Tulonganyo Dagiti Mayad-adalan iti Biblia nga Agbalin a Manangibunannag iti Naimbag a Damag ti Pagarian
1 Nakasaksaknap ti annongen nga impabaklay ni Jesus kadagiti adalanna kas nailanad iti Mateo 28:19, 20. Naibilin kadagiti adalan ni Kristo a mangaramidda iti ad-adu nga adalan, nga agbalinto met a manangaramid iti adalan. Iti kasta, maipasdek ti pundasion para iti maudi a sangalubongan a panangiwaragawag iti naimbag a damag maipapan iti Pagarian ti Dios kabayatan ti nagpateg a panawen ti panungpalan a pagbibiagantay itan.—Mat. 24:14.
2 Dagiti iyad-adalantayo ket mabalin a dagiti annaktayo wenno dagiti sabsabali a mayat a makipagadal kadatayo iti Biblia. Napasnek ti tarigagaytayo a tumulong kadakuada a mangawat iti responsabilidadda a mangtulong kadagiti sabsabali nga agbalin nga adalan ni Jesu-Kristo.—Luc. 6:40.
3 Isaganayo Ida a Mangasaba: Paregtaenyo dagidiay iyad-adalanyo nga iranudda kadagiti sabsabali dagiti masursuroda. Estoriaenyo kadakuada dagiti makaparegta a kapadasan iti panagserbi iti tay-ak. Sanayenyo dagiti annakyo manipud iti kinaubingda a makiraman iti ministerio iti makagunggona a pamay-an sigun iti kabaelanda. (Sal. 148:12, 13) Ipakitayo babaen ti sao ken aramid nga ipatpategyo unay ti ministerio.—1 Tim. 1:12.
4 Ti us-usaren ni Jehova ket dagidiay laeng mangawat ken mangannurot kadagiti nalinteg a pagalagadanna. Siempre, basbassit ti ammo dagiti kabbaro nga agibumbunannag no idilig kadagiti aduan kapadasan, dedikado, ken bautisado a ministro ti Pagarian, ngem dagiti kabbaro nasken a patienda ken kabaelanda nga ilawlawag dagiti pamunganayan a sursuro ti Biblia. (Kitaenyo ti libro nga Organisado, p. 79-82.) No naan-anayen a simminada iti “Babilonia a Dakkel” ken saandan a makiramraman iti politika, masapul a regular a tabunuanda dagiti gimong ti kongregasion.—Apoc. 18:2, 4; Juan 17:16; Heb. 10:24, 25.
5 No kombinsidokayo a ti maysa kadagiti iyad-adalanyo iti Biblia ket kualipikadon nga agbalin a di bautisado nga agibumbunannag, masapul nga ibagayo dayta iti mamangulo a manangaywan. Isu ti mangdutok iti dua a panglakayen a makisarita kadakayo ken iti iyad-adalanyo tapno maikeddeng no kualipikado nga agserbi a kadua ti kongregasion kas di bautisado nga agibumbunannag iti naimbag a damag maipapan iti Pagarian. Iti kasta, maaddaankayo iti pribilehio nga agtultuloy a mangsanay iti iyad-adalanyo bayat ti panagkaduayo a mangasaba.