Kabaelam Kadi ti Makiraman iti Ministerio Kadagiti Domingo?
1. Ania ti masursurotayo iti inaramid ni Pablo ken dagiti kakaduana idiay Filipos?
1 Sabbath idi, ti aldaw a panaginana ti kaaduan a Judio idiay Filipos. Ni Pablo ken dagiti kakaduana bisbisitaenda ti siudad kabayatan ti maysa kadagiti panagdaliasatda kas misionero. No aginanada koma iti ministerioda iti dayta nga aldaw, awan ti mangbabalaw kadakuada. Nupay kasta, ammoda nga aguummong dagiti Judio iti ruar ti siudad tapno agkararag isu a ginundawayanda ti mangasaba kadakuada. Naragsakan la ketdi ni Pablo ken dagiti kakaduana idi impangag ida ni Lidia ken nabautisaran ti intero a sangakabbalayanna! (Ara. 16:13-15) Yantangay adu ita ti agin-inana iti Domingo, apay a saantayo nga usaren dayta nga aldaw a mangasaba kadakuada?
2. Ania dagiti karit a napagballigian dagiti adipen ni Jehova tapno saantayo a maparitan a mangasaba iti Domingo?
2 Pannakailaban ti Panangasaba iti Domingo: Idi 1927, naiparegta kadagiti adipen ni Jehova a mangasabada iti sumagmamano nga oras iti kada Domingo. Nagresulta dayta iti nakaro nga ibubusor. Adu ti naaresto idiay Estados Unidos gapu iti panangsalungasingda kadagiti linteg iti Sabbath, panangisturbo, ken panaglakoda nga awanan iti lisensia. Ngem saan a nagsardeng a nangasaba dagiti adipen ni Jehova. Idi dekada 1930, nangorganisarda kadagiti “divisional campaign,” kayatna a sawen, dagiti agibumbunannag kadagiti agkakabangibang a kongregasion pagtitinnulonganda a wanasen ti maysa a teritoria. Adda dagiti panawen nga idi naaresto dagiti agibumbunannag, nakaad-aduda unay isu a saan a kabaelan dagiti agtuturay a pasardengen ida. Talaga kadi nga ap-apresiarem dagiti panagsakripisio dagitoy a kakabsat tapno laeng saantayo a maparitan a mangasaba iti Domingo?
3. Apay a ti Domingo ket nasayaat nga aldaw para iti panangasaba?
3 Nagsayaat nga Aldaw ti Panangasaba: Adu a tattao ti awan trabahona iti Domingo isu nga addada iti pagtaenganda. Gagangay nga agin-inanada. Dagiti dadduma a relihioso a tattao mabalin a kayatda ti makisarita maipapan iti Dios iti dayta nga aldaw. No Domingo ti gimongtayo, mabalinen a pangasaba ti kawestayo, isu nga apay a saantayo nga iplano ti mangasaba sakbay wenno kalpasan ti gimong? No kasapulan, agbalonkayo iti simple a taraon.
4. Ania a rag-o ti matagiragsaktayo no mangbusbostayo iti sumagmamano nga oras iti ministerio iti Domingo?
4 No mangbusbostayo iti sumagmamano nga oras iti ministerio iti Domingo, adda latta panawentayo nga aginana. Bayat nga agin-inanatayo, makariknatayo iti pannakapnek gapu ta nakiramantayo iti sagrado a panagserbi. (Prov. 19:23) Mabalin a maaddaantayo pay iti rag-o no makasaraktayo iti kas ken Lidia!