Panangmantener Kadagiti Kingdom Hall-tayo
1. Ania ti pakausaran ti Kingdom Hall?
1 Dagiti Kingdom Hall ket agserbi kas sentro ti nasin-aw a panagdaydayaw iti komunidad. Nupay simple ken nanumo dagitoy a patakder, nasken a mantenerentayo ken dalusantayo a kanayon ti aglawlawna gapu ta irepresentarda ni Jehova ken dagiti adipenna iti dayta nga ili wenno purok.
2. Apay a napateg a pagtalinaeden a nadalus ken presentable ti Kingdom Hall?
2 Regular nga Eskediul ti Panagdalus: Napateg a paset ti sagrado a panagserbitayo ti panangdalus iti Kingdom Hall. Kuna ti panid 121 ti libro nga Organisado: “Masapul nga ibilang dagiti kameng ti kongregasion a maysa a pribilehio ti panangted iti pinansial a suporta iti Kingdom Hall ken ti panagboluntario a mangtaginayon a nadalus, presentable, ken nasayaat ti kasasaadna. Ti uneg ken ruar ti Kingdom Hall ket maitutop koma nga itakderanna ti organisasion ni Jehova.” Kas idi tiempo ti Biblia, dagiti adipen ni Jehova ita masapul a siaanepda met a ‘mangpasayaat ken mangtarimaan’ iti lugar a pagdaydayawantayo.—2 Cron. 34:10.
3. Kasano a maorganisar ti panagdalus iti Kingdom Hall, ken siasino dagiti mabalin a makipaset iti daytoy a pribilehio?
3 Maipaskil koma iti information board ti linawas nga eskediul ti panagdalus iti Kingdom Hall. Rumbeng nga agsisinnublat nga agdalus dagiti amin a grupo ti panagadal iti libro iti kada lawas, a surotenda ti listaan dagiti banag a nasken nga aramiden. Dagiti amin a makabael masapul a makipasetda iti linawas a pribilehio a mamagtalinaed iti Kingdom Hall a nadalus ken presentable. Iti panangiwanwan dagiti dadakkelda, mabalin a makiraman nga agdalus dagiti ubbing, iti kasta, masursuroda nga ipateg daytoy a pribilehio. Kasapulan ti nasayaat a kooperasion tapno saan laeng a manmano ti makipaset iti daytoy napateg nga aspeto ti panagdayawtayo, nangruna no saan la a maymaysa a kongregasion ti mangus-usar iti Kingdom Hall.
4. Kasano a maimatonan ti trabaho a panangmantener iti Kingdom Hall?
4 Panangmantener iti Kingdom Hall: Responsabilidad ti bagi dagiti panglakayen nga imatonan ti pannakamantener ti Kingdom Hall. No maysa laeng a kongregasion ti agus-usar iti Kingdom Hall, maysa a panglakayen wenno ministerial nga adipen ti madutokan a mangorganisar iti trabaho. Kitaenna ti inaldaw a pannakausar ti Kingdom Hall, ken siguraduenna a nadalus ken nasayaat ti kasasaad daytoy ken umdas dagiti suplay. No dua wenno ad-adu pay a kongregasion ti mangus-usar iti Kingdom Hall, mangdutok dagiti bagi dagiti panglakayen iti operating committee a mangaramid kadagiti urnos iti pannakaasikaso ti pasdek ken dagiti sanikua. Dagiti bagi dagiti panglakayen ti mangimaton iti trabaho daytoy a komite.
5. Ania ti rumbeng a maaramid a tinawen ken kabayatan ti ibibisita ti manangaywan iti sirkito tapno masigurado a nasayaat ti kasasaad ti Kingdom Hall?
5 Masukimat a naimbag ti Kingdom Hall tunggal Setiembre. Malaksid iti dayta, bayat dagiti ibibisita dagiti manangaywan iti sirkito, ireportda ti kasasaad ti Kingdom Hall ken mangtedda kadagiti singasing maipapan kadagiti banag a nasken nga asikasuen. Dagiti panglakayen ti makinrebbeng iti panangaramid kadagiti urnos tapno maasikaso a naimbag ti aniaman a masapul a matarimaan. Mabalin a maawis dagiti agibumbunannag a tumulong kadagiti kasapulan a matarimaan. Alerto koma ti amin a mangasikaso uray kadagiti babassit a bambanag ken alistoda koma a mangkita no ania dagiti masapul a tarimaanen.
6, 7. Kasano ti pannakapataud dagiti pondo para iti regular a pannakamantener ti Kingdom Hall?
6 Panangilatang Kadagiti Pondo Para iti Panangmantener iti Kingdom Hall: Boluntario dagiti mangar-aramid iti kaaduan a trabaho iti Kingdom Hall ken iti aglawlawna. Ti kinamanagsakripisioda ket nagsayaat nga ebkas ti ayat ken dakkel ti maitulongna tapno maksayan dagiti gastos. Nupay kasta, kasapulan dagiti pondo a pangtarimaan ken panggatang kadagiti alikamen a pagdalus, ken pangbayad iti nausar a danum ken koriente. Gapuna, mairekomenda a mangilatang dagiti panglakayen iti pondo iti tunggal bulan tapno adda usaren ti operating committee, wenno ti panglakayen wenno ministerial nga adipen a natudingan a mangasikaso iti pannakamantener ti Kingdom Hall.
7 No saan la a maymaysa a kongregasion ti mangus-usar iti Kingdom Hall, adda koma nakabanko a pondo ti operating committee ket ikkanda ti tunggal bagi dagiti panglakayen iti binulan a naisurat a pinansial a report tapno makita dagiti panglakayen no kasano ti pannakausar dagiti pondo. Dagiti panglakayen ti responsable iti umiso a pannakausar dagiti pondo ti kongregasion.
8. Ania ti rumbeng nga aramiden no kasapulan ti dakkel a panangtarimaan wenno panangretubar iti Kingdom Hall?
8 Dakkel a Panangtarimaan ken Panangretubar: No makita ti operating committee a nasken a maaramid ti dakkel a panangretubar mainaig iti pannakausar wenno pannakatarimaan ti Kingdom Hall, ti komite iyumanna daytoy kadagiti bagi dagiti panglakayen. No makitada a talaga a kasapulan ti dakkel a panangtarimaan wenno panangretubar, pattapattaen dagiti panglakayen no mano ti magastos sa mangaramidda iti resolusion nga aprobaran ti kongregasion. (Kitaenyo ti “Saludsod” iti Pebrero 1994 a Ti Ministeriotayo iti Pagarian.) Kalpasanna, masapul nga agsuratda iti sanga nga opisina para iti pannakaanamong dayta. Iti suratda iti sanga nga opisina, masapul nga ibaga dagiti panglakayen no ania ti naisingasing a maaramid, mano ti magastos, ken no mano ti adda a pondoda. Saan koma a mairugi ti dakkel a panangtarimaan wenno panangpalawa iti Kingdom Hall no awan pay ti pananganamong ti sanga nga opisina.
9. Kasanotay a maipakita ti apresasiontayo iti Kingdom Hall-tayo?
9 Anian a panangipategtayo iti pribilehiotayo nga aggigimong iti Kingdom Hall! Aramidentayo amin ti rebbengentayo babaen ti naimpusuan a panangted iti donasion ken pannakitinnulong a mangmantener iti lugar a pagdaydayawantayo.