Nataktika Ngem Natibker

TI KINATAKTIKA isu ti abilidad a makilangen kadagiti sabsabali iti wagas a saanda a masair nga awan gapgapuna. Ramanenna no kasano ken kaano nga ibaga dagiti bambanag. Di kayat a sawen daytoy ti panangikompromiso iti umiso wenno panangballikug iti pudno. Ti kinataktika ket saan a panagbuteng iti tao.​—Prov. 29:25.

Dagiti bunga ti espiritu ti kasayaatan a pundasion iti panagbalin a nataktika. Gapuna, ti tao a ginutugot ti ayat dina kayat a ruroden dagiti sabsabali; kayatna ida a tulongan. Ti tao a naanus ken naemma ket naanat ti panangaramidna kadagiti bambanag. Ti tao a mannakikappia nasayaat ti pannakilangenna kadagiti sabsabali. Uray pay nagubsang ti kababalin dagiti tattao, agtalinaed a kalmado ti maysa a mabayag ti panagituredna.​—Gal. 5:22, 23.

Ngem uray kasano ti pannakaidatag ti mensahe ti Biblia, adda dagiti tattao a mangbusor iti dayta. Gapu iti dakes a panagpuspuso ti kaaduan kadagiti Judio idi umuna a siglo, nagbalin ni Jesus kadakuada a “bato a pakaitibkolan ken dakkel a bato a pakabasolan.” (1 Ped. 2:7, 8) Mainaig iti trabahona a panangiwaragawag iti Pagarian, kinuna ni Jesus: “Immayak a mangirugi iti apuy ditoy daga.” (Luc. 12:49) Ti mensahe ti Pagarian ni Jehova, agraman ti banag a masapul a bigbigen dagiti tattao ti kinasoberano ti Namarsua kadakuada, ket isu pay laeng ti napateg nga isyu a naipasango iti sangatauan. Adu a tattao ti kumontra iti mensahe nga iti saanen a mabayag ikkatento ti Pagarian ti Dios ti agdama a dakes a sistema ti bambanag. Ngem kas panagtulnog iti Dios, itultuloytayo ti mangasaba. Nupay kasta, bayat nga aramidentay dayta, laglagipentayo ti balakad ti Biblia: “No mabalin, agingga a makapagpannuray kadakayo, makikappiakayo iti amin a tattao.”​—Roma 12:18.

Nataktika No Mangasabaka. Adu dagiti kasasaad a makasaritatayo dagiti sabsabali maipapan iti pammatitayo. Siempre, aramidentay ti kasta no addatayo iti tay-ak ti ministerio, ngem ikagumaantayo met a kasarita kadagiti maitutop a gundaway dagiti kabagian, katrabahuan, ken kaeskuelaantayo. Kadagitoy a kasasaad, masapul a nataktikatayo.

Mabalin a marurodda no idatagtayo ti mensahe ti Pagarian iti wagas a kasla sersermonantay ida. No saanda nga agpatpatulong ken nalabit saanda a kasapulan ti tulong, mabalin a tagidaksenda no iparipiriptayo a kasapulan a mailintegda. Ania ti mabalintay nga aramiden tapno ditay makaited iti di umiso nga impresion? Makatulong ti panagsursuro iti nainggayyeman a pannakisarita.

Ikagumaam nga irugi ti saritaan babaen ti panangdakamat iti topiko a paginteresan ti tao a kasaom. No kabagiam, katrabahuam, wenno kaeskuelaam dayta a tao, nalabit ammomon ti paginteresanna. Uray no damoyo ti agam-ammo, mabalinyo a pagsaritaan ti damag a nangngegmo wenno nabasam iti pagiwarnak. Dagiti kasta a banag ti masansan nga adda iti panunot dagiti adu a tattao. No mamalaybalayka, agpaliiwka. Dagiti dekorasion iti pagtaengan, ay-ayam iti arubayan, narelihiosuan a banag, ken bumper sticker iti kotse a nakaparada ket mabalin a mangted met iti pangripiripan iti paginteresan ti bumalay. No umasideg a makisarita kenka ti bumalay, imdengam ti aniaman nga ibagana. Ti ibagana ti mangpasingked wenno mangkorehir iti impagarupmo a paginteresan ken panangmatmatna ken ikkannaka pay iti pamalatpatan no ania ti masapul nga ikonsiderarmo tapno makasabaam.

Bayat ti panagsaritayo, iranudmo dagiti punto manipud iti Biblia ken kadagiti literatura a naibatay iti Biblia a mainaig iti pagsarsaritaanyo. Ngem dimo bukbukodan ti agsao. (Ecl. 3:7) Pagsawem met ti bumalay no la ket ta mayat. Agintereska iti panangmatmat ken kadagiti kapanunotanna. Makaipaay dagitoy iti pamalatpatan a kasapulam tapno maipakitam ti kinataktika.

Sakbay nga agsaoka, panunotem no kasano ti panagsaad dagiti ibagam iti bumalay. Komendaran ti Proverbio 12:8 ti ‘ngiwat a masirib.’ Ti sao a Hebreo a nausar ditoy ket mainaig kadagiti ideya a kas iti pannakaawat ken kinaannad. No kasta, ramanen ti kinasirib ti naannad a panagsasao a resulta ti naan-anay a panangusig iti maysa a banag tapno makapagtignay a nainsiriban. Mamakdaar ti bersikulo 18 ti isu met laeng a kapitulo ti Proverbio maipapan iti ‘panagsao a siaaleng-aleng a kas kadagiti panangsugat ti kampilan.’ Mabalintay nga itandudo ti kinapudno a linaon ti Biblia a ditay mangsasair.

Ti naannad a panangpili iti sasao ket makatulong kenka tapno saan a malapdan ti pannakisaritam. No ti sao a “Biblia” ket mangpataud iti isusupiat, usarem ti sasao a kas iti “nasantuan a sursurat” wenno “maysa a libro a maipabpablaak iti nasurok a 2,000 a lenguahe.” No dakamatem ti Biblia, mabalinmo a damagen iti tao a kasarsaritam no ania ti makunana maipapan iti dayta, sa laglagipem ti komentona bayat nga itultuloyyo ti agsarita.

Ti kinataktika masansan a ramanenna ti panangammo iti maitutop a tiempo a panangisao kadagiti bambanag. (Prov. 25:11) Mabalin a dimo anamongan amin nga ibaga ti bumalay, ngem saan a masapul a supiatem amin dagiti di nainkasuratan a kapanunotanna. Saanmo a mamimpinsan nga ibaga kenkuana ti amin nga ammom. Kinuna ni Jesus kadagiti adalanna: “Adu pay a banag ti sawek kadakayo, ngem saanyo a kabaelan nga awiten ida iti agdama.”​—Juan 16:12.

No mabalin, sipapasnek a komendaram dagidiay kasarsaritam. Uray no mannakisupiat ti bumalay, mabalinmo latta a komendaran ti panangyebkasna iti kapanunotanna. Inaramid daytoy ni apostol Pablo idi pinalawaganna dagiti pilosopo iti Areopago idiay Atenas. Dagiti pilosopo “nakipatpatangda kenkuana buyogen ti pannakisupiat.” Kasanona a mailawlawag ti puntona nga awan ti masairna? Sakbay dayta, napaliiwna dagiti adu nga altar nga agpaay kadagiti didiosenda. Imbes a kondenarenna dagiti taga Atenas gapu iti panagrukbabda kadagiti idolo, sitataktika a kinomendaranna ida gapu iti napalalo a kinarelihiosoda. Kinunana: “Makitak nga iti amin a bambanag kasla ad-adda a managbutengkayo kadagiti didiosen ngem ti dadduma.” Daytoy a pamay-an ti nangted kenkuana iti gundaway a mangipakaammo iti mensahena maipapan iti pudno a Dios. Kas resultana, adda dagiti nagbalin a manamati.​—Ara. 17:18, 22, 34.

Dika agpudot no sumupiat ti bumalay. Agtalinaedka a kalmado. Matmatam dayta a kas gundaway a mangtarus iti panagpampanunotna. Mabalinmo a pagyamanan ta inyebkasna ti kapanunotanna. Kasanon no bigla a kunaenna: “Adda relihionkon”? Mabalinmo a sitataktika a damagen: “Datin aya a relihiosoka?” Sa kalpasan ti isusungbatna, inayonmo: “Ti panagkunam agkaykaysanto ngata ti sangatauan iti maymaysa a relihion?” Mabalin nga ikkannaka daytoy iti gundaway a mangituloy iti saritaanyo.

Makatulong kadatayo nga agbalin a nataktika no addaantayo iti umiso a panangmatmat iti bagbagitayo. Kombinsidotayo unay iti kinaumiso ti daldalan ni Jehova ken iti kinapudno ti Saona. Agsaotayo nga addaan iti kombiksion maipapan kadagitoy a bambanag. Ngem awan ti rason nga aginlilintegtayo. (Ecl. 7:15, 16) Agyamantayo ta naammuantayo ti kinapudno ken sagsagrapentayo ti bendision ni Jehova, ngem pagaammotayo unay a ti kaadda kadatayo ti anamongna ket maigapu iti di kaikarian a kinamanangngaasina ken iti pammatitayo ken Kristo, saan a maigapu iti bukodtayo a kinalinteg. (Efe. 2:8, 9) Bigbigentayo a nasken nga ‘itultuloytay a suboken no addatayo iti pammati, nga itultuloytay a paneknekan no aniatayo.’ (2 Cor. 13:5) Isu a no kasaritatayo dagiti tattao maipapan iti kinapateg ti panagbiag a mayannurot kadagiti pagalagadan ti Dios, sipapakumbaba nga iyaplikartay met dagiti balakad ti Biblia iti mismo a biagtayo. Awan kalintegantayo a mangukom iti padatayo a tao. “Isuamin a panangukom impabiang [ni Jehova] iti Anak,” ket isu ti mangukom kadatayo sigun iti aramidtayo.​—Juan 5:22; 2 Cor. 5:10.

Kadagiti Pamilia ken Pada a Kristiano. Saan laeng koma nga iti tay-ak ti ministerio nga agbalintayo a nataktika. Yantangay ti kinataktika ket pakakitaan iti bunga ti espiritu ti Dios, nataktika met koma ti pannakilangentayo kadagiti kameng ti pamiliatayo. Ti ayat ti mangtignay kadatayo a mangikabilangan iti rikrikna dagiti sabsabali. Saan nga agdaydayaw ken Jehova ti asawa ni Reyna Ester, ngem impakitana ti panagraem kenkuana ken napalalo ti annadna a nangidatag kadagiti banag a pakaseknan dagiti adipen ni Jehova. (Ester, kap. 3-8) Iti dadduma a kasasaad, ti nataktika a pannakilangen kadagiti di Saksi a kameng ti pamilia mabalin a kalikagumanna a bay-antay ti kababalintayo, imbes nga ilawlawagtayo dagiti patpatientayo, a mangguyugoy kadakuada iti kinapudno.​—1 Ped. 3:1, 2.

Kasta met, uray no am-ammotayo unay dagiti kameng ti kongregasion, saantay koma nga agbalin a nagubsang wenno nasabrak kadakuada. Saantay koma nga irason a gapu ta nataengandan, saanda koma a laglagidawen dayta. Ditay met koma agpambar a kunaentayo: “Kastaak la ngamin a talaga.” No madlawtayo a makasair kadagiti dadduma ti panagsasaotayo, determinadotay koma nga agbalbaliw. Ti “nasged nga ayat[tayo] iti maysa ken maysa” ti mangtignay koma kadatayo nga ‘agaramid iti naimbag kadagidiay nainaig kadatayo iti pammati.’​—1 Ped. 4:8, 15; Gal. 6:10.

No Palpalawagam ti Tallaong. Masapul met a nataktika dagiti agpalpalawag iti plataporma. Nagduduma ti nalikudan ken kasasaad dagiti agdengdengngeg. Saan nga agpapada ti tukad ti naespirituan a panagrang-ayda. Adda dagidiay damoda ti tumabuno iti Kingdom Hall. Dagiti dadduma mabalin a mapaspasaranda ti narikut a kasasaad a saan nga ammo ti agpalpalawag. Ania ti makatulong iti agpalpalawag tapno dina masair dagiti agdengdengngeg?

Maitunos iti balakad ni apostol Pablo ken Tito, dika “agsao iti makadangran iti asinoman, . . . nga agbalin[ka] a nainkalintegan, nga ipakita[m] ti isuamin a kinaalumamay kadagiti amin a tattao.” (Tito 3:2) Saanmo a tultuladen ti panangusar ti lubong kadagiti termino a manglais kadagiti tattao a sabali ti puli, lenguahe, wenno nasionalidadda. (Apoc. 7:9, 10) Sipaprangka nga ilawlawagmo dagiti iparebbeng ni Jehova, ken ipakitam a nainsiriban ti panangyaplikar kadagitoy; ngem dika mangisawang kadagiti makapainsulto a sasao maipapan kadagidiay saan pay a magmagna a naan-anay iti dalan ni Jehova. Paregtaem ketdi amin ida a mangilasin iti pagayatan ti Dios ken mangaramid iti makaay-ayo kenkuana. No mangbalakadka, mabuyogan koma dayta iti nabara ken napasnek a komendasion. Babaen ti wagas ti panagsaom ken tono ti bosesmo, ipariknam ti nainkabsatan nga ayat a rumbeng nga ipakitatayo iti tunggal maysa.​—1 Tes. 4:1-12; 1 Ped. 3:8.