No Kasano nga Irugi ti Panangyadal iti Libro nga Isursuro ti Biblia

Adu kadatayo ti maragsakan a mangyadal iti Biblia no laeng koma makairugitayo iti panagadal. Mabalin a makatulong kadatayo ti baro a libro nga Ania a Talaga ti Isursuro ti Biblia? Nadisenio ti pakauna iti panid 3-7 a mangguyugoy iti bumalay a makipagadal iti Biblia babaen iti daytoy a publikasion. Uray dagidiay limitado ti kapadasanda iti ministerio matakuatanda a nalaka dayta nga usaren a pangirugi iti panangyadal.

◼ Mabalinyo a padasen daytoy a pamay-an, nga usarenyo ti panid 3:

Kalpasan a madakamat ti maysa a damag wenno maysa a problema a pakaseknan dagiti tattao iti teritoriayo, iturongyo ti atension ti bumalay kadagiti saludsod a napuskol ti pannakaisuratna iti panid 3 sa pagkomentuenyo. Kalpasanna, ukagenyo ti panid 4-5.

◼ Wenno mabalin a kayatyo nga irugi babaen ti panangitampokyo iti panid 4-5:

Mabalinyo a kunaen, “Saan kadi a nakasaysayaat no aktual a mapasamak dagiti panagbalbaliw a nailadawan ditoy?” Wenno saan, mabalinyo nga isaludsod, “Ania kadagitoy a kari ti kayatyo a makita a matungpal?” Imdenganyo a naimbag ti sungbat ti bumalay.

No interesado unay ti bumalay iti maysa kadagiti kasuratan, ipakitayo kenkuana no ania ti isursuro ti Biblia maipapan iti dayta babaen ti panangusigyo kadagiti parapo iti libro a mangilawlawag iti dayta a teksto. (Kitaenyo ti kahon iti daytoy a panid ti suplemento.) Pagsaritaanyo ti material a kas iti pamay-anyo a mangyadal iti Biblia. Mabalin nga aramiden daytoy iti damo nga isasarungkar iti mismo a ruangan iti uneg ti lima agingga iti sangapulo a minuto.

◼ Ti sabali pay a pamay-an ket ti panangawis iti bumalay a mangyebkas iti kapanunotanna, nga usarenyo ti panid 6:

Iturongyo ti atension ti bumalay kadagiti saludsod iti baba ti panid sa iyimtuodyo, “Naisalsaludsodyo kadin ti aniaman kadagitoy?” No interesado ti bumalay iti maysa kadagiti saludsod, ukagenyo dagiti parapo iti libro a mangsungbat iti dayta a saludsod. (Kitaenyo ti kahon iti daytoy a panid ti suplemento.) Bayat nga us-usigenyo a dua ti impormasion, mangyad-adalkayon iti Biblia.

◼ Mabalin nga usaren ti panid 7 a mangiturong iti pannakaidemostra iti panagadal iti Biblia:

Basaenyo ti umuna a tallo a sentensia iti panid ket kalpasanna, ukagenyo iti kapitulo 3, sa idemostrayo ti panagadal, nga usarenyo ti parapo 1-3. Iyurnosyo ti agsubli tapno pagsaritaanyo dagiti sungbat dagiti saludsod iti parapo 3.

◼ No Kasano nga Iyurnos ti Panagsubli:

Iti ngudo ti damo a panagadal, iyurnosyo ti agsubli tapno ituloyyo ti saritaan. Mabalinyo a kunaen: “Iti sumagmamano laeng a minuto, naadaltayo no ania ti isursuro ti Biblia maipapan iti daytoy a napateg a suheto. Inton maminsan, mabalin a pagsaritaantayto ti [mangibati iti maysa a saludsod nga usigenyonto]. Mabalinko kadi ti sumarungkar iti kastoy met la nga oras inton umay a lawas?”

Bayat nga umad-adanitayo iti naituding a tiempo ni Jehova, agtultuloy nga ipapaayna dagiti kasapulantayo para iti trabahotayo. (Mat. 28:19, 20; 2 Tim. 3:17) Usarentayo koma a nalaing daytoy naisangsangayan a baro a katulongan a pangirugi iti panagadal iti Biblia.

No Kasano nga Itukon ti Libro nga Isursuro ti Biblia

Naglaon daytoy a suplemento iti nagduduma a singasing no kasano nga itukon ti libro nga Isursuro ti Biblia. Tapno ad-adda nga epektibo, iyebkasyo dagita iti bukodyo a sasao, ibagayyo ti pamay-anyo kadagiti tattao iti teritoriayo, ken kabesaduenyo dagiti espesipiko a punto iti libro. Mabalinyo met nga usaren ti dadduma pay a presentasion a praktikal iti teritoriayo.—Kitaenyo ti Enero 2005 a Ti Ministeriotayo iti Pagarian, p. 8.

Armagedon

◼ “No mangngeg dagiti tattao ti sao nga ‘Armagedon,’ sapasap a pannakadadael ti adda iti panunot ti adu. Masdaawkayo kadi a makaammo a ti Armagedon ket kinapudnona maysa a banag a rumbeng a siraragsak a seggaan? [Palubosanyo a sumungbat sa basaenyo ti Apocalipsis 16:14, 16.] Imutektekanyo daytoy a komento no anianto ti kasasaad kalpasan ti Armagedon.” Ukagenyo ti panid 82-4, sa basaenyo ti parapo 21.

Biblia

◼ “Sao ti Dios ti masansan nga awag dagiti tattao iti Biblia. Pinampanunotyo kadin no kasano a ti libro nga insurat dagiti tattao ket maitutop a maawagan iti Sao ti Dios? [Palubosanyo a sumungbat sa basaenyo ti 2 Pedro 1:21 ken ti parapo 5 iti panid 19-20.] Ipaay daytoy a publikasion dagiti sungbat ti Biblia kadagitoy a saludsod.” Ipakitayo dagiti saludsod iti panid 6.

◼ “Ad-adu nga impormasion ti magun-odan dagiti tattao ita ngem iti napalabas. Ngem sadino ti pagarupyo a pakasarakantayo iti nasayaat a balakad a makatulong kadatayo nga agbiag a naragsak ken naballigi? [Palubosanyo a sumungbat sa basaenyo ti 2 Timoteo 3:16, 17 ken ti parapo 12 iti panid 23.] Ilawlawag daytoy a publikasion no kasano a makapagbiagtayo iti wagas a makaay-ayo iti Dios ken makagunggona kadatayo.” Ipakitayo ti tsart ken ti ladawan iti panid 122-3.

Ipapatay/Panagungar

◼ “Adu ti agsalsaludsod no ania a talaga ti mapasamak no matay ti maysa a tao. Iti panagkunayo, posible kadi a maammuantayo dayta? [Palubosanyo a sumungbat sa basaenyo ti Eclesiastes 9:5 ken ti parapo 5-6 iti panid 58-9.] Ilawlawag met daytoy a libro no ania ti kaipapananna kadagiti natay ti kari ti Biblia maipapan iti panagungar.” Ipakitayo ti ladawan iti panid 75.

◼ “No adda matay nga ing-ingungotentayo, natural laeng a kayattayo a makita manen dayta a tao, saan kadi? [Palubosanyo a sumungbat.] Adu ti naliwliwa iti kari ti Biblia maipapan iti panagungar. [Basaenyo ti Juan 5:28, 29 ken ti parapo 16-17 iti panid 72.] Sungbatan met daytoy a kapitulo dagitoy a saludsod.” Ipakitayo dagiti pangiruangan a saludsod iti panid 66.

Biag nga Agnanayon

◼ “Tarigagayan ti kaaduan a tattao ti nasayaat a salun-at ken atiddog a biag. Ngem no posible dayta, kayatyo kadi ti agbiag nga agnanayon? [Palubosanyo a sumungbat sa basaenyo ti Apocalipsis 21:3, 4 ken ti parapo 17 iti panid 53-4.] Salaysayen daytoy a libro no kasano a magun-odantayo ti biag nga agnanayon ken no anianto ti kasasaad no matungpal dayta a kari.”

Pamilia

◼ “Interesadotayo amin a maaddaan iti naragsak a biag ti pamilia, saan kadi? [Palubosanyo a sumungbat.] Adda ibagbaga ti Biblia a mabalin nga aramiden ti tunggal kameng ti pamilia tapno agbalin a naragsak ti pamilia—tuladen ti panagayat ti Dios.” Basaenyo ti Efeso 5:1, 2 ken ti parapo 4 iti panid 135.

Pagtaengan

◼ “Iti adu a lugar, ad-adda a narigat ita ti agsapul iti makapnek ngem nalaka a pagtaengan. Iti panagkunayo, dumtengto ngata ti aldaw nga adda umdas a pagtaengan para iti tunggal maysa? [Palubosanyo a sumungbat sa basaenyo ti Isaias 65:21, 22 ken ti parapo 20 iti panid 34.] Ilawlawag daytoy a publikasion no kasano a matungpal daytoy a kari ti Dios.”

Jehova a Dios

◼ “Adu a tattao a mamati iti Dios ti agtarigagay nga agbalin a nasingsinged kenkuana. Ammoyo kadi nga aw-awisennatayo ti Biblia nga umadani iti Dios? [Palubosanyo a sumungbat sa basaenyo ti Santiago 4:8a ken ti parapo 20 iti panid 16.] Naisagana daytoy a publikasion a tumulong kadagiti tattao a makasursuro iti ad-adu pay maipapan iti Dios iti mismo a Bibliada.” Ipakitayo dagiti pangiruangan a saludsod iti panid 8.

◼ “Ikarkararag ti adu a tattao a masantipikar wenno maidaydayaw koma ti nagan ti Dios. Pinampanunotyo kadin no ania dayta a nagan? [Palubosanyo a sumungbat sa basaenyo ti Salmo 83:18 ken ti parapo 2-3 iti panid 195.] Ilawlawag daytoy a libro no ania a talaga ti isursuro ti Biblia maipapan ken ni Jehova a Dios ken ti panggepna iti sangatauan.”

Jesu-Kristo

◼ “Iti intero a daga, nangnangngegen dagiti tattao ti maipapan ken ni Jesu-Kristo. Adda agkuna nga isu ket maysa laeng a naisangsangayan a tao. Dadduma ti agdaydayaw kenkuana kas Dios a Mannakabalin-amin. Iti panagkunayo, napateg ngata no ania ti patpatientayo maipapan ken ni Jesu-Kristo?” [Palubosanyo a sumungbat sa basaenyo ti Juan 17:3 ken ti parapo 3 iti panid 37-8.] Iturongyo ti atension ti bumalay kadagiti pangiruangan a saludsod iti babaen ti paulo ti kapitulo.

Kararag

◼ “Pinampanunotyo kadin no kasano a sungbatan ti Dios dagiti kararag? [Palubosanyo a sumungbat sa basaenyo ti 1 Juan 5:14, 15 ken ti parapo 16-18 iti panid 170-2.] Ilawlawag met daytoy a kapitulo no apay a rumbeng nga agkararagtayo iti Dios ken no ania ti masapul nga aramidentayo tapno denggenna ti kararagtayo.”

Relihion

◼ “Adu a tattao ti mangrugrugin a mangmatmat kadagiti relihion ditoy lubong kas gubuayan dagiti parikut ti sangatauan imbes a solusion. Iti panagkunayo, iturturong kadi ti relihion dagiti tattao iti umiso a direksion? [Palubosanyo a sumungbat sa basaenyo ti Mateo 7:13, 14 ken ti parapo 5 iti panid 145-6.] Usigen daytoy a kapitulo ti innem a punto a mangilasin iti panagdayaw nga anamongan ti Dios.” Ipakitayo ti listaan iti panid 147.

Didigra/Panagsagaba

◼ “No dumteng ti didigra, adu ti agduadua no talaga met laeng a maseknan ti Dios kadagiti tattao ken no makitkitana ti panagsagsagabada. Pinampanunotyo kadin ti maipapan iti dayta? [Palubosanyo a sumungbat sa basaenyo ti 1 Pedro 5:7 ken ti parapo 11 iti panid 11-2.] Ilawlawag daytoy a publikasion no kasano nga ikkaten ti Dios a naan-anay ti panagsagaba ti sangatauan.” Ipakitayo dagiti pangiruangan a saludsod iti panid 106.

Gubat/Talna

◼ “Iti sadinoman, tartarigagayan dagiti tattao ti talna. Iti panagkunayo, tagtagainep laeng kadi ti talna ditoy daga? [Palubosanyo a sumungbat sa basaenyo ti Salmo 46:8, 9.] Salaysayen daytoy a publikasion no kasano a tungpalen ti Dios ti panggepna ken no kasano nga iyegna ti sangalubongan a talna.” Ipakitayo ti ladawan iti panid 35 sa usigenyo ti parapo 17-21 iti panid 34-6.

[Kahon iti panid 5]

No Ania ti Ibaga Maipapan iti Donasion

“No kayatyo ti mangted iti bassit a donasion ita maipaay iti sangalubongan a trabahomi, maragsakanak a mangawat iti dayta.”

“Nupay maituktukon nga awanan bayad ti literaturami, awatenmi ti aniaman a kalkalainganna a donasion para iti sangalubongan a trabahomi.”

“Mabalin a maisaludsodyo no kasanomi a maitungtungpal daytoy a trabaho. Masupsuportaran ti sangalubongan a trabahomi babaen kadagiti boluntario a donasion. No kayatyo ti mangted iti bassit a donasion ita, maragsakanak a mangawat iti dayta.”

(1) Saludsod, (2) Teksto, ken (3) Kapitulo

Ti simple a pamay-an iti panangitukon iti Ania a Talaga ti Isursuro ti Biblia? ket (1) mangibangon iti saludsod a mangibuksil iti kapanunotan ti bumalay, (2) mangbasa iti maitutop a teksto, ken (3) iturong ti atension ti bumalay iti kapitulo ti libro a mangsalsalaysay iti dayta a suheto babaen ti panangbasa kadagiti pangiruangan a saludsod iti baba ti paulo ti kapitulo. No interesado ti bumalay, mabalinyo nga idemostra ti panagadal iti Biblia nga usarenyo dagiti panglukat a parapo dayta a kapitulo. Mabalin nga usaren daytoy a pamay-an no mangirugi iti panagadal iti damo a pannakisarita wenno no agsarungkar.

◼ “Iti panagkunayo, posible ngata a dagiti nanumo a tattao maam-ammoda ti mannakabalin-amin a Namarsua, kas nadakamat ditoy Biblia?” Basaenyo ti Aramid 17:26, 27 sa palubosanyo a sumungbat. Kalpasanna, itampokyo ti kapitulo 1.

◼ “Gapu kadagiti parikut a sangsanguentayo ita, panagkunayo posible ngata a mapasarantay pay ti liwliwa ken namnama a nadakamat ditoy?” Basaenyo ti Roma 15:4 sa palubosanyo a sumungbat. Kalpasanna, itampokyo ti kapitulo 2.

◼ “No adda pannakabalinyo, aramidenyo kadi dagitoy a panagbalbaliw?” Basaenyo ti Apocalipsis 21:4 sa palubosanyo a sumungbat. Kalpasanna, itampokyo ti kapitulo 3.

◼ “Iti panagkunayo, matagiragsakto kadi dagiti annaktayo ti kasasaad a nailadawan iti daytoy nagkauna a kanta?” Basaenyo ti Salmo 37:10, 11 sa palubosanyo a sumungbat. Kalpasanna, itampokyo ti kapitulo 3.

◼ “Iti panagkunayo, dumtengto kadi ti panawen a matungpal dagitoy a sasao?” Basaenyo ti Isaias 33:24 sa palubosanyo a sumungbat. Kalpasanna, itampokyo ti kapitulo 3.

◼ “Pinampanunotyo kadin no ammo dagiti natay no ania ti ar-aramiden dagiti sibibiag?” Palubosanyo a sumungbat. Kalpasanna, basaenyo ti Eclesiastes 9:5 ken itampokyo ti kapitulo 6.

◼ “Iti panagkunayo, posible ngata a makitatayto manen dagiti pimmusay nga ing-ingungotentayo, kas kinuna ni Jesus kadagitoy a bersikulo?” Basaenyo ti Juan 5:28, 29 sa palubosanyo a sumungbat. Kalpasanna, itampokyo ti kapitulo 7.

◼ “Iti panagkunayo, kasano a maaramid ti pagayatan ti Dios ditoy daga a kas idiay langit, kas nadakamat iti daytoy nalatak a kararag?” Basaenyo ti Mateo 6:9, 10 sa palubosanyo a sumungbat. Kalpasanna, itampokyo ti kapitulo 8.

◼ “Iti panagkunayo, agbibiagtayo kadin iti panawen a nailadawan iti daytoy a padto?” Basaenyo ti 2 Timoteo 3:1-4 sa palubosanyo a sumungbat. Kalpasanna, itampokyo ti kapitulo 9.

◼ “Adu a tattao ti masmasdaaw no apay a kasla kumarkaro dagiti parikut ti sangatauan. Inusigyo kadin ti kuna daytoy a bersikulo a kas makagapu?” Basaenyo ti Apocalipsis 12:9 sa palubosanyo a sumungbat. Kalpasanna, itampokyo ti kapitulo 10.

◼ “Kayatyo kadi a maammuan ti sungbat ti saludsod a kas iti daytoy?” Basaenyo ti Job 21:7 sa palubosanyo a sumungbat. Kalpasanna, itampokyo ti kapitulo 11.

◼ “Iti panagkunayo, makatulong kadi kadagiti tattao no iyaplikarda daytoy a balakad iti Biblia tapno masagrapda ti naragsak a biag ti pamilia?” Basaenyo ti Efeso 5:33 sa palubosanyo a sumungbat. Kalpasanna, itampokyo ti kapitulo 14.

Mabalin nga ireport ti panagadal iti Biblia no naminduan a naikondukta kalpasan ti pannakaidemostrana ken no adda pamatianyo nga agtultuloy ti panagadal.