Kasanotay a Matulongan Dagidiay Tumabuno iti Memorial?

1. Ania a nabileg a pammaneknek ti maipaay inton Marso 22, 2008?

¹ Inton Marso 22, 2008, riniwriw a tattao iti intero a lubong ti maipaayan iti nabileg a pammaneknek. Dagidiay tumabuno iti Memorial mangngegdanto ti maipapan iti naindaklan nga ayat ni Jehova iti panangtedna iti subbot nga agpaay iti sangatauan. (Juan 3:16) Maammuandanto ti maipapan iti Pagarian ken no kasano nga usaren dayta ni Jehova a mangibanag iti panggepna iti intero a daga. (Mat. 6:9, 10) Makitadanto a mismo ti ayat ken panagkaykaysa dagiti adipen ti Dios ken matagiragsakda ti nabara a panangsangailitayo.—Sal. 133:1.

2. Kasanotay a matulongan dagidiay iyad-adalantayo a timmabuno iti Memorial?

² Dagiti Mayad-adalan iti Biblia: Ti dadduma kadagiti tumabuno ket dagidiay nabiit pay a makipagad-adal kadatayo iti Biblia. Iyam-ammoyo ida kadagiti kakabsat. Ilawlawagyo ti maipapan kadagiti linawas a gimong, ken ipasiaryo ida iti apagbiit iti Kingdom Hall. Kabayatan ti palawag, iparegta ti ispiker kadagiti mayad-adalan iti Biblia nga itultuloyda ti rumang-ay iti naespirituan. Mabalinyo nga adawen ti imbaga ti ispiker kas pangibatayan iti panangparegtayo kadagiti iyad-adalanyo.

3. Kasanotay a maparegta dagidiay di aktibo a timmabuno iti Memorial?

³ Dagiti Di Aktibo: Karaman kadagiti tumabuno dagiti di aktibo nga agibumbunannag. Abrasaenyo ida a sibabara. Liklikanyo ti mangyimtuod kadagiti personal a saludsod wenno mangisawang iti aniaman a mabalin a mangpabain kadakuada. Di agbayag kalpasan ti Memorial, dagiti panglakayen sarungkaranda dagiti di aktibo a timmabuno iti Memorial, komendaranda ida gapu iti panangikagumaanda a timmabuno, ken naimpusuan nga awisenda ida iti sumaganad a gimong ti kongregasion.

4. Kasano a matulongan ti tunggal maysa kadatayo dagiti bisita?

⁴ Dagiti Bisita: Ti dadduma kadagiti tumabuno ket mabalin a dagiti am-ammo wenno kameng ti pamiliatayo nga inawistayo a mismo. Nalabit a tumabuno met dagidiay naikkan iti imbitasion kabayatan ti espesial a kampania. Am-ammuen ken abrasaenyo dagiti kabbaro a rupa. Baka saanda pay a napadasan ti timmabuno kadagiti gimongtayo. Iti pannakitungtongyo kadakuada, mabalinyo a damagen no kasano a makasaritayonto manen ida. No sarungkaran wenno awaganyo ida iti telepono sumagmamano nga aldaw kalpasan ti Memorial, mabalinyo a paregtaen ida nga agsursuro iti ad-adu pay ken itukonyo ti panangyadal iti Biblia.

5. Ania ti mabalintay nga ibaga tapno makairugitayo iti panangyadal iti Biblia?

⁵ Ti impormasion iti palawag ti Memorial ket mabalin nga usaren kas pangiruangan iti libro nga Isursuro ti Biblia inton sumarungkarkayo. Kas pagarigan, basaen ti ispiker ti Isaias 65:21-23. Inton sumarungkarkayo, mabalinyo a dakamaten ti palawag sa kunaenyo, “Kayatko nga ipakita kenka ti dadduma pay a bendision nga inyeg ti subbot.” Kalpasanna, usigenyo ti panid 4-5 ti libro nga Isursuro ti Biblia. Wenno saan, mabalinyo a kunaen, “Adu ti agsalsaludsod no kaanonto a matungpal ti padto ni Isaias.” Kalpasanna, usigenyo ti kapitulo 9, parapo 1-3. Ti sabali pay a pamay-an ti panangitukon iti panangyadal iti Biblia ket ti panangdakamat iti imbaga ti ispiker sa itukonyo ti libro nga Isursuro ti Biblia ken idemostrayo no kasano nga adalen dayta.

6. Ania a gundaway ti silulukat kadatayo bayat a tungpalentayo ti bilin ni Jesus a laglagipentayo ti ipapatayna?

⁶ Sapay koma ta alerto ti tunggal maysa kadatayo a mangbirok kadagiti gundaway a mangtulong kadagiti mayad-adalan iti Biblia, di aktibo nga agibumbunannag, ken bisita a tumabuno iti Memorial. (Luc. 22:19) Sigurado a bendisionan ni Jehova ti naganetget a pannakiramantayo nga agserbi iti Pagarian.

No Ania ti Ibagayo Maipapan Kadagiti Magasin

Ti Pagwanawanan Mar. 1

“Inaldaw a makadamdamagtayo kadagiti agsagsagaba, agsaksakit, ken matmatay. Napampanunotyo kadin no malasatantayto amin dagitoy? [Palubosanyo a sumungbat.] Daytoy a teksto iti Biblia ket nangted iti namnama kadagiti riniwriw a tattao. [Basaenyo ti Juan 3:16.] Napauluan daytoy a magasin iti ‘No Kasano a Maisalakannaka ti Ipapatay ni Jesus.’”

Agriingkayo! Mar.

“Iti panagkunayo, awan kadi ti pagdaksan dagiti an-anito, wenno napeggad dagita? [Palubosanyo a sumungbat.] Kastoy ti makapainteres a komento ti Biblia. [Basaenyo ti Isaias 65:11.] Ilawlawag daytoy nga artikulo no ti an-anito ket maitunos iti isursuro ti Biblia.” Itampokyo ti artikulo a mangrugi iti panid 10.

Ti Pagwanawanan Abr. 1

“Kayatyo kadi a makita ti kaitungpalan daytoy a padto? [Basaenyo ti Isaias 2:4 sa palubosanyo a sumungbat.] Imutektekanyo ta makibiangto ti Dios kadagiti aramid ti tao ket ‘ilintegnanto ti bambanag.’ Sigun iti Biblia, addanto iwayat ti Dios a gubat a maaw-awagan iti Armagedon a mamagpatingga kadagiti amin a gubat. Ilawlawag daytoy a magasin no ania ti Armagedon ken no apay a padaanantayo dayta.”

Agriingkayo! Abr.

“Umanamongkayo kadi nga agbibiagtayon iti tiempo a nailadawan ditoy? [Basaenyo ti 2 Timoteo 3:1-4 sa palubosanyo a sumungbat.] Adda naimbag a rasontayo nga aginteres iti maudi nga al-aldaw gapu ta ipasimudaag dagita nga adda naimbag a bambanag nga agur-uray para iti daga. Daytoy a magasin ti mangilawlawag iti dayta.”