Surat Manipud iti Bagi a Manarawidwid

Patgenmi nga Agibumbunannag iti Pagarian:

Panunotem a maysaka kadagiti apostol a nakatakder idiay Bantay Dagiti Olibo. Nagparang ni Jesus iti imatangyo. Sakbay nga umuli idiay langit, kinunana: “Umawatkayto iti pannakabalin inton umay kadakayo ti nasantuan nga espiritu, ket dakayonto dagiti saksik idiay Jerusalem, iti intero a Judea ken Samaria, ken agingga iti kaadaywan a paset ti daga.” (Ara. 1:8) Ania ti riknam iti dayta?

Nalabit mariribukanka iti kinadakkel dayta a trabaho. Baka panunotem, ‘Kasanokami ngata a makaipaay iti panangsaksi “agingga iti kaadaywan a paset ti daga” ket manmanokami laeng?’ Mabalin a malagipmo ti pakdaar nga impaay ni Jesus iti rabii sakbay ti ipapatayna: “Saan a natantan-ok ti adipen ngem ti apona. No indadanesdak, idadanesdakayto met; no tinungpalda ti saok, tungpalendanto met ti saoyo. Ngem aramidendanto amin dagitoy kadakayo maigapu iti naganko, ta saanda nga am-ammo Daydiay nangibaon kaniak.” (Juan 15:20, 21) Bayat nga ut-utobem dagitoy a sasao, nalabit maisaludsodmo, ‘Kasanokami a makaipaay iti naan-anay a panangsaksi iti sidong ti kasta nga ibubusor ken pannakaidadanes?’

Maipaspasangotayo ita kadagiti kasta met laeng a saludsod. Kas Saksi ni Jehova, addaantayo met iti annongen a naan-anay a mangasaba “kadagiti tattao iti amin a nasion” agingga iti kaadaywan a paset ti daga. (Mat. 28:19, 20) Kasano a maibanag daytoy a trabaho nangruna ta adda naipadto nga ibubusor?

Ti Aramid Dagiti Apostol ikkannatayo iti makapabileg a salaysay no kasano a dagiti apostol ken dagiti padada a Kristiano idi umuna a siglo C.E., naitungpalda ti annongenda babaen ti tulong ni Jehova. Daytoy a publikasion a basbasaem ket nairanta a tumulong kenka a mangusig iti dayta a salaysay ken mangipapuso kadagiti dramatiko a pasamak. Masdaawkanto a makaammo kadagiti pagpapadaan dagiti adipen ti Dios idi umuna a siglo ken iti agdama. Makitamto a dagitoy a pagpapadaan ket saan laeng a mainaig iti trabahotayo no di ket iti pay wagas a pannakaorganisartayo a mangaramid iti dayta a trabaho. No utobem dagitoy a pagpapadaan, awan duadua a bumileg ti pammatim a ni Jehova a Dios agtultuloy nga iwanwanwanna ti naindagaan a paset ti organisasionna.

Namnamaen ken ikarkararagmi a ti panangusigmo iti libro nga Aramid patibkerenna ti panagtalekmo a tulongannaka ni Jehova ken saranayennaka ti bileg ti nasantuan nga espirituna. Sapay ngarud koma ta mapabilegka nga agtultuloy a mangikasaba a naan-anay iti Pagarian ti Dios ken tumulong kadagiti sabsabali a magna iti dalan nga agturong iti pannakaisalakan.—Ara. 28:23; 1 Tim. 4:16.