Umiso nga Impormasion

APAY a makaisawang ti maysa a Kristiano iti banag a saan a pudno? Mabalin nga ul-ulitenna laeng ti naalimadamadna, a dina sinigurado dagiti pudno a pasamak. Wenno dina napupuotan a nasobraanna ti imbagana ta sabali ti pannakatarusna iti material a nangalaanna. No siguraduentayo nga umiso dagiti ibagbagatayo uray kadagiti babassit a banag, makapagtalek dagiti agim-imdeng kadatayo iti kinapudno dagiti napatpateg nga aspeto ti mensahetayo.

Iti Tay-ak ti Ministerio. Gapu ta ammoda nga adu pay ti masapul nga adalenda, adu dagiti bumdeng a mangrugi a makiraman iti tay-ak ti ministerio. Ngem matakuatanda a dagus a kabaelanda ti mangasaba a sieepektibo, nupay pamunganayan laeng ti ik-ikutanda a pannakaammo iti kinapudno. Kasanoda a maaramidan daytoy? Ti tulbek isu ti panagsagana.

Sakbay a mapanka mangasaba, kabesaduem ti topiko a kayatmo a salaysayen. Saganaam dagiti mabalin nga isaludsod dagiti makasaritam. Agsukimatka kadagiti makapnek a sungbat a naibatay iti Biblia. Daytoy ti mangisagana kenka a mangted kadagiti umiso a sungbat a dika maringgoran. Mangyadalka kadi iti Biblia? Repasuem a naimbag ti adalenyo. Siguraduem a maawatam dagiti Nainkasuratan a pakaibatayan dagiti sungbat kadagiti nayimprenta a saludsod.

No ngay agsaludsod ti bumalay wenno ti katrabahuam ket saanka a nakasagana a sumungbat? No saanmo a masigurado ti sungbat, saanmo a pugpugtuan. “Ti puso daydiay nalinteg agmennamenna tapno makasungbat.” (Prov. 15:28) Mabalin a matulongannaka ti libro a Panakirinnason Manipud Kadagiti Kasuratan wenno “Dagiti Topiko ti Biblia a Pagsasaritaan.” No awananka kadagitoy, ibagam nga agsukimatka pay ket agsublikanto. No napasnek daydiay nagsaludsod, maragsakan nga aguray iti umiso a sungbat. Kinapudnona, mabalin a dayawenna ti kinapakumbabam.

Ti pannakikadua kadagiti aduan kapadasan nga agibumbunannag iti tay-ak ti ministerio matulongannaka nga agsursuro a mangaramat a siuumiso iti Sao ti Dios. Paliiwem no ania dagiti kasuratan nga usarenda ken no kasano ti panangilawlawagda kadagita. No adda dagiti singasingda wenno no korehirendaka, sipapakumbaba nga awatem. Nabenepisiaran ti naregta nga adalan a ni Apolos iti tulong dagiti dadduma. Dineskribir ni Lucas ni Apolos a kas “nalaing nga agbitla,” “nalaing iti Kasuratan,” “nasged iti espiritu,” lalaki nga ‘agsasao ken agsursuro a siuumiso iti bambanag maipapan ken Jesus.’ Ngem kurang ti pannakaawatna. Idi nadlaw daytoy da Priscila ken Aquila, “inkuyogda ket ad-adda a siuumiso nga imbinsabinsada kenkuana ti dalan ti Dios.”​—Ara. 18:24-28.

“Kumkumpet a Sititibker iti Matalek a Sao.” Iyanninaw koma dagiti palawagtayo kadagiti gimong ti nauneg a panagraem iti akem ti kongregasion a kas “adigi ken sadiri ti kinapudno.” (1 Tim. 3:15) Tapno maitandudo ti kinapudno, nasken a matarusantayo ti kababagas dagiti kasuratan a panggeptayo nga usaren kadagiti palawag. Amirisem ti konteksto ken kaipapananda.

Mabalin nga isarsaritadanto ti ibagam iti gimong ti kongregasion. Siempre, “maitibkoltayo amin iti adu a daras.” (Sant. 3:2) Ngem mabenepisiaranka no patanorem dagiti ugali a makatulong iti panagsao iti umiso. Adu a lallaki a nagpasalista iti Teokratiko nga Eskuelaan ti Panagministro ti agbalinto a papanglakayen inton agangay. “Ad-adu ngem iti gagangay” ti makalikaguman kadagiti nakaitalkan ti kasta a responsabilidad. (Luc. 12:48) No awanan annad a makaited ti maysa a panglakayen iti di umiso a balakad nga agbanag kadagiti serioso a parikut kadagiti kameng ti kongregasion, mabalin a di maay-ayo ti Dios iti dayta a panglakayen. (Mat. 12:36, 37) Gapuna, ti kabsat a kualipikado nga agbalin a panglakayen ket masapul a “kumkumpet a sititibker iti matalek a sao no maipapan iti arte ti panangisurona.”​—Tito 1:9.

Annadam a ti panangilawlawagmo ket maitunos iti “pagtuladan iti makapasalun-at a sasao” a nabatad iti pakadagupan ti Nainkasuratan a kinapudno. (2 Tim. 1:13) Saan koma a daytoy ti mamagamak kenka. Nalabit masapul a turposem pay a basaen ti intero a Biblia. Itultuloymo nga ikagumaan nga aramiden dayta. Ngem kabayatanna, panunotem no kasano a makatulong kenka dagiti sumaganad a singasing a manganag iti material a pampanunotem nga usaren iti panangisurom.

Umuna, isaludsodmo iti bagim: ‘Maitunos aya daytoy a material iti datin a nasursurok iti Biblia? Iturongna aya ken Jehova dagiti dumdumngeg kaniak, wenno itan-okna ti nailubongan a sirib, a paregtaenna dagiti tattao nga agpaiwanwan iti dayta?’ Kinuna ni Jesus: “Ti saom ket kinapudno.” (Juan 17:17; Deut. 13:1-5; 1 Cor. 1:19-21) Sumaganad, usarem a naimbag dagiti katulongan iti panagadal nga impaay ti klase matalek ken masirib nga adipen. Tulongannaka dagitoy a mangtarus a siuumiso kadagiti kasuratan ken mangyaplikar kadagita iti natimbeng ken nainkalintegan a pamay-an. No ibasarmo dagiti palawagmo iti “pagtuladan iti makapasalun-at a sasao” ken agpannurayka iti kalasugan nga us-usaren ni Jehova no ilawlawag ken iyaplikarmo dagiti kasuratan, umiso ti impormasion a mayallatiwmo.

Panangsierto iti Kinaumiso ti Impormasion. Makatulong dagiti kaudian a damdamag, naadaw a sasao, ken kapkapadasan no iyilustrar ken iyaplikarmo dagiti dadduma a punto. Kasanom a masigurado no husto dagita? Dagiti mapagtalkan a gubuayan ti pangalaam kadagiti kasta nga impormasion. Laglagipem a siertuen a kabbaro ti impormasion. Agpaso dagiti estadistika; nakadardaras a masandian dagiti natakuatan ti siensia; ket bayat nga umad-adu ti matarusan dagiti tattao maipapan iti historia ken kadagiti nagkauna a lenguahe, masapul a mapabaro dagiti konklusion a naibasar iti dati nga ammoda. Agannadka unay no pampanunotem ti agusar iti impormasion nga aggapu kadagiti diario, telebision, radio, electronic mail, wenno iti Internet. Ibalakad ti Proverbio 14:15: “Ti asinoman nga awanan kapadasan maaddaan pammati iti tunggal sao, ngem daydiay nasaldet utobenna dagiti addangna.” Isaludsodmo iti bagim: ‘Agdinamag aya nga umiso dagiti impormasion nga adda iti dayta? Mabalin kadi a masierto ti impormasion iti sabali a gubuayan?’ No pagduaduaam ti kinapudno ti impormasion, saanmo nga us-usaren.

Malaksid iti panangsierto iti kinamapagtalkan ti pangalaam iti impormasion, panunotem a naimbag no kasano nga usarem ti impormasion. Siguraduem a ti panangusarmo kadagiti naadaw a sasao ken estadistika ket maitunos iti konteksto a nakaadawanda. No ipaganetgetmo ti puntom, annadam a ti “sumagmamano a tattao” di agbalin a “kaaduan a tattao,” ti “adu a tattao” di agbalin nga “isuamin a tattao,” ket ti “no dadduma” di agbalin a “kanayon.” Pagduaduaanda ti kinamapagtalkam no agsursurok ti ibagam wenno aglablabes ti panangipadamagmo maipapan iti numero, kawadwad, wenno kaserioso ti kasasaad.

No umiso a kanayon ti ibagam, maaddaanka iti reputasion a kas maysa a tao a mangraraem iti kinapudno. Pakaidayawan daytoy dagiti Saksi ni Jehova kas grupo. Napatpateg pay, maidaydayaw ni “Jehova a Dios ti kinapudno.”​—Sal. 31:5.