Maisalakan Dagiti Amin a Kita ti Tattao
1. Iti ania nga agpannuray ti takdertayo iti imatang ti Dios?
1 Adda gundawaytayo a maisalakan gapu iti di kaikarian a kinamanangngaasi ti Dios. Pagayatan ni Jehova a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:3, 4) Ti takdertayo iti imatang ti Dios ket agpannuray, saan nga iti puli, kasasaad iti kagimongan, abilidad, wenno makinruar a langatayo, no di ket iti panamatitayo iti daton a pangsubbot ni Jesus. (Juan 3:16, 36) Kas katrabahuan ti Dios, masapul nga iwaksitayo ti aniaman a panangidumduma, a nalabit mangimpluensia kadatayo a mangilaksid kadagiti tattao a sidadaan nga awaten ni Jehova.
2, 3. Ania ti makatulong kadatayo a di agipato kadagiti tattao maibatay iti makinruar a langada?
2 Dikay Agipato: Ti linaon ti puso dagiti tattao ti kitkitaen ni Jehova, a di mangbabalaw wenno mangidumduma. (1 Sam. 16:7) Kitaenna met no ania ti posible a pagbalinanda. Gapuna, ibilangna a makaay-ayo dagidiay agtarigagay a mangparagsak kenkuana. (Hag. 2:7) Kasta met kadi ti panangmatmattayo kadagiti sabsabali?
3 Mabalin a nakadidillaw ti panaglanglanga dagiti dadduma a tattao a makasabaantayo. Mabalin a naalas wenno saan a desente ti panagkawkawesda, barbasan, wenno adda aritos iti agong wenno bibigda. Mabalin nga awan ti pagtaengan dagiti dadduma. Adda met dagidiay nalabit nagubsang ti panangtratoda kadatayo. Imbes nga ipatotayo nga imposible nga agbalinda a managdaydayaw ni Jehova, positibo koma ti panangmatmattayo, ‘ta uray datayo idi naminsan nakuneng, nasukir, ken nayaw-awantayo.’ (Tito 3:3) Iti pannakabigbigtayo iti daytoy, kayattayo a kasabaan dagiti amin a kita ti tattao, uray dagidiay kasla di maikari no ibatay iti makinruar a langada.
4, 5. Ania ti maadaltayo iti ulidan da Jesus ken Pablo?
4 Dagiti Ulidan Idi Umuna a Siglo: Madadaan idi ni Jesu-Kristo a tumulong kadagidiay nalabit imbilang dagiti dadduma nga imposible nga agbalin a managdaydayaw ni Jehova. (Luc. 8:26-39) Nupay pulos a dina pinanuynoyan dagiti dakes nga aramid, ammona a mabalin a makaaramid iti dakes dagiti tattao. (Luc. 7:37, 38, 44-48) Gapuna, maawatanna ti kasasaadda ket “simnek ti asina kadakuada, agsipud ta kaslada karkarnero nga awanan pastor.” (Mar. 6:34) Matuladtayo kadi nga ad-adda ti ulidanna?
5 Naub-ubor, nakabkabil, ken naibalud idi ni apostol Pablo. (Ara. 14:19; 16:22, 23) Gapu kadagita a nasaem a kapadasanna, naupay ken pinanunotna kadi a saysayangenna laeng ti tiempona kadagiti dadduma a nasion ken tattao a sabali ti pulida? Saan a pulos. Ammona nga adda dagiti nasingpet ti panagpuspusoda a tattao a masarakan kadagiti amin a puli, ket determinado a mangsapul kadakuada. Kasta kadi ti panangmatmattayo kadagiti tattao iti teritoriatayo a nagduduma ti kultura ken kasasaadda iti biag?
6. Ania ti mabalin nga epekto ti kababalintayo kadagidiay damoda ti tumabuno kadagiti gimong ti kongregasion?
6 Panangawat Kadagiti Sabsabali iti Kaaldawantayo: Adu kadagiti adipen ti Dios ti maragsakan ta inawat ida iti kongregasion dagiti kakabsat a saan a nagpaimpluensia iti makinruar a langa. Idiay Alemania, napan iti Kingdom Hall ti maysa a lalaki a barbasan, pagat-abaga ti buokna, ken narugit ti kawesna. Dakes ti pakasarsaritaanna. Ngem sibabara nga inabrasa dagiti kakabsat iti gimong. Naayatan unay isu a nagsubli iti simmaruno a lawas. Di nagbayag, nataknengen ti panaglanglangana, saanen nga agsigsigarilio, ken inkallaysanan ti nobiana. Idi agangay, isuda nga agassawa ken dagiti annakda agserserbidan ken ni Jehova kas nagkaykaysa a pamilia.
7. Kasano a matuladtayo ti di mangidumduma a Diostayo?
7 Kas panangtulad iti di mangidumduma a Diostayo, sapay koma ta awisentayo dagiti amin a kita ti tattao a mangaprobetsar iti di kaikarian a kinamanangngaasi ti Dios.
[Ladawan iti panid 6]
“Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”—Ara. 10: 34, 35.