Maabrasaka iti Teokratiko nga Eskuelaan ti Panagministro

ITI intero a daga, iti nasurok a 200 a pagilian, minilion nga estudiante ti magunggonaan a linawas iti edukasion nga ipaay ti Teokratiko nga Eskuelaan ti Panagministro. Agdadamo dagiti dadduma. Adda dagidiay adun a tawen a makipaspasetda iti eskuelaan. Maikonkondukta ti eskuelaan iti pinullo a ribu a luglugar. Sadinoman ditoy daga ti pagnanaedam, pareho a programa ti edukasion ti magun-odam. Dagiti tattao a nagduduma ti edad, puli, ken adalda sagsagrapenda daytoy a teokratiko nga edukasion, nga awan bayadna.

Idi nairugi ti eskuelaan kadagiti kongregasion dagiti Saksi ni Jehova idi 1943, kastoy ti naikuna a panggepna: “Tapno maisagana amin a ‘matalek a tattao,’ dagidiay nakangngeg iti Sao ti Dios ken nangpaneknek a mamatida iti dayta, tapno ‘kabaelanda nga isuro dagiti sabsabali’ . . . tapno agbalin ti tunggal maysa . . . nga ad-adda a nakasagana a mangidatag iti namnama nga ik-ikutanna.” (Course in Theocratic Ministry, p. 4) Agtultuloy a dayta ti panggep ti eskuelaan agingga ita.

Wen, ania ti kasayaatan a pangusarantayo iti pannakabalintayo nga agsao nga inted ti Dios a kas sagut kadatayo? Sumungbat ti Biblia: “Tunggal agang-anges a banag―idaydayawna koma ni Jah.” (Sal. 150:6) No kasta ti aramidentayo, maparagsaktayo ti puso ti nailangitan nga Amatayo. Pampaneknekantay kenkuana a nalapunos ti pusotayo iti panagyaman gapu iti kinaimbag ken ayatna. Dayta ti gapuna a maidagdagadag kadagiti Kristiano a kanayon a ‘mangidatonda iti Dios ti sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna’! (Heb. 13:15) Tapno matulongandaka a mangparang-ay iti abilidadmo a mangusar kadagiti inted ti Dios a sagut a pangidayaw ken Jehova, abrasaendaka a kas estudiante iti Teokratiko nga Eskuelaan ti Panagministro.

Nupay ti panagbasa iti publiko ken arte ti panagsao ken panangisuro ti ad-adda a maipamaysa iti eskuelaan, saan la a dayta ti magunggona iti edukasion nga ipaay ti Teokratiko nga Eskuelaan ti Panagministro. Iti pannakipasetmo, matulonganka a mangparang-ay kadagiti napateg nga abilidad a kas iti personal a panagbasa, panagimdeng ken pananglagip, panagadal, panagsukimat, pananganag ken panangurnos, pannakisarita, panangsungbat kadagiti saludsod, ken panangisurat kadagiti kapanunotan. Ti Biblia a mismo ken dagiti naibatay-Biblia a publikasion ti pakaibasaran dagiti maadal, komento, ken presentasion a maidatag iti eskuelaan. No punnuem ti isipmo iti napateg a kinapudno a masarakan iti Sao ti Dios, masursurom ti agpanunot a maitunos iti pampanunot ti Dios. Anian a makagunggona dayta iti tunggal aspeto ti biag! Maipapan iti pateg ti Sao ti Dios, insurat ni William Lyon Phelps, maysa a mannursuro iti unibersidad iti maika-20 a siglo: “Pudno a maawagan nga edukado ti tunggal maysa nga adu ti ammona iti Biblia. . . . Patiek a napatpateg ti adda ammona iti Biblia uray no saan a nagkolehio ngem iti nagkolehio nga awan ammona iti Biblia.”

No Kasano a Naan-anay a Magunggonaan

Siempre, tapno naan-anay a magunggonaanka iti edukasion nga ipaay ti Teokratiko nga Eskuelaan ti Panagministro, kas estudiante, masapul nga agreggetka. Inggunamgunam ni apostol Pablo iti kaduana a Kristiano a ni Timoteo: “Utobem dagitoy a banag; maipamaysaka kadakuada, tapno ti panagrang-aymo maiparangarang iti amin a tattao.” (1 Tim. 4:15) Ania dagiti praktikal a banag a mabalinmo nga aramiden?

No mabalbalin, tabunuam ti Teokratiko nga Eskuelaan ti Panagministro iti kada lawas. Usarem a naimbag daytoy a libro, a Magunggonaan iti Edukasion nga Ipaay ti Teokratiko nga Eskuelaan ti Panagministro. Isuratmo ti naganmo iti nairanta nga espasio iti panid ti paulo ti libro. Itugotmo a kanayon daytoy a libro no tabunuam ti eskuelaan. Mabalinmo met ti aginotar ditoy libro a mismo. No adda mabasam a napapateg a punto a pagarupem a makatulong kenka, ugedam dagitoy. Usarem dagiti nalawa a margin a pangisuratan kadagiti praktikal a punto a maadalmo bayat a maus-usig dagitoy iti eskuelaan.

Adda maited a nayimprenta a kopia ti programa a masurot iti Teokratiko nga Eskuelaan ti Panagministro. Naglaon met ti eskediul kadagiti detalye no kasano a maikondukta ti eskuelaan. Nasayaat no isapitmo ti eskediul iti daytoy a libro, tapno madadaan nga usarem.

No isaganam ti linawas a programa iti eskuelaan, laglagipem a ti Biblia ti kangrunaan a libro. Iyun-unam a basaen ti paset ti Biblia a nayeskediul iti dayta a lawas. No mabalinam met a basaen a nasaksakbay dagiti leksion iti nadumaduma a paset ti programa, makagunggona unay dayta.

Kabayatan ti programa, mabalin nga addada gundaway a makipartisipar dagiti agdengdengngeg. Gundawayam a naan-anay dagitoy. No makiramanka kadagita a panagsasarita, matulonganka a manglaglagip iti nangngegmo ken mangipakat iti dayta iti biagmo.

Siempre, maaddaan ti amin nga estudiante iti gundaway nga agpalawag wenno mangiparang iti demostrasion iti imatang ti kongregasion. Aprobetsarem ti tunggal gundaway. Ikagumaam a parang-ayen ti aniaman a kalidad ti panagpalawag a naituding kenka. Mabalakadanka tapno agtultuloy ti panagrang-aymo. Akseptarem dayta a personal a tulong. Isuratmo iti librom dagiti espesipiko a singasing no ania ti mabalinmo nga aramiden tapno rumang-ayka. Tangay narigat a matmatam ti bagim a kas iti panangmatmat dagiti dadduma kenka, dagiti maipaay a naayat, naibatay-Biblia a singasing ken balakad ket dakkel ti maitulongda iti panagrang-aymo. Pudno dayta uray no adun a tawen a nagpasalistaka iti eskuelaan.​—Prov. 1:5.

Kayatmo kadi a naparpartak ti panagrang-aymo? Maaramidmo dayta no ikagumaam. Adalem a nasaksakbay ti leksion nga idatag ti tunggal estudiante. No kasapulan ti mangsandi a mangiparang iti paset, nakasaganaka nga agboluntario, ket mangnayon dayta iti kapadasam. No agpaset dagiti dadduma, imdengam a naimbag no kasano ti panangidatagda iti material. Makaadaltayo iti tunggal maysa.

Kanayonanna, no ipalubos ti kasasaadmo, naparpartak ti panagrang-aymo no adalem a nasaksakbay ti linaon daytoy a libro. No naadalmon a nalaing ti linaon dagiti sumaganad a 15 a leksion, rugiamon a sukimaten ti “Programa a Mangparang-ay iti Abilidad nga Agpalawag ken Mangisuro,” a mangrugi iti panid 78. Umuna, adalem ti tunggal leksion, ket padasem dagiti naibalabala nga ensayo a mainaig iti dayta. Ipakatmo iti ministeriom dagiti maad-adalmo. Dakkel ti maitulong daytoy iti irarang-aymo a kas pumapalawag ken mannursuro iti Sao ti Dios.

Ti masursurom iti Teokratiko nga Eskuelaan ti Panagministro tulongannaka a mangaramid kadagiti kapatgan a banag iti biag. Yantangay sibibiagtayo gapu ti pagayatan ti Dios, ti panangidayaw kenkuana kaipapananna ti panangbigbig iti mismo a panggep ti kaaddatayo. Maikari ni Jehova a Dios iti katan-okan a pammadayaw. (Apoc. 4:11) Ti masursurotayo iti eskuelaan ti maysa kadagiti pamay-an tapno maaramidtay daytoy, iti kasta, makapanunottayo a nalawag, makapagtignay a nainsiriban, ken epektibo a maipakaammotayo dagiti nagsayaat a kinapudno a masarakan iti naipaltiing a Sao ti Dios.