Mangrugi Inton Marso 17 ti Kampania a Panangyawis iti Memorial
1. Ania a kampania ti mangrugi inton Marso 17?
1 Ti tinawen a panangangaytayo iti Memorial ket agserbi a panangiwaragawag iti ipapatay ni Jesus. (1 Cor. 11:26) Gapuna, kayattayo a tumabuno dagiti tattao tapno mangngegda ti maipapan iti subbot, a siaayat nga insagut ni Jehova. (Juan 3:16) Iti daytoy a tawen, ti kampania a panangawis kadagiti tattao a tumabuno iti Memorial ket mangrugi iti Sabado, Marso 17. Magagarankayo kadin a makiraman a naan-anay?
2. Ania ti mabalintayo nga ibaga no itedtayo ti imbitasion?
2 No Ania ti Ibagatayo: Nasaysayaat no ababa ti presentasiontayo. Mabalintayo nga ibaga: “Naimbag nga aldawyo. Immaykami tapno itedmi ti imbitasion ti pamiliayo para iti nakapatpateg a tinawen nga okasion a maangay iti intero a lubong inton Abril 5. Addanto libre a palawag a naibatay iti Biblia a mangilawlawag no ania ti naaramidan ti ipapatay ni Jesus ken no ania ti ar-aramidenna itan. Naikabil iti daytoy nga imbitasion ti adres ken oras a pannakaangayna ditoy lugartayo.” Kadagiti ngudo ti lawas, saan laeng a dagiti imbitasion ti iwarastayo no di ket uray dagiti magasin, no maitutop.
3. Kasanotayo a makaawis iti adu a tattao aginggat’ mabalin?
3 Awisenyo ti Adu a Tattao Aginggat’ Mabalin: Ti kalattayo ket agawis iti adu a tattao aginggat’ mabalin. Gapuna, siguraduenyo nga awisen dagiti iyad-adalanyo iti Biblia, sarsarungkaran, kakabagian, katrabahuan, kaeskuelaan, kakaarruba, ken dadduma pay nga am-ammoyo. Dagiti panglakayen iti kongregasionyo ti mangipaay iti instruksion no kasanoyo a wanasen ti teritoriayo. Nagsayaat ti resulta ti tinawen a kampaniatayo a panangawis kadagiti tattao a tumabuno iti Memorial. Idi simrek ti maysa a babai iti nakaangayan ti Memorial idi napan a tawen, isu ket tinulongan ti attendant a mangbirok iti agibumbunannag a nangawis kenkuana. Nupay kasta, kinuna ti babai nga awan ti am-ammona sadiay ken adda laeng ti nangted kenkuana iti imbitasion iti nasapsapa a paset dayta nga aldaw.
4. Ania dagiti makagapu a regtaantayo ti makiraman iti kampania?
4 Nalabit addanto dagiti naikkanyo iti imbitasion a tumabuno iti Memorial. Tumabuno man wenno saan dagiti inawisyo, nakaipaay latta iti panangsaksi dagiti napinget a panangikagumaanyo. Dagiti imbitasion nga iwarasyo iwaragawagna a ni Jesus ket maysan a mannakabalin nga Ari. Ti naregta a pannakiramanyo ipakitana kadagiti amin nga agpalpaliiw—dagiti tattao iti teritoriayo, dagiti padayo nga agibumbunannag, ken kapatgan iti amin, ni Jehova—nga ap-apresiarenyo unay ti sagut a subbot.—Col. 3:15.