No Kasano ti Agsagana iti Panangipaima Kadagiti Magasin

1. Apay a nasaysayaat ti mangisagana iti bukodtayo a presentasion iti panangipaima kadagiti magasin imbes a mangikabesatayo iti pagtuladan a naipaay iti Ti Ministeriotayo iti Pagarian?

¹ Mabalin a masdaawkayo no ‘apay a nasken nga agisaganatayo kadagiti presentasion iti panangipaima kadagiti magasin idinto ta adda metten dagita iti tunggal ruar Ti Ministeriotayo iti Pagarian?’ Nupay natakuatan ti adu a makatulong dagita a pagtuladan a presentasion, kasapulan latta ti personal a panagsagana. Ti presentasion nga epektibo iti maysa a teritoria ket mabalin a saan nga epektibo iti sabali a lugar. No kasta, saantayo nga obligado a mangikabesa kadagiti pagtuladan a presentasion no ipaimatayo dagiti magasin. Uray no kayattayo nga usaren ti maysa a pagtuladan a presentasion, kasayaatan no ibagatayo dayta iti bukodtayo a sasao.

2. Ania ti ramanen ti panangikeddeng iti artikulo nga itampokmo?

² Mangpilika iti Artikulo: Kalpasan a mabasam ti magasin, mangpilika iti artikulo a makapainteres kenka ken maitutop iti teritoriayo. Mabalin a ti kombiksion ken kinagagarmo a mangidatag iti magasin tignayenna ti bumalay a mangbasa met iti dayta. Nupay mabalin nga itampokmo ti artikulo a paginteresan ti kaaduan a tattao iti teritoriayo, nasayaat no kabesadom dagiti dadduma pay nga artikulo iti magasin. Daytoy ti tumulong kenka a mangbalbaliw iti presentasionmo no adda makasaritam nga ad-adda nga interesado iti sabali a topiko.

3. Ania nga introduksion ti kasayaatan nga usarem?

³ Agsaludsodka: Kalpasanna, isaganam a naimbag dagiti panglukat a sasaom. Napateg ti introduksionmo. Mabalin a makatulong ti panangyimtuod iti mamagpanunot a saludsod tapno maalam ti interes ti bumalay iti artikulo a napilim nga idatag. Kaaduanna a kasayaatan ti panangusar kadagiti saludsod a mangadaw iti kapanunotan. Liklikam ti mangyimtuod iti saludsod a mangpaalusiis wenno mamagpungtot iti bumalay.

4. Ania dagiti pagsayaatan ti panangibasa iti teksto no ipalubos ti kasasaad?

⁴ Mangibasaka iti Teksto: Kamaudiananna, mangpilika iti teksto a basaem no ipalubos ti bumalay, a nalabit masarakan iti artikulo nga itampokmo. No mangibasaka iti teksto, matarusan ti bumalay a ti mensahetayo ket naggapu iti Sao ti Dios. (1 Tes. 2:13) Ti teksto met ti makaipaay kenkuana iti panangsaksi uray no dina kayat ti umawat kadagiti magasin. Adda dagiti nakatukay iti interes ti bumalay babaen ti panangibasada iti teksto sakbay a nangyimtuodda iti espesipiko a saludsod. Mabalinmo nga iruangan ti teksto babaen ti panangibagam, “Kayatko a maammuan no ania ti makunayo iti daytoy a bersikulo ti Biblia.” Kalpasanna, iturongmo ti atension ti bumalay iti mainaig a punto iti magasin sa komentuam iti apagbiit tapno ad-adda a matukay ti interesna sakbay nga itukonmo dayta.

5. Ania dagiti napateg a giya a laglagipem no agsagsaganaka maipaay iti panangipaima kadagiti magasin?

⁵ Awan dagiti nainget a paglintegan no ania ti ibagatayo iti panangitukon kadagiti magasin. Kaaduanna a kasayaatan no simple ken ababa ti presentasionmo. Usarem ti presentasion a komportable kenka a mangyeg kadagiti positibo a resulta. Ipamaysam ti mangringbaw a pateg dagiti magasin, ken sigagagar nga idatagmo dagita. No nakasaganaka a naimbag, ad-adda nga epektibo ti panangipaimam iti Ti Pagwanawanan ken Agriingkayo! kadagidiay “siuumiso nga agannayas iti agnanayon a biag.”—Ara. 13:48.

No Ania ti Ibagayo Maipapan Kadagiti Magasin

Ti Pagwanawanan Nob. 15

“Gapu iti nakaro a kinadakes ditoy lubong, adda dagiti agkunkuna, ‘Apay koma nga ikagumaak ti agaramid iti umiso?’ Nariknayo kadin dayta? [Palubosanyo a sumungbat.] Imutektekanyo daytoy a pammaregta. [Basaenyo ti Proverbio 2:21, 22.] Ilawlawag daytoy a magasin ti kapatgan a rason no apay nga agaramidtayo iti naimbag.”

Agriingkayo! Nob.

“Ipagarup ti dadduma a ti Dios ti makinggapuanan iti amin a mapaspasamak. No adda dumteng a trahedia, ibagada nga adda naimbag a rason ti Dios no apay nga inyegna dayta. Ania ti maikunayo? [Palubosanyo a sumungbat sa basaenyo ti Santiago 1:13.] Ipakita daytoy a magasin no ania ti kunaen ti Biblia a makagapu iti panagsagaba ken no ania ti ar-aramiden ti Dios a mamagpatingga iti dayta.”

Ti Pagwanawanan Dis. 1

“Iti panagkunayo, matungpal ngata iti kaaldawantayo daytoy a padto ti Biblia? [Basaenyo ti Mateo 24:11 sa palubosanyo a sumungbat.] Salaysayen daytoy a magasin ti sumagmamano a nalataken a sursuro. Ipakitana met no kasano a maliklikantayo ti panangallilaw dagiti ulbod a mannursuro.”

Agriingkayo! Dis.

“Siasino ti maibagayo a katan-okan pay laeng a tao? [Palubosanyo a sumungbat.] Adu ti mangibilbilang ken Jesus kas ti katan-okan a tao. Imutektekanyo no anianto ti aramidenna ditoy daga kas Agturay iti Pagarian ti Dios. [Ipakitayo ti ladawan iti panid 8-9 sa basaenyo ti maysa kadagiti naitampok a teksto.] Ilawlawag daytoy a magasin no kasano ken kaano nga itungpal dayta ni Jesus.”