Adda Maitedtayo ken Jehova
1 Ammoyo kadi nga adda maited dagiti tattao iti Dios? Indaton ni Abel kenni Jehova ti sumagmamano kadagiti napapateg a dinguenna. Kasta met laeng ti inaramid da Noe ken Job. (Gen. 4:4; 8:20; Job 1:5) Pudno a dagiti kasta a daton saanda a pinabaknang ti Namarsua yantangay kukuana ti amin a banag. Ngem dagita a daton impakitada no kasano kauneg ti panagayat dagidiay a matalek a lallaki iti Dios. Iti kaaldawantayo, mabalintayo met nga usaren ti tiempo, pigsa, ken sanikuatayo kas “sakripisio ti panagdaydayaw” ken Jehova.—Heb. 13:15.
2 Tiempo: Makomendaran no ‘gatangentayo’ ti tiempo manipud kadagiti saan unay a napateg a bambanag tapno naan-anay a makiramantayo iti ministerio. (Efe. 5:15, 16) Nalabit mabalintay a baliwan ti eskediultayo tapno makapagserbitayo kas auxiliary pioneer iti maysa wenno ad-adu pay a bulan iti tunggal tawen. Mabalin a mangbusbostayo iti ad-adu pay nga oras iti ministerio. No nayonantayo iti 30 minuto ti tiempo a busbosentayo iti ministerio iti tunggal lawas, saan a bumaba iti dua nga oras ti mainayon iti binulan a reporttayo.
3 Pigsa: Tapno addaantayo iti umdas a pigsa nga usarentayo iti ministerio, masapul a liklikantayo dagiti paglinglingayan ken trabaho a makabannog unay nga uray la saantayon a maipaay ken Jehova ti amin a kabaelantayo. Saan met koma nga adu unay ti pakadanagantayo, a mangikkat iti ragsak ken mangibus iti pigsatayo nga agserbi ken Jehova. (Prov. 12:25) Uray no adda panggapuantayo nga agdanag, nasaysayaat nga amang no ‘ipalladawtayo ti dadagsentayo ken Jehova’!—Sal. 55:22; Fil. 4:6, 7.
4 Sanikua: Mabalintay met nga usaren dagiti sanikuatayo maipaay iti trabaho a panangasaba. Indagadag ni Pablo kadagiti padana a Kristiano a kanayon nga adda koma ti ‘ilasinda’ para kadagidiay agkasapulan. (1 Cor. 16:1, 2) Umasping iti dayta, mabalintay met ti mangilasin iti kuarta nga idonartayo agpaay kadagiti kasapulan ti kongregasion kasta met iti sangalubongan a trabaho. Apresiaren ni Jehova ti aniaman a maitedtayo, uray kasano kabassit, no la ket naimpusuan ti panangtedtayo.—Luc. 21:1-4.
5 Nakaparparabur ni Jehova kadatayo. (Sant. 1:17) Maipakitatay ti panagyamantayo babaen ti sibubulos a panangusartayo iti tiempo, pigsa, ken dadduma pay a sanikuatayo nga agserbi kenkuana. Maay-ayo ni Jehova no aramidentayo dayta agsipud ta “ti Dios ayatenna ti naragsak a manangited.”—2 Cor. 9:7.