Apay a Sukimatem ti Biblia?
Kabesadom kadi ti linaon ti Biblia? Daytoy a naidumduma a libro ti kasasaknapan pay laeng a naiwaras a libro. Napaneknekan ti tattao iti amin a kultura a ti mensahena ket gubuayan ti liwliwa ken namnama, ken epektibo dagiti balakadna agpaay iti inaldaw a panagbiag. Kaskasdi, adu ita ti awan unay ti ammoda maipapan iti Biblia. Relihiosoka man wenno saan, nalabit kayatmo a maammuan ti linaonna. Nadisenio daytoy a broshur a mangipakaammo kenka iti kangrunaan a linaon ti Biblia.
SAKBAY a basaem ti Biblia, nasayaat no ammuem ti sumagmamano a bambanag maipapan iti pannakaurnosna. Ti Biblia, a naawagan met iti Nasantuan a Kasuratan, ket buklen ti 66 a libro, manipud Genesis agingga iti Apocalipsis.
Asino ti autor ti Biblia? Makapainteres dayta a saludsod. Kinapudnona, agarup 40 a lallaki ti nangisurat iti Kasuratan iti las-ud ti agarup 1,600 a tawen. Nupay kasta, dagitoy a mannurat saanda nga ibilang ti bagbagida kas autor ti Biblia. Kastoy ti kinuna ti maysa kadagiti mannurat: “Amin a Kasuratan impaltiing ti Dios.” (2 Timoteo 3:16) Kinuna ti sabali pay a mannurat: “Ti espiritu ni Jehova ti nagsao babaen kaniak, ket ti saona adda iti dilak.” (2 Samuel 23:2) Bigbigen ngarud dagiti mannurat a ni Jehova a Dios, ti Soberano nga Agturay iti uniberso, ti Autor ti Biblia. Sigun kadagiti mannurat, kayat ti Dios a suminged kenkuana dagiti tattao.
Adda pay ti nasken nga ammuem tapno matarusam ti Biblia. Maysa laeng ti tema ti intero a Kasuratan: ti pannakaalangon ti kalintegan ti Dios a mangituray iti sangatauan babaen ti nailangitan a Pagarianna. Kadagiti sumaganad a panid, maammuam no kasano a nainaig dayta a tema iti amin a paset ti Biblia, manipud Genesis agingga iti Apocalipsis.
Bayat a sipapanunotka kadagiti nadakamat, usigem itan ti mensahe ti Biblia, ti kalalatakan a libro iti lubong.
a Nadumaduma ti panangtukoy kadagiti petsa. Iti daytoy a broshur, ti K.P. kaipapananna “Kadawyan a Panawen” ken ti K.K.P. kaipapananna “Kasakbayan ti Kadawyan a Panawen.” Makitam daytoy iti baba dagiti panid.