“Umayka Agbalinka a Pasurotko”
1. Kadagiti sumaganad a bulan, ania nga oportunidad ti ipaay kadatayo ti Panagadal ti Kongregasion iti Biblia?
1 Ti uppat a salaysay ti Ebanghelio mainaig iti biag ni Jesus ditoy daga ipaayannatayo iti detalyado nga impormasion maipapan iti Anak ti Dios. Yantangay “dagiti addangna” ket masapul a ‘suroten a sisisinged’ dagiti Kristiano, kayattayo ti agsagana ken dumngeg a naimbag bayat nga adalentayo ti libro nga “Umayka Agbalinka a Pasurotko” iti Panagadal ti Kongregasion iti Biblia a mangrugi inton lawas ti Marso 1. (1 Ped. 2:21; Mar. 10:21) Masapul nga usigentayo a naimbag dagiti aspeto iti biag ni Jesus a mangpabileg kadatayo iti ministerio.
2. Kasanotayo a magunggonaan iti ulidan ni Jesus mainaig iti panagibtur?
2 Ti Ulidan nga Impaay ni Jesus: Iti panangasabayo iti binalaybalay, adda kadi nakasaritayon a negatibo ti reaksionna? No naipasangotayon iti kasta a reaksion, mapaneknekantayo nga umiso ti kinuna ni Jesus: “No indadanesdak, idadanesdakayto met.” (Juan 15:20) Pudno a saan nga amin a negatibo a reaksion ket maikuna a panangidadanes. Laglagipentayo a ti rag-o a naikabil iti sanguanan ni Jesus ti nakatulong kenkuana a mangibtur iti amin a kita ti pakasuotan. Mabalintayo met nga ipamaysa iti panunottayo ti panangay-ayo ken ni Jehova ken iti gunggona nga ipaayna gapu iti kinamatalektayo. Daytoy ti tumulong kadatayo a saan a ‘mabannog ken agkapuy kadagiti kararuatayo.’ (Heb. 12:2, 3; Prov. 27:11) Bayat nga itultuloytayo nga itungpal ti ministeriotayo, manamnamatayo met a tulongannatayo ni Kristo Jesus.—Mat. 28:20.
3. Kasanotayo a matulad ti panangmatmat ni Jesus iti ministerio?
3 “Naibaonak Maigapu iti Daytoy”: Ti panangikasaba iti Pagarian ti kapatgan iti biag ni Jesus. (Luc. 4:43) Impamaysana ti ministeriona. Imbilangna dayta kas naganat a trabaho isu a kanayon a mangbirbirok iti gundaway a mangisarsarita iti maipapan iti Pagarian. Yantangay pasurotnatayo ni Jesus, ania ti masursurotayo kenkuana? Bayat ti panangaramidtayo kadagiti inaldaw nga aktibidadtayo, adda kadi tattao a mabalintayo nga iranudan iti naimbag a damag? Sapay koma ta ti ayattayo ken Kristo tignayennatayo a mangisaknap iti naimbag a damag aginggat’ mabalin!—2 Cor. 5:14.
4. Kadagiti ania a pamay-an a maparang-aytayo ti kalidad ti ministeriotayo?
4 “Awan Pay a Pulos Sabali a Tao a Nagsao iti Kastoy”: Nagsiddaaw dagiti dumdumngeg ken Jesus gapu iti wagas ti panangisurona. (Juan 7:46; Mat. 7:28, 29) Ania ti nakaidumaanna kadagiti dadduma a mannursuro? Impatpategna dagiti kinapudno nga insurona, inayatna dagiti tattao a sinuruanna, ken nagusar iti nadumaduma a pamay-an ti panangisuro. Sumayaat ti kalidad ti ministeriotayo no tuladentayo ti Naindaklan a Mannursuro.—Luc. 6:40.
5. Ania ti ikagumaantayo nga aramiden bayat ti panangadaltayo iti “Umayka Agbalinka a Pasurotko”?
5 Dagitoy ti sumagmamano kadagiti napateg a bambanag a masursurotayo maipapan iti biag ni Jesus. Ania pay dagiti napateg a masursurotayo? Iti panangusigtayo iti biag ni Jesus bayat ti Panagadal ti Kongregasion iti Biblia, ikagumaantayo nga ‘ammuen ti ayat ni Kristo’ babaen ti panangtuladtayo iti sasao ken aramidna.—Efe. 3:19.