Patpatienda? Ikkanyo iti kopia dagiti kabbaro nga iyad-adalanyo iti Biblia, ken paregtaenyo ida a mangbasa iti dayta. Kanayonanna, iti linawas a panagadalyo mangbusboskayo iti sumagmamano a minuto a mangiranud iti impormasion maipapan iti organisasion ni Jehova.

² Dagiti Gimong ti Kongregasion: Ti kangrunaan a pamay-an a masursuro dagiti iyad-adalantayo iti Biblia nga ipateg ti organisasion ti Dios ket babaen ti pannakitimpuyogda kadatayo kadagiti gimong ti kongregasion. (1 Cor. 14:24, 25) Gapuna, mabalinyo nga isarsarita kadakuada ti maipapan kadagiti lima a linawas a gimong, a maysa a gimong ti pagsaritaanyo kada agadalkayo. Dakamatenyo ti paulo ti sumaganad a palawag publiko. Ipakitayo kadakuada ti material a mausig iti Panagadal iti Pagwanawanan ken iti Panagadal iti Libro ti Kongregasion. Ilawlawagyo ti maipapan iti Teokratiko nga Eskuelaan ti Panagministro ken ti Gimong ti Serbisio. No adda pasetyo iti eskuelaan, mabalinyo nga ensayuen dayta kadakuada. Iranudyo dagiti napateg a punto a naidatag kadagiti gimong. Usarenyo dagiti retrato kadagiti publikasiontayo tapno mailadawanda iti panunotda no ania ti maar-aramid kadagiti gimong. Iti damo pay laeng a panagadalyo, awisenyo idan a tumabuno.

³ No umad-adanin ti Memorial, dagiti asamblea, ken ti ibibisita ti manangaywan iti sirkito, mangbusboskayo iti sumagmamano a minuto a mangilawlawag ken mangparayray iti panangsegga kadagitoy nga urnos. In-inut a sungbatanyo dagiti saludsod a kas iti: Apay a maawagantayo iti Saksi ni Jehova? Apay a Kingdom Hall ti awagtayo iti paggigimongantayo? Ania dagiti annongen dagiti panglakayen ken ministerial nga adipen? Kasano ti pannakaorganisar ti trabaho a panangasaba ken ti teritoria? Kasano ti pannakapataud dagiti literaturatayo? Kasano a masupsuportaran iti pinansial ti organisasion? Ania ti akem ti sanga nga opisina ken ti Bagi a Manarawidwid iti pannakaimaton ti trabaho?

⁴ Dagiti Makaisuro a Video: Mabalintay met nga usaren dagiti video-tayo a tumulong kadagiti iyad-adalantayo iti Biblia tapno maapresiarda ti nagsayaat nga organisasion ni Jehova. Usarenyo dagiti video a kas iti To the Ends of the Earth, Our Whole Association of Brothers, ken United by Divine Teaching. Idi nabuyana ti video a Jehovah’s Witnesses—The Organization Behind the Name, nakalua ti maysa a babai a lima a tawen idin nga umaw-awat kadagiti magasin ken dadduma pay a literaturatayo. Adda panagtalekna kadagiti Saksi a simmarsarungkar kenkuana, ngem idi nabuyana ti video, nariknana a mabalinna met ti agtalek iti organisasion. Inrugina ti nagpayadal iti Biblia, ket iti sumuno a lawas, timmabuno kadagiti gimong iti Kingdom Hall.

⁵ Babaen ti panangbusbos iti sumagmamano a minuto kadagiti iyad-adalantayo iti kada lawas ken panangusar kadagiti katulongan iti panagadal iti Biblia, in-inut a maiturongtayo dagiti iyad-adalantayo iti maymaysa nga organisasion nga us-usaren ita ni Jehova.