Kayat ti Dios nga agbiagtayo a naragsak ken natalna iti paraiso a daga iti agnanayon!

Ngem baka maisaludsodmo, ‘Kasano ngata a mapasamak dayta?’ Kuna ti Biblia a mapasamak dayta babaen ti Pagarian ti Dios, ken pagayatan ti Dios a maammuan ti amin a tattao ti maipapan iti dayta a Pagarian ken ti panggepna para kadatayo.​—Salmo 37:11, 29; Isaias 9:7.

Kayat ti Dios a magunggonaantayo.

Kas iti nasayaat nga ama a sipapanunot iti pagimbagan ti annakna, kayat ti nailangitan nga Amatayo nga agbalintayo a naragsak iti agnanayon. (Isaias 48:17, 18) Inkarina a “daydiay agaramid iti pagayatan ti Dios ket agtalinaed iti agnanayon.”​—1 Juan 2:17.

Kayat ti Dios a magnatayo kadagiti danana.

Kuna ti Biblia a kayat ti Namarsua kadatayo nga ‘isuronatayo maipapan kadagiti dalanna’ tapno ‘makapagnatayo kadagiti danana.’ (Isaias 2:2, 3) Nangorganisar iti “ili a maipaay iti naganna” tapno maipakaammo ti pagayatanna iti intero a daga.​—Aramid 15:14.

Kayat ti Dios nga agkaykaysatayo nga agdaydayaw kenkuana.

Ti nadalus a panagdaydayaw ken Jehova saanna a pagsisinaen dagiti tattao no di ket pagkaykaysaenna ida iti napaypayso nga ayat. (Juan 13:35) Siasino ita ti mangisursuro kadagiti tattao iti amin a lugar no kasano ti agserbi iti Dios a sangsangkamaysa? Awisendaka a mangammo iti sungbat babaen iti daytoy a broshur.

Mano ti am-ammom a Saksi ni Jehova? Mabalin a kaarrubam, katrabahuam, wenno kaklasem ti dadduma kadakami. Wenno mabalin a nakasarsaritadakan maipapan iti Biblia. Siasinokami a talaga, ken apay nga ipakpakaammomi dagiti patpatienmi?

Ordinariokami a tattao. Nagduduma ti nagtaudanmi a pamilia ken kasasaad ti biagmi. Sabali idi ti relihion ti dadduma kadakami, ken adda met dagiti saan idi a mamati iti Dios. Ngem sakbay a nagbalinkami a Saksi, sinukimat a naimbag ti tunggal maysa kadakami dagiti pannursuro ti Biblia. (Aramid 17:11) Pinatimi dagiti nasursuromi ken inkeddeng ti tunggal maysa kadakami ti agdaydayaw ken Jehova a Dios.

Nakatulong kadakami ti panagadal iti Biblia. Kas iti dadduma, adda met dagiti problema ken pagkapuyanmi. Ngem ikagkagumaanmi nga iyaplikar dagiti prinsipio ti Biblia iti inaldaw isu a nagdakkel ti simmayaatan ti kalidad ti panagbiagmi. (Salmo 128:1, 2) Dayta ti maysa a rason a kayatmi nga ipakaammo dagiti naimbag a nasursuromi iti Biblia.

Agbibiagkami maitunos kadagiti nadiosan a prinsipio. Dagitoy a prinsipio nga isursuro ti Biblia iparparegtada ti makapnek a panagbiag ken panagraem iti sabsabali, agraman dagiti ugali a kas iti kinamapagpiaran ken kinaimbag. Makatulong dagita tapno agbalin a nasayaat ken responsable ti maysa a tao, ken iparparegtada ti panagkaykaysa ti pamilia ken panangaramid iti umiso. Gapu ta kombinsidokami a “saan a mangidumduma ti Dios,” pasetnakami ti sangalubongan a naespirituan a panagkakabsat, a saan a mangidumduma iti puli ken saan a makiramraman iti politika. Nupay ordinariokami a tattao, naidumdumakami kas grupo.​—Aramid 4:13; 10:34, 35.

• Ania ti pagpapadaan dagiti Saksi ni Jehova ken ti dadduma a tattao?

• Ania dagiti prinsipio a nasursuro dagiti Saksi iti panagadalda iti Biblia?

Ipagarup ti adu a tattao a ti Saksi ni Jehova ket nagan ti baro a relihion. Ngem nasurok a 2,700 a tawenen ti napalabas, dagiti agserserbi iti maymaysa a pudno a Dios ket nadeskribir kas ‘saksina.’ (Isaias 43:10-12) Sakbay ti 1931, Estudiante ti Biblia ti awag kadakami. Apay nga inusarmi ti nagan a Saksi ni Jehova?

Ipabigbigna ti Diosmi. Sigun kadagiti nagkauna a manuskrito, ti Jehova, a nagan ti Dios, ket rinibu a daras a nausar iti Biblia. Iti adu a patarus, nasuktan daytoy a nagan kadagiti titulo a kas iti Apo wenno Dios. Ngem impalgak ti pudno a Dios ti kinasiasinona ken Moises babaen ti personal a naganna a Jehova, a kinunana: “Dayta ti naganko iti agnanayon.” (Exodo 3:15) Gapu iti dayta, naiduma isuna iti amin a didiosen. Ipagpannakkelmi nga irepresentar ti nasantuan a nagan ti Dios.

Deskribirenna ti trabahomi. Idi un-unana, manipud iti nalinteg a tao a ni Abel, adun a tattao ti nangsaksi iti pammatida ken Jehova. Iti panaglabas ti ginasut a tawen, da Noe, Abraham, Sara, Moises, David, ken ti dadduma pay ket nagbalin met a paset ti “dakkel a grupo dagiti saksi a kas iti napuskol nga ulep.” (Hebreo 11:4–12:1) Kas iti maysa a tao nga agtakder kas saksi iti korte para iti inosente a tao, determinadokami a mangipakaammo iti kinapudno maipapan iti Diosmi.

Tultuladenmi ni Jesus. Iti Biblia, naawagan ni Jesus kas “ti matalek ken napudno a saksi.” (Apocalipsis 3:14) Imbaga a mismo ni Jesus nga ‘impakaammona ti nagan ti Dios’ ken agtultuloy a ‘sinaksianna ti kinapudno’ maipapan iti Dios. (Juan 17:26; 18:37) No kasta, dagiti pudpudno a pasurot ni Kristo masapul a saksianda ti nagan ni Jehova ken ipakaammoda dayta. Daytoy ti ikagkagumaan nga aramiden dagiti Saksi ni Jehova.

• Apay a pinili dagiti Estudiante ti Biblia nga usaren ti nagan a dagiti Saksi ni Jehova?

• Kasano kabayagen nga adda dagiti saksi ni Jehova ditoy daga?

• Siasino ti katan-okan a Saksi ni Jehova?