Sangalubongan a Panangasaba ken Panangisuro

Maine, U.S.A.: Kas panangtulad iti ulidan ni Jesus, “dumadaklis iti tattao” dagiti kakabsattayo

SANGALUBONGAN

• PAGILIAN 239

• AGIBUMBUNANNAG 7,782,346

• ORAS A NABUSBOS ITI MINISTERIO 1,748,697,447

• YAD-ADALAN ITI BIBLIA 8,759,988

AFRICA

• PAGILIAN 58

• POPULASION 968,989,710

• AGIBUMBUNANNAG 1,312,429

• YAD-ADALAN ITI BIBLIA 2,999,639

Saanen a Nagparegreg

Iti Addis Ababa a kabesera a siudad ti Ethiopia ti pagnanaedan ni Saba, a makinkukua iti maysa a paglakuan. Maysa nga aldaw, dua a kakabsat a babbai ti nangipaima kenkuana iti Agriingkayo! a naglaon iti artikulo maipapan iti aborsion. Pinastrek ida ni Saba ket makasangsangit a nangibaga a planona nga iparegreg ti sikogna. Bayat ti panagsasaritada, dida nateppelan ti riknada nga urayda la nakasangit. Iti dayta met la nga aldaw, inkeddeng ni Saba a dinan iparegreg ti sikogna ket determinado nga imbagana dayta ken lakayna. Idi agangay, impasngayna ti maysa a napintas a maladaga a babai. Nakipagadal met iti Biblia agingga a nabautisaran. Maysa itan a naragsak a payunir. Nakipagadal met ni lakayna ken bautisado metten. Idi Abril 2012, nabautisaran met ti dua kadagiti annakda.

‘Mabalinmi Kadi a Kasarita?’

Maysa a manangaywan iti sirkito iti Ethiopia ti mangaskasaba a kaduana ti maysa a kabsat a lalaki. Iti maysa a balay, nakasaritada ti katulong ket dinamagda no mabalinda a kasarita ti amona. Idi imbagana a saan, sinaludsodda no mabalinda ti mangibati iti pagbasaan para kenkuana. Simrek tapno damagenna iti amona sa nagsubli ket imbagana a kayat ti amona a makita nga umuna dayta.

Gapuna, nangted dagiti kakabsat iti magasin. Kalpasan ti sumagmamano a minuto, nagsubli ket imbagana a kayat ti amona a basaen. Kuna ti maysa kadakuada, “No saan a makaruar, mabalinmi kadi ti sumrek tapno makasaritami?” Simrek manen ti katulong tapno damagenna iti amona. Ngem saan a dagus a nagsubli isu a pampanunoten dagiti kakabsat no agsubli pay ngata. Nagsubli met laeng ket pinastrekna ida. Naammuan dagiti kakabsat a ti bumalay a ni Yirgu ket maysa a lakay, 10 a tawenen a naidalit, ken dinan kabaelan ti bumangon wenno agtugaw. Isu met la a naibayag ti katulong ta tinulonganna a nagsukat ken nagipakni iti kuarto.

Inranud dagiti kakabsat ti naimbag a damag. Naragsakan ni Yirgu iti nangngegna ket nagpayadal iti Biblia. Bayat ti panagad-adalda, simmayaat ti salun-atna ket kabaelannan ti bumangon ken makaadayon babaen ti wheelchair. Di nagbayag, makigimgimongen ken nabautisaran iti kallabes a kombension distrito.

Ti Relihion a Naggapuan Dagiti Libro ni Tatangna

Uppat ti tawen ni Calvin a taga-Zimbabwe idi natay ni tatangna. Ti laeng naibatina ken Calvin ket maysa a bag a naglaon iti Baro a Lubong a Patarus ken ti libro a Ti Padto ni Isaias—Lawag nga Agpaay iti Sangatauan, Tomo 1. “Sapulem ket dimo pampanawan ti relihion a naggapuan dagitoy a libro ta isursuroda ti kinapudno,” imbilinna ken Calvin.

Idi natay ni nanangna, ni lolana ti nangaywan kenkuana. Iti siam a tawen, di kayat ni Calvin ti sumurot ken lolana iti simbaan ta ipappapilitna a masarakannanto met laeng “ti relihion” a naggapuan dagiti libro nga imbati ni tatangna.

Maysa nga aldaw, adda babai a nakasarita ni lolana ngem dina ammo a Saksi. Nadakamatna nga adda nasukir nga apokona a dina kayat ti kumuyog kenkuana iti simbaan. Kada Domingo ketdi a basbasaenna ti libro nga imbati ni tatangna. Dinamag ti kabsat no ania daydiay a libro. Kinuna ti lolana a “maysa la ketdi kadagiti awan mamaayna a libro ti Watchtower.”

Kinuna ti kabsat a kayatna a maam-ammo ti apokona. Maragragsakan unay ni Calvin idi nagkitada. Dagus a nagadalda iti Biblia babaen ti libro nga Ania a Talaga ti Isursuro ti Biblia? Rinugianna metten ti makigimong uray no kasta unay ti panangbusor ni lolana. Desidido nga agtalinaed iti kinapudno ken segseggaanna ti panagungarto dagiti nagannakna. Nabautisaran ni Calvin idi Agosto 2012.

“Napigsa ti Dios a Pagserserbiam”

Taga-Uganda ni Caro. Makabulan pay laeng a makipagad-adal iti Biblia, nakaron ti panangbusor ni lakayna a Martin a maysa a mangkukulam. “Saanen a makastrek ditoy balay dagiti inapotayo gapu kadagita librom,” kinunana. Kinabkabil ken pinangtaanna a patayen ni Caro no dina isardeng ti makipagadal iti Biblia. Insardengna met a sinustentuan ti pamiliana. Kalmado laeng ni Caro. Nagmula tapno adda pagtaraon ti pamiliana, ken nagtultuloy a nagadal. Idi makitana nga agpegpeggaden ti biagna, nagtalaw iti balayda. Inkagumaanna a sinuportaran ti bagina. Ngem idi nadamagna nga agsakit dagiti annakna, inggatangna iti agas ti bassit a nateggedanna.

Kalpasanna, nagtelepono ken Caro ti asawana. “Agsublika koman,” kinunana. “Napaneknekak a napigsa ti Dios a pagserserbiam ken kanayon a tultulongannaka. Ibagam kadagidiay mangisursuro kenka a suruandak met. Kayatkon ti agbalbaliw.” Tinungpal ni Martin ti saona, ket agkaykaysa ken nakaragragsak itan ti pamiliada. Naggiddan a nabautisaran da Martin ken Caro iti maysa a kombension idi Agosto 2012.

Agmaymaysa a Mangasaba iti Nasulinek nga Ili

Idi agnanaed ni David iti ili nga adayo iti balayda iti Kenya, nakipagadal iti Biblia kadagiti Saksi ni Jehova. Ngem di nagbayag, masapul nga agawiden iti nasulinek a lugarda a Lokichar iti amianan a laud a paset ti Kenya. Ti kaasitgan a kongregasion ket agarup 165 a kilometro manipud iti ili ti Lodwar. Uppat a tawen nga awan ti nakasarsarita ni David a Saksi ngem inkaskasabana latta kadagiti kaarruba ken kabagianna dagiti nasursurona iti Biblia bayat ti ababa a tiempo a pannakipagadalna. Adda dagiti nangipangag ket idi agangay, adun ti yad-adalanna iti Biblia. Idi 2007, kinasaritana dagiti kakabsat iti Lodwar ket intuloyna ti nagpayadal. Mamindua iti makabulan a mapan sadiay babaen ti motorsiklo, taksi, ken minibus.

Bayat nga umad-adu ti maad-adalna, rumegregta met iti ministerio. Di pay bautisado idi nangibangon iti temporario a “Kingdom Hall” a daga ti didingna ken pan-aw ti atepna iti asideg ti balayna. Ditoy nga ikonkonduktana ti gimong kadagiti interesado. Ngem saan nga amin a pumurok ket naragsakan iti panangaskasabana. Dua a tawen a napadasanna ti napagsasawan ken nakabkabil. Naminsan, basta lattan kinabil ti sumagmamano a pumurok ta mangirugrugi kano iti “panagdayaw iti Diablo.” Ngem nagpatulong ni David iti maysa nga opisial ti gobierno isu a sinardenganda ket intultuloyna ti nangasaba. “Biagko ti kinapudno,” kinuna ni David. “Awan ti ibubusor a makapasardeng kaniak.”

Nabautisaran ni David idi 2009 ket ministerial nga adipen ken regular pioneer itan. Isu ken ti 15 anyos a baritona ti kakaisuna a Saksi iti lugarda. Idi Abril 2012, agarup 60 a pumurok ti timmabuno iti Memorial ti ipapatay ni Kristo a naangay iti temporario a “Kingdom Hall” iti asideg ti balayda.

“Paneknekam iti Biblia no Saan nga Umiso ti Ibagbagana”

Regular payunir ni Janet a taga-Ghana. Agbasbasa idi iti libro nga Isursuro ti Biblia bayat ti napaut a biahena. Adda ministro a limmugan iti bus, nagsermon, sa nagdawat iti donasion kadagiti pasahero. Kinuna ni Janet kenkuana: “Imbagam a ni Jesus isu met laeng ti Dios. Asino ngarud ti nakisao ken Jesus idi nabautisaran?”

“Misterio dayta,” insungbat ti ministro.

Inukag ni Janet ti kapitulo 4 ti libro nga Isursuro ti Biblia, nangpili kadagiti teksto, sa impabasana dagita iti dadduma a pasahero. Inlawlawagna ti nagdumaan da Jesus ken ti Mannakabalin-amin a Dios a ni Jehova.

“Mangkukulamka,” kinuna ti ministro.

Nangngeg dayta dagiti pasahero isu a dinepensaanda ni Janet. Kunada iti ministro, “Paneknekam iti Biblia no saan nga umiso ti ibagbagana imbes nga awagam iti mangkukulam.” Nakapungtot ti ministro isu a bimmaba idi nagsardeng ti bus. Kinuna ti babai a katugaw ni Janet: “Pagarupko no Jehova ti nagan ti simbaan dagiti Saksi. Itay laeng kinasaritam ti ministro a naammuak a nagan gayam ti Dios dayta.”

Nagtultuloy ti saritaanda ket innala ni Janet ti numero ti telepono ti babai sa inkarina nga awaganna. Idi nakaawid ti babai, inyestoriana ken lolana ti napasamak. Nasdaaw met ti baket idi naammuanna a Jehova gayam ti nagan ti Dios. Kalpasanna, inyurnos ni Janet a sarungkaran dagiti Saksi daytoy a babai ken ti lolana. Makigimgimongda itan.

DAGITI PAGILIAN TI AMERICA

• PAGILIAN 57

• POPULASION 946,087,916

• AGIBUMBUNANNAG 3,861,145

• YAD-ADALAN ITI BIBLIA 4,196,922

Naammuanna ti Kinapudno iti Lugar a Dina Ninamnama

Iti Bolivia, inulod dagiti guardia ti 20 anyos a ni Andrea nga inserrek iti paraangan ti pagbaludan bayat nga agsasao iti dakes ken agipangpangta. Kabutbuteng dagiti tattao gapu ta naranggas ken napigsa. Ngem saan a kabuteng ni Leidy, maysa a Saksi ni Jehova a naibalud gapu iti di umiso nga akusasion. Maasian ketdi ken Andrea. Binigat a pigsaan ni Leidy a basaen ti maysa a kanta iti pagkantaantayo. Idi nangngeg ni Andrea, insaludsodna, “Maysaka kadi a Saksi ni Jehova?”

“Wen,” insungbat ni Leidy. Kinuna ni Andrea: “Saksi ni Jehova met ni nanangko ken kumuykuyogak idi kenkuana a makigimong. Inyad-adalannak pay iti Biblia.” Nagsangiten ni Andrea. Kadagiti simmaganad nga aldaw, serioso a pinagsaritaan da Leidy ken Andrea ti maipapan kadagiti naespirituan a banag. Idi tiempon a mabista ni Andrea, nagkararagda a dua para iti tulong ken panangiwanwan ni Jehova. Nawayawayaan ni Andrea ket intultuloyna ti nagadal maipapan ken Jehova. Alisto a nakualipikar nga agbalin a di bautisado nga agibumbunannag ken agsagsaganan a mabautisaran.

Inaprobetsar ni Leidy ti di nainkalintegan a pannakaibaludna. Nakairugi iti 21 a panangyadal iti Biblia sakbay a nawayawayaan. Tallo nga aldaw iti kada lawas a sumarungkar iti pagbaludan tapno mayadalanna dagiti interesado.

Gapu iti Web Site a www.jw.org

Maysa a Domingo iti primavera ti 2011, adda agassawa agraman ti dua nga annakda a simrek iti Kingdom Hall iti Canada. Nanakman ti panagkawkawesda isu nga ipagarup dagiti kakabsat a Saksi ni Jehova daytoy a pamilia manipud iti sabali a siudad. Ni Dominic, a maysa a ministerial nga adipen iti kongregasion, ken ti bisita nga asawa a lalaki nailasinda a dagus ti maysa ken maysa. Yad-adalan gayam idi ni Dominic daytoy a lalaki 17 a tawenen ti napalabas. Dua a tawenen nga agida-download ken agbasbasa ni Marc-André ken ni baketna a Josée kadagiti magasin a Pagwanawanan ken Agriingkayo! manipud iti Web site a www.jw.org. Nabigbigda a masapul a makigimongda a sangapamiliaan iti Kingdom Hall. Nairugi a dagus ti panagadal iti Biblia ket tabtabunuandan ti amin a gimong. Dua a bulan laeng kalpasanna, inrugidan ti bukodda a Panagdaydayaw ti Pamilia iti kada lawas. Agtultuloy ti panagrang-ayda iti naespirituan ket idi Mayo 2012, imparang ni Josée ti damo a pasetna iti Teokratiko nga Eskuelaan ti Panagministro.

“Intedna ti Pangaldaw ken Kallugongna”

Bayat ti 2010 a kombension distrito iti Chile, nadlaw ti 10 ti tawenna a ni Marcelo nga awan ti aniaman a literatura ti lakay a kaabayna.

“Mama, awan Bibliana,” inyarasaasna ken mamangna.

“Agka-Bibliakayon,” kinuna ti ina. Inabay ni Marcelo ti lakay nga agnagan Victor ket inukagda ti tunggal teksto a nadakamat. Bayat ti intermision, imbaga manen ni Marcelo, “Mama, awan pangaldawna.” Insingasing ti ina nga ibingayanna ni Victor isu nga inikkan ni Marcelo iti sandwich ken sangatasa a tsa. Bayat a mangmangan ni Victor, imbasa kenkuana ni Marcelo ti amin a malagipna a teksto.

Iti malem, main-initanda. Imbaga manen ni Marcelo, “Mama, awan kallugongna.”

“Itedmo ta kallugongmon,” kuna ni mamangna. Isu nga inted ni Marcelo ti kallugongna. Idi nalpas ti programa, nagpinnakadan da Marcelo ken Victor.

Iti simmaganad a kombension distrito, napan binirok ni Marcelo no adda a timmabuno ni Victor. Maragsakan unay ta adda ni Victor ken nakakurbata pay! Idi nakita ni Victor ni Marcelo, impigsana nga imbaga: “Addaak ditoy gapu iti daytoy nga ubing. Idi napan a tawen, nakaawatak iti imbitasion isu nga immatenderak iti kombension. Inukagna ti Bibliana tapno makibasaak kenkuana ken intedna ti pangaldaw ken kallugongna. Makipagad-adalak itan iti Biblia!” Maysa itan ni Victor a di bautisado nga agibumbunannag.

Pammadayaw Manipud iti Maysa a Mannurat

Iti maysa a benneg iti diario, adda nalatak a mannurat iti Venezuela a nangyestoria iti kapadasanna. Maipapan dayta iti yaawagna iti customer service ti maysa a kompania ti telepono tapno agpatulong. Dina naaw-awatan ti imbagbaga ti awan daydayawna nga operator ti telepono. Immawag manen ket maysa nga agkabannuag a lalaki ti simmungbat. Inyam-ammona ti bagina kas “Misael” ket nadayaw ken umiso ti panangsungbatna iti saludsod ti mannurat. Dinakamatna: “Naisangsangayan ti kinasingpet, kinadayaw, ken kinamasindadaan a tumulong daytoy nga agkabannuag bayat ti panagsaritami iti telepono. Iti tulongna, nasolbar ti problema ken ammokton ti aramidek no addanto manen kasta a parikut.”

Idi kinomendaran ti mannurat, imbaga ni Misael nga isu ket maysa a Saksi ni Jehova ken ikagkagumaanna a tratuen ti padana a tao kas iti insuro ni Jesus. Kinasarita daytoy a mannurat ti superbisor ni Misael ket pinadayawanna ti nagsayaat a serbisio ti empleadona. Iti bennegna iti diario, insuratna a mapagwadan ni Misael kas umili ti Venezuela ken kas Saksi ni Jehova. Kastoy ti panangingudona: “Kasapulantayo ti kas kenkuana iti amin a pakaipaayan ti serbisio publiko.”

“Dikay Agsuksukir!”

Maysa a tuleng ti 15 anyos a ni Gabriela. Maragragsakan a nagbautisar idi Oktubre 2011 iti kombension distrito ti sign-language iti Ecuador. Idi simrek iti eskuelaanda iti Lunes, magagaran unay ket kiniddawna iti mannursuro nga adda koma napateg nga ipakaammona kadagiti kaklasena. Immanamong ti mannursuro isu a nagtakder ni Gabriela iti sango ket maay-ayatan a nagsenias: “Maragsakanak a mangipakaammo nga immatenderak iti kombension idi Biernes, Sabado, ken Domingo ket sadiay a nabautisaranak kas maysa a Saksi ni Jehova. Kayatko met a maammuanyo nga asidegen ti panungpalan. Ababan ti nabati a tiempo! Masapul nga agbalbaliwkayon. Dikay agsuksukir. Agbutengkayo iti Dios!” Inapresiar dayta dagiti kaeskuelaanna.

Bayat ti pangaldaw, immasideg ken Gabriela ti kaklasena a ni Katty, maysa met a tuleng ken di aktibo a Saksi, ket nagsaludsod maipapan iti kombension. Prangka a kinuna ni Gabriela: “Nagmayat! Ita ta bautisadoakon a Saksi, kayatko ti agtultuloy a matalek ken Jehova. Diakon mabalin ti makigayyem kenka ta narugit ti panagbiagmo ken maapektaran ti pannakigayyemko iti Dios. Agbalbaliwkan. Masapul nga agkararagka ken Jehova ken makisaritaka kadagiti panglakayen. Ammok a kabaelam ti agbalbaliw.” Gapu iti prangka ngem naayat a balakad ni Gabriela, nakisarita ni Katty kadagiti panglakayen. Tinulonganda ket aktibo manen iti ministerio.

Inusarna ti Laptop ti Mannursurona

Iti Estados Unidos, adda 16 anyos a balasitang a kabsat a pinagsaludsodan ti amin a kaklasena maipapan iti relihionna ngem awan ti naitugotna a literatura wenno Biblia. Gapu ta kayatna a masungbatan dagiti saludsod dagiti kaklasena manipud iti Biblia, binulodna ti laptop ti mannursuroda ken linuktanna ti www.jw.org Web site. Nasungbatanna amin a saludsodda ken impakitana pay no kasanoda nga usaren ti Web site. Imbagana a no adda saludsodda maipapan iti Biblia ngem awan ti Saksi a makasaritada, luktanda laeng ti Web site tapno maammuanda ti sungbat. Kalpasan ti sumagmamano nga aldaw, nadlawna a manmanon nga agsaludsod dagiti kaklasena. Idi dinamagna no apay, kinuna ti dadduma a kanayondan a luktan ti Web site iti selponda. Kasta metten ti ar-aramiden ti mannursuroda!

ASIA KEN TI MAKINTENGNGA A DAYA

• PAGILIAN 48

• POPULASION 4,222,869,785

• AGIBUMBUNANNAG 674,608

• YAD-ADALAN ITI BIBLIA 662,736

Naliklikan ti Panaglalaban Dagiti Purok

Adda maysa a grupo dagiti Saksi a mapan makipamumpon iti bassit a purok iti Indonesia. Nadlaw ti maysa a payunir ti sumagmamano nga agtutubo a lallaki iti igid ti kalsada. Kinasaritana ida sa nangted iti broshur nga Umimdengka iti Dios ket Agbiagka nga Agnanayon. Kalpasan ti sumagmamano nga oras, sabali pay a kabsat a babai ti limmabas met iti dayta a lugar bayat ti panagawidna. Immasideg kenkuana ti maysa a lalaki a nakaiggem iti Umimdeng ket Agbiag ken agyamyaman gapu iti panangtedna iti dayta a broshur kadagiti annakna. “Daytoy ti nangispal kadagiti annakko!” kinuna ti lalaki. Saan nga ammo ti kabsat ti immun-una a pannakisarita ti payunir kadagiti agtutubo isu a sinaludsodna no ania ti napasamak. Inlawlawag ti ama a plano dagiti agtutubo a rauten ti maysa a purok. Kas kaugalian iti dayta a lugar, panggepda nga ibalesan ti maysa kadagiti gagayyemda. Ngem idi nabasa dagiti agtutubo ti broshur, naammuanda a dagidiay mangdangran iti padada a tao didanto tawiden ti Paraiso. Isu a nagparbengda, saandan nga intuloy ti planoda, sada nagawid. Naliklikan ti panaglalaban gapu iti mensahe ti Biblia nga adda iti broshur.

Nagbalbaliw ti Maysa a Bakla

Dimmakkel ni Rek iti maysa a gagangay a pamilia iti Cambodia. Sipud pay kinaubing, ti panagrikna ni Rek ken ti kasinginna ket babbaida. Munieka ti ay-ayamda ken kaykayatda ti agkawes iti pangbabai. Mariribukan ken mababain ni nanangda ken dina ammo no kasanona a mapagbalbaliw ida. Agkawesda iti panglalaki no mapanda ageskuela ngem agsukatda a dagus iti bado ti babai apaman a makadanonda sadiay. Idi agtawenda iti 16, nakiramanda iti beauty contest dagiti bakla ket nagustuan ida ti industria ti paglinglingayan. Daytoy ti namaglatak kadakuada kadagiti pabuya iti TV ken komedia. Idi agangay, nagbalinen a homoseksual ti panagbiag ni Rek ken makikadkaduan kadagiti padana a bakla.

Nangrugi met ni nanangda a mapan iti kapilia ket ikuykuyogna ni Rek. Nagtulnog ken nanangna nga agkawes iti panglalaki ngem dina pinapukisan ti atiddog a buokna. Masansan a pabpabainan ken um-umsien ti pastor ti estilo ti panagbiag ni Rek. Nupay kasta, pampanunoten ni Rek a padasenna ti agpayadal iti Biblia iti kapilia. Iti umuna a lawas, nasapa a nagriing sa nagbisikleta iti sumagmamano a kilometro a napan iti kapilia, ngem kuna ti pastor a dina masango nga isuro. Naupay ni Rek idi saanen a nagpakita ti pastor iti sumaruno a lawas.

Idi nakaawid ni Rek, imbaga ti kasinginna nga adda babai a napan iti balayda ket intukonna ti libre a panagadal iti Biblia. Nangibati iti libro nga Ania a Talaga ti Isursuro ti Biblia? Nakipagadal dagiti singin iti kabsat a babai ken iti asawana. Kalpasan ti innem a bulan, insardeng ti kasingin ni Rek ti nakipagadal gapu ta saan a nakasagana nga agbalbaliw. Ngem natignay ni Rek iti ibagbaga ti 1 Corinto 6:9, 10, ken nabigbigna no ania ti masapul nga aramidenna. Babaen ti napasnek a panagadal, panagbasa iti Biblia, panagkararag, ken pannakigimong, nabalbaliwanna ti panagbiagna. Makipagad-adal metten ti nanang ni Rek ken rumangrang-ay iti naespirituan. Idi nabautisaran ni Rek, makasangsangit ni nanangna a nangibaga, “Maragsakanak unay a makakita iti anakko a nabautisaran kas maysan a lalaki.” Regular pioneer itan ni Rek.

Nagbalbaliw ti Maysa nga Espiritista

Espiritista, mangngagas, mamalbalakad, ken mammadles ni Or-Ya. Isu ket nakasarita ti agassawa nga special pioneer iti Haifa, Israel, idi mangaskasabada iti binalaybalay. Kinunana kadakuada: “No maipapan dayta iti Dios, sumrekkayo!” Napno ti balayna iti bambanag mainaig iti espiritismo ken okultismo. Kinunana a makaaw-awat iti mensahe manipud iti Dios, a no dadduma ket babaen iti “espiritu” ti maysa a natayen a rabbi.

Nagustuanna ti tukonda a panagadal iti Biblia babaen ti libro nga Isursuro ti Biblia. Dua nga aldaw sakbay a napan dagiti agassawa iti balayna, inkararagna iti Dios a mangibaon iti mangisuro kenkuana maipapan iti Biblia nga awan ti lalaokna nga interpretasion dagiti rabbi. Iti las-ud ti makabulan, insaludsodna, “Adda kadi sabali pay a tattao a kasta met ti patpatienda?” Timmabuno iti gimong iti kongregasion ket nasdaaw iti nabara a panangabrasa ken ayat nga impakitada kenkuana. Sipud idin, kanayonen a makigimong.

Kalpasan ti dua a bulan a pannakipagadalna, dinamagna ti maipapan iti mapaspasungad nga asamblea: “Saan kadi a kadagiti asamblea nga adda dagiti mabautisaran? Adda pay ngarud dua a bulan tapno maisaganadak a mabautisaran!” Ti immuna nga inaramidna, imbellengna amin a nangingina a ramramit iti espiritismo. Insardengna metten ti kinaespiritistana ken rinugianna a kinasabaan amin a dati a pasiente ken klientena nga intukonna ti libro nga Isursuro ti Biblia ken dagiti magasin. Idi nagsakit, dina inaramid dagiti dati a pamay-an ti panangagasna. Gapu ta insardengna ti dati a pagsapulanna, uppat a bulan nga awan ti napastrekna. Adda inaramidna a kondision iti panagbirokna iti trabaho​—uppat nga aldaw iti makalawas ken innem laeng nga oras kada aldaw​—tapno adda tiempona kadagiti nateokratikuan nga aktibidad. Idi agangay, nakasarak met laeng iti maitutop a trabaho. Inlakona ti dakkel a balayna ken nagabang iti bassit nga apartment.

Di nagbayag, kualipikadon ni Or-Ya a mabautisaran. Ngem makalawas sakbay ti asamblea, nablo ti sakana. Nagpabautisar latta uray no nasemento ti sakana. Aktibo itan nga agibumbunannag ni Or-Ya. Kaskasabaanna dagiti dati a klientena ken mangyad-adal iti Biblia.

Kameng ti Kulto a Nakabirok iti Kinapudno

Nairugi a mayadalan iti Biblia dagiti singin nga agpada a tuleng nga agnanaed iti nasulinek a kabambantayan iti Pilipinas. Kamengda a dua iti kulto a mamati nga awan ti armas a makadangran kadakuada no la ket ta agusarda iti anting-anting ken agbarabadda iti dakkel a panio. Nasanayda nga agusar iti imuko, buneng, ken paltog. Namin-adudan a nakilablaban kadagiti rebelde iti kabambantayan. Pinalubosan ida ti kulto a makipagadal kadagiti Saksi gapu ta ammoda a saanda a piliten ida a sumina iti kulto.

Siempre, dagiti kakabsat pinaregtada dagiti singin nga agdesision sigun iti maad-adalda iti Biblia. Panagrikna ti maysa kadagiti singin a saanna a kabaelan nga itunos ti panagbiagna kadagiti pagalagadan ti Dios. Ngem intultuloy ti kasinginna ti nakipagadal. Tapno maparegta, inukag ti mangyad-adal kenkuana ti Bibliana sa inseniasna: “Adda iti Biblia ti naganmo, Samuel. Agserserbi iti pudno a Dios a ni Jehova ti Samuel iti Biblia agingga a limmakay. Kabaelam met ti agtulnog a simamatalek ken Jehova.” Natukay ti puso ni Samuel. “No adda ti naganko iti Biblia,” kinunana, “masapul ngarud a dumasigak ken Jehova.” Impakaammona iti kulto a pumanawen iti kabambantayan, ken pinuorannan ti amin nga anting-anting ken ramramitna iti espiritismo ket alisto a rimmang-ay iti naespirituan. Bautisado itan nga adipen ni Jehova ken sireregta a tumultulong kadagiti tuleng tapno maammuanda dagiti kinapudno iti Biblia.

Ubing a Naipasango iti Ibubusor

Agnanaed ni Rajiv iti maysa a nasulinek a purok iti makin-amianan a paset ti India. Idi siam ti tawenna ken adda iti Grade IV, sinuruan ida ti maestroda a Saksi ni Jehova kadagiti nasayaat a sursuro babaen ti libro nga Agsursuroka iti Naindaklan a Mannursuro. Impapuso ken inyaplikar ni Rajiv dagiti nasursurona. Imbagana iti maestrona a saanen nga agul-ulbod, makiap-apa kadagiti kaeskuelaanna, ken ik-ikkannan iti pangngaldaw dagidiay awanan balon.

Bayat nga umad-adu ti ammona maipapan iti Paraiso a daga, ibagbagana metten daytoy a naimbag a damag kadagiti kaarruba ken makalugananna iti tren. Masuron ken mababain dagiti nagannakna isu nga imbagada nga isardengnan nga isarsarita ti maipapan ken Jehova ken ni Jesus. Intultuloyna latta isu a babauten dagiti nagannakna. No makasangpet iti balayda, ilemmeng ni nanangna dagiti badona tapno saanen a makaruar a mapan mangisarsarita kadagiti baro a namnama a naammuanna. Imparit dagiti nagannakna a maturog iti katrena, ken kiskissayanda ti kanenna. Idi saanda a mapasardeng, pinaayabanda ti padi tapno balbaliwanna ti panagpampanunot ni Rajiv.

Sumagmamano nga aldaw a nakipagnaed ti padi iti balayda ken pilpilitenna ni Rajiv nga agtamed iti rebulto. Idi imbaga ni Rajiv a bato laeng ken saan a sibibiag a dios dayta, kuna ti padi a ‘luktanna ti mata ti pusona’ tapno “makitana” ti dios iti rebulto. Nangala met ni Rajiv iti papel ken sinuratanna iti “100 rupees.” Intedna iti padi sana kinuna nga igatangna dayta iti tsokolate sananto isubli ti suplina. Kuna ti padi a saan a maag; papel laeng dayta ken awan balorna. “No luktanyo ti mata ti pusoyo,” kuna ni Rajiv, “makitayo ti agpayso a kuarta iti dayta a papel.” Nakapungtot ti padi ket pinuersana a pinagtamed ti ulo ti ubing iti sango ti rebulto. “Pinuersayo nga agtamed ti ulok iti rebulto,” kuna ni Rajiv, “ngem diyo pulos mapagtamed ti pusok.” Simmuko ti padi ken kinunana idi pumanaw a saanna a mapagbalbaliw ti ubing, ket no agbayag pay, amangan no isu ti maawanan iti pammati. Inyakar dagiti nagannakna iti sabali nga eskuelaan. Ngem saan latta a simmardeng a mangibagbaga iti maipapan ken Jehova ken ti karina a Paraiso. Agtawen itan iti 10, ket agpampannuray latta ken Jehova tapno kanayon a nabileg ti pammatina.

Nasarakanna ti Biblia a Birbirokenna

Bayat a kaskasabaan ni Larisa ti maysa a saleslady iti bookstore iti Armenia, adda babai a kostumer a simrek ket dinamagna iti saleslady no adda Bibliada a “Baro a Lubong.” Kinuna ti saleslady nga awan ti kasta a Bibliada ngem adda maipaayna a Biblia iti lengguahe nga Armenian. “Nalaka kadi a maawatan?” dinamag ti babai. Nangibasa ti saleslady iti sumagmamano a teksto sana kinuna, “Kasla nalaka met a maawatan.” Saan a kombinsido ti babai isu nga imbagana a “Baro a Lubong” latta a Biblia ti birokenna. Nalagip a dagus ni Larisa nga intugotna ti Bibliana nga Armenian. Impakitana iti babai ken impabasana ti paulo. Binasa ti babai, “Baro a Lubong a Patarus.” Isu dayta ti mismo a Biblia a birbirokenna!

Inestoria ti kostumer a ti anakna a babai ken ti manugangna nga agnanaed iti Greece ket makipagad-adalda iti Biblia kadagiti Saksi ni Jehova. Gapu ta saanda pay a nasursuro ti lengguahe a Griego, kiniddawda kenkuana a mangitugot iti Armenian a Baro a Lubong a Patarus no mapan sumarungkar kadakuada. Inted ni Larisa ti Biblia iti babai ket kinunana, “Pakiitedmonto kadakuada ken ibagam a sagut daytoy ni Jehova.” Ad-adda pay a naragsakan ti babai idi intukon met ni Larisa a yadalanna iti Biblia. Innalada ti numero ti telepono ti tunggal maysa tapno mairugi ti panagadal ti babai apaman a makasubli manipud Greece.

EUROPA

• PAGILIAN 47

• POPULASION 738,679,198

• AGIBUMBUNANNAG 1,595,888

• YAD-ADALAN ITI BIBLIA 841,260

Insublina ti Pitaka

Ni Nina a maysa a regular pioneer iti Bosnia ket adda pamilia a Roma a yad-adalanna. Maysa nga aldaw, nakapidut iti pitaka ti 10 ti tawenna nga anak ti pamilia bayat a magmagna iti kalsada. Naglaon dayta iti kuarta, credit card, ken dokumento. No saan pay nga agad-adal iti Biblia, baka ibilangna dayta kas napateg a sagut. Kalpasan a nagkonsulta ken nanangna, inkeddengna nga ited dayta iti polis. Naisangsangayan ti desisionna ta nakapangpanglaw ti pamiliada ken awan pay umdas nga igatangda iti tinapay. Awan pay dua nga oras kalpasan a naited ti pitaka iti masmasdaaw a polis, inawaganna ida nga agsubli iti presinto. Agur-uray sadiay ti makinkukua iti pitaka tapno agyaman ken mangted iti gunggona. Inikkanna ida iti agarup $30 (U.S.), a kaibatogan ti dua nga aldaw a sueldo.

Naatrakar iti Paulo

Kalkalpas idi a nangasaba ni Nihad a taga-Bosnia. Bayat nga umas-asideg iti luganna, nakitana nga adda lalaki a nakatakder iti abay ti luganna. Idi kinablaawan ni Nihad, kinuna ti lalaki: “Nakitak iti uneg ti luganmo ti magasin a napauluan iti ‘No Kasano ti Agbalin a Naimbag nga Ama.’ Kayatko ti maaddaan iti kasta. Dandani maysa nga orasen nga agur-urayak ditoy. Mabalinko kadi a dawaten?” Maragragsakan ni Nihad a nangted iti dayta sana kinasabaan.

Naliwliwa Dagiti Agtrabtrabaho iti Barko

Idi napan nangasaba ti maysa a pagassawaan iti pier ti Rotterdam iti Netherlands, immulida iti maysa a barko ket nakitada a malmalday dagiti agtrabtrabaho. Makasangsangit nga imbaga ti kapitan ti barko nga agsasaruno ti napasaranda a kalamidad, kas iti adu a daras a dandanida pannakaidungpar ken dagiti nakaro a dadael ti barko. Kiniddawna, “Mabalindakami kadi nga ikararagan?” Intukon ti agassawa a mangipaayda iti makaparegta a palawag manipud iti Biblia. Kabigatanna, iti alas siete ti rabii, nagsublida iti barko agraman ti dua pay a pagassawaan ket pinastrekda ida iti opisina ti kapitan. Adda sadiay ti 15 kadagiti 16 a trabahador iti barko. Kalpasan ti panglukat a kararag, impalawag ti maysa a kabsat ti tema a “Dagiti Didigra​—Gapuanan Kadi ti Dios?” Nangitugot dagiti kakabsat kadagiti ekstra a Biblia ket tinulonganda dagiti trabahador a mangukrad ken mangbasa kadagiti naisitar a teksto. Kalpasan ti pangserra a kararag, nagtalinaed dagiti trabahador ken nakisaritada kadagiti kakabsat. Nabang-aran ken agyamyamanda. Kuna ti maysa kadakuada, “Sungbat daytoy dagiti kararagmi.” Nangala dagiti trabahador iti 20 a libro agraman Biblia ken dadduma pay a publikasion. Nangted met ti kapitan iti sobre kadagiti kakabsat a naglaon iti $200 (U.S.) kas kontribusion para kadagiti literatura.

Inkararagna a Makatulong Koma

Insurat ni Irene a taga-Sweden: “Agtawenakon iti 80 ken diakon makaruar a mangasaba gapu iti marikriknak nga ut-ot. Inkararagko ken Jehova nga adda koma matulongak kadagiti nakasarsaritak idin ken kayatnan ti makisarita wenno masarungkaran.

“Maysa nga aldaw, nagkiriring ti telepono ket ni lakayko ti simmungbat. Kuna ti immawag a babai: ‘Immawagak ta dakayo laeng ti malagipko. Mabalin kadi a sarungkarannak ni baketmo tapno pagtungtonganmi ti maipapan iti Biblia? Nakipagad-adalak idin 15 wenno 20 a tawenen ti napalabas, ngem insardengko ta busbusorennak daydi lakayko.’

“Malagipko a sinarungkaranmi dayta a babai a kaduak ti kabsat a mangyad-adal kenkuana. Masdaawak ta malagipnak pay. Maragragsakanak isu a nagtulagkami nga agkita. Manipud idin, linawasen nga agadalkami. Timmabuno iti Memorial ken espesial a palawag. Makigimgimong metten. Inaldaw nga agyamyamanak ken Jehova ta sinungbatanna ti kararagko.”

Saan a Maipisok ti Tsokolate iti Donation Box

Ni Sergio nga agtawen iti walo ken taga-Italy kayatna a kombinsiren dagiti panglakayen a kabaelannan ti agbalin a di bautisado nga agibumbunannag. Maysa nga aldaw, kimmuyog ken tatangna a napan nagtarimaan iti seradora ti pagtaengan ti agassawa nga agtawenen iti nasurok a 70. Nangitugot ni Sergio kadagiti magasin. “Bayat nga agtrabtrabaho ni Tatang,” kinunana, “inikkak ti lakay kadagiti magasin. Nasdaaw ket inayabanna ni baketna tapno ipakita dagita. Dinamagko ti nagan, adres, ken numero ti teleponoda tapno masarungkarakto ida. Inted ti baket dagitoy nga impormasion ken inikkannak pay iti dakkel a tsokolate.” Kalpasan ti sumagmamano nga aldaw, sinarungkaran ida ni Sergio a kaduana ti maysa a panglakayen. Nag-doorbell ni Sergio ket rimmuar ti baket sa imbagana a kayatna nga ikkan daytoy iti libro nga Ania a Talaga ti Isursuro ti Biblia? Naragsakan ti baket a nangawat iti libro ket inikkanna manen iti tsokolate. “Diak maipisok ti tsokolate iti donation box isu a kinnankon,” kinuna ni Sergio. Innayonna, “Napaneknekan dagiti panglakayen a talaga a kayatko ti agbalin a di bautisado nga agibumbunannag.”

Kayat ti Pastor a Maammuan ti Ad-adu Pay

Ni Simeon ket pastor ti maysa a relihion iti Gurkovo, Bulgaria. Awan ti Saksi iti daytoy a lugar. Iti panangad-adalna iti Biblia, naammuanna ti nagdumaan ti isursuro ti Biblia ken ti isursuro ti relihionda. Maysa nga aldaw, nakaawat kadagiti magasintayo bayat nga adda iti tren. Maragsakan a makaammo a ni Jehova ti pudno a Dios ken awan ti Trinidad. Gapu ta kayatna nga ad-adu pay ti maammuanna, nagsurat iti sanga nga opisina ken iti amin a relihion nga ammona. Maysa laeng a relihion ti nagsubalit a mangibagbaga a dina pakaseknan dagiti “kasta a banag nga awan mamaayna.” Iti kasupadina, inyurnos ti sanga nga opisina a dua a Saksi manipud Kazanlŭk ti agbiahe iti agarup 35 a kilometro tapno yadalanda iti Biblia ni Simeon ken ti pamiliana. Nagustuan ni Simeon ti maad-adalna, ket inawisna nga umay dumngeg dagiti kaarruba ken gagayyemna. Di nagbayag, 25 ti um-umayen iti linawas a panagadalda. Iti umuna a gundaway, napan dimngeg ti 75 anyos a kaarrubada iti panagadalda ket idi nalpas, makasangsangit a nangibaga, “Ad-adu ti naawatak iti maysa nga oras a panagdengngegko ngem iti 30 a tawen a pannakimismisak.” Agarup 60 ti makigimgimong iti Gurkovo a maminsan iti kada bulan nga ang-angayen dagiti kakabsat manipud Kazanlŭk, ken 79 ti timmabuno iti Memorial.

“Itultuloymo ti Kasta nga Ar-aramidem”

Ni Valya a taga-Ukraine ken agtawen iti 15, napaliiwna a nakamangisit ti maestrana ken kasla nagsangsangit idi simrek iti eskuelaan. Naammuan ni Valya a natay gayam ti ina ti maestra isu a napanunotna a liwliwaen babaen kadagiti teksto maipapan iti panagungar. Insaganana ti Biblia ken ti dua a broshur, Ania ti Mapasamak Kadatayo no Mataytayo? ken No Adda Matay nga Ay-ayatenyo. Desidido a makisarita iti maestrana kalpasan ti klaseda. Kinunana: “Napalalo ti nerbiosko bayat nga ur-urayek iti sango ti opisinana isu nga inkararagko a tulongannak ni Jehova.”

Idi simrek ni Valya iti opisina, dinamag ti maestra, “Ania ti masapulmo?”

“Makipagriknaak kadakayo, Ma’am. Maawatak ti riknayo ta natay met ni lolok, sumagmamano a tawenen ti napalabas.”

Natukay ti rikna ti maestra iti pannakaseknan ni Valya. Makasangsangit a nangibaga nga awan kadagiti kabagian wenno katrabahuanna ti nangipakita iti kasta kapasnek a pannakipagrikna. Binasa ken inlawlawag ni Valya ti Apocalipsis 21:3, 4. Kalpasanna, inawat ti maestra dagiti broshur, sa kinunana, “Naidumdumaka kadagiti sabsabali nga estudiante.”

Inlawlawag ni Valya, “Ikagkagumaak a basaen ti Biblia ken yaplikar ti masursurok, ken agtultulnogak kadagiti nagannakko.”

Kiniddaw ti maestra a mangted ni Valya iti Biblia ken iti libro nga Isursuro ti Biblia. Nagyaman manen ti maestra sa kinunana: “Ti relihionyo ti pudno a relihion, ken nagsingpet dagiti nagannakmo ta isursurodaka iti umiso. Itultuloymo ti kasta nga ar-aramidem.”

Sabali ti Numero a Naawaganna

Iti umuna nga aldaw ti 2011 a kombension distrito iti Malakasa, Greece, inawagan ni Natalie ni tatangna maipapan iti pagluganan a bus a mapan iti pagkombensionan. Ngem sabali ti numero a naawaganna ken awan ti sumungsungbat. Di nagbayag, ti lalaki a naawagan ni Natalie nakitana nga adda immawag iti selponna, isu nga inawaganna dayta a numero tapno maammuanna no asino ti immawag. Ngem nangrugin ti programa ti kombension. Panggep ni Natalie nga iddepen ti selponna ngem sabali ketdi ti natalmeganna isu a nakastrek ti awag. Saan nga ammo ni Natalie a nangngeg ti lalaki ti dadduma a paset ti palawag ti tserman a naginteresan ti lalaki.

Kalpasanna, inteks ti lalaki, “Asinoka? Padika kadi?” Kalpasan ti sesion iti agsapa, nabasa ni Natalie ti teks. Nag-reply: “Saanak a padi. Maysaak a Saksi ni Jehova ken madama ti kombensionmi.”

Immawag manen ti lalaki iti Sabado ket dinamagna no madama pay laeng ti kombension. Kalpasan a kinasabaan ti tatang ni Natalie, kinuna ti lalaki, “Iti sumagmamano laeng a minuto a pannakangngegko iti palawag iti selpon, nasungbatan ti adu a saludsod a pakaburburiborak.” Rirriribuken gayam dagiti demonio ti pamiliana ken dina ammo no asino dagiti espiritu ken no apay a mapaspasamak dayta kadakuada. Kinunana: “Diak kayat idi ti makisarita kadagiti Saksi ni Jehova, ngem ita, no mabalin, kayatko a makasarita ti lalaki a nagpalawag.”

Siempre mabalin. Timmabuno ti lalaki iti Domingo ket nasdaaw iti nakitana​—nakaragragsak dagiti tattao ken desente ti panagkawkawesda. Awan ti agkaiwara a basura, agsasao iti dakes, ken agsigsigarilio. “Diak impagarup nga adda kastoy a tattao ditoy daga!” kinunana. “Kasla addaak iti sabali a planeta.” Kinuyog ti tatang ni Natalie a mapan iti chairman’s office, ket nakasaritana ti tserman. Saan a malipatan ti lalaki ti mismo a kombension ken dagiti sungbat a naammuanna. Immawat iti Biblia, libro nga Isursuro ti Biblia, ken sumagmamano a magasin, ken nayurnos a masarungkaran.

OCEANIA

• PAGILIAN 29

• POPULASION 38,495,300

• AGIBUMBUNANNAG 94,924

• YAD-ADALAN ITI BIBLIA 59,431

“Ti Kapintasan Pay Laeng a Kanta a Nangngegko”

Iti Savaii, Samoa, gagangay a mangrugi ti klase iti eskuelaan babaen ti panagkanta dagiti ubbing iti nailian a kanta. Ngem da Celina ken Levaai nga agtawen iti lima ken innem sidadayaw nga imbagada iti prinsipal a saanda a makipagkanta gapu ta Saksida ni Jehova. Madusa ti saan nga agkanta. Ngem napanunot ti prinsipal a mapabainanna dagiti ubbing no pilitenna ida isu nga imbagana, “Sige, no diyo kayat a kantaen ti kantami, kantaenyo ngarud ti maysa kadagiti kantayo.” Kinanta da Celina ken Levaai ti numero 111 a napauluan iti “Umawagto,” a nabiit pay a naikabesada bayat ti Panagdaydayaw ti Pamiliada. Nakasangit ti prinsipal idi nalpasda a nagkanta. Kinunana: “Dayta ti kapintasan pay laeng a kanta a nangngegko. Ulitenyo man pay.” Kinantada manen, kalpasanna kinuna ti prinsipal, “Manipud ita, dagiti kantayo ti ipakantakon kadakayo.”

Iti Intero a Panagbiagna, ni Jesus ti Nagkarkararaganna

Iti Fiji, maysa a ministro ti relihion ti nakipagdengngeg bayat a mayadalan iti Biblia ti maysa a lalaki. Nangngegna a ni Jesus ket saan a Dios. Naburiboran unay nga uray la di nakaturturog. Napaliiw dayta ni baketna isu a kinunana, “Saankanton a mapan dumdumngeg kadagita a tattao!” Ngem di latta maikkat dayta iti panunotna. Iti sumaruno a lawas, nakipagdengngeg manen iti panagadal iti Biblia. Sumagmamano nga aldaw kalpasan dayta, napan iti kapiliada ket nagikkat kas ministro, uray no saan pay idi a nairugi a nayadalan. Naklaat ken nakapungtot dagiti kabagian ken karelihionanna. Saan la a relihion ti panawanna no di ket ti trabahona pay a dakkel ti sueldona. Nalawag kenkuana ti kinapudno iti Biblia maipapan ken Jesus ngem saan a kas karina nga agkararag ken Jehova gapu ta iti intero a panagbiagna, ni Jesus ti nagkarkararaganna. Kalpasan ti adu a bulan, nagkararag met laengen ken Jehova. Iranranudnan ti naimbag a damag ken tultulonganna ti sabsabali tapno maam-ammo ken maipategda ni Jehova.

Bassit a Komunidad a Nangawat iti Kinapudno

Adda laeng 62 a tattao nga agnanaed iti isla ti Makatea iti South Pacific. Maysa a kongregasion dagiti Saksi ni Jehova iti Tahiti ti mangaskasaba ditoy. Siam ti regular a mayad-adalan ditoy iti Biblia babaen ti telepono. Agtataripnong ti agingga iti 15 a tattao iti balay ti maysa a mayad-adalan tapno denggenda ti gimong a maang-angay iti isla ti Tahiti. Maysa kadagiti mayad-adalan ket ti balasang nga addaan iti akem iti relihionda ken manamnama nga agbalin a diakonesa. Iti nabiit pay, napan iti kapiliada tapno ilawlawagna no apay a saanen a mapmapan kadagiti aktibidad ti relihionda. Impakitana iti Biblia no apay a saan a rumbeng a mangisuro dagiti babbai iti kongregasion. Inlawlawagna ti akem ni Jesu-Kristo ken ti kaipapanan ti Pangrabii ti Apo, a marambakan maminsan iti makatawen, saan ket a tunggal Domingo. Inlawlawagna met a 144,000 laeng ti makikadua ken Kristo idiay langit ken isuda laeng ti makiraman iti emblema ti Memorial. Naparegta ti maysa a babai iti ulidanna isu a nagikkat met iti relihionda. Regular a makipagad-adal itan kadagiti Saksi.

Inawat ti Pamilia ti Imbitasion

Iti panangikagumaan a mangawis kadagiti di aktibo a tumabuno iti Memorial ti ipapatay ni Kristo, dua a panglakayen iti Solomon Islands ti simmarungkar ken Joshua, a saanen a makigimgimong sipud pay idi 1998. Dua nga oras a nagna da Joshua ken ti 20 pay a kameng ti pamiliana tapno makatabunoda iti Memorial. Nakalua ni Joshua gapu iti nabara a panangabrasa kadakuada ti kongregasion. Adu met iti pamiliana ti timmabuno iti espesial a palawag. Kalpasanna, imbagada kadagiti panglakayen a kayatda ti mayadalan iti Biblia. Nayurnos ti panangyadal iti 15 kadakuada.

Ammona ti Sungbat

Iti nasurok a 1,000 nga isla iti teritoria ti sanga nga opisina ti Guam, nasurok a 100 ti mapagnanaedan. Ngem 13 laeng kadagitoy nga isla ti asideg iti maysa a kongregasion. Gapu ta nagadu nga isla ti saan pay pulos a napnapanan dagiti Saksi ni Jehova, mangbirbirok dagiti kakabsat kadagiti pamay-an a makasabaanda ida. Idi Abril 2012, maysa a grupo dagiti kakabsat ti naglayag a napan iti Polowat, maysa kadagiti kaadaywan nga isla. Dandani saan pay a napaspasiar daytoy dagiti tattao iti sabali a pagilian. Nakabaag dagiti lallaki, agkungkongda iti kayo nga aramidenda a bilog, ken agtalonda.

Insaludsod ti maysa kadagiti pimmasiar a Saksi iti agkabannuag a lalaki, “Ania ti mapasamak no mataytayo?”

“Ammok ti sungbat!” kinuna ti lalaki. Dagus a timmakder, inruarna ti libro a Mabalinyo ti Agbiag nga Agnanayon iti Paraiso a Daga iti lengguahe a Chuukese sana linukib ti panid a “Dagiti Linaonna.” Intudona ti kapitulo 8, “Ania ti Mapasamak No Matay?” sa magagaran a nangibaga iti naadalna iti libro.

Kasano a naaddaan iti kasta a libro? Idi 2009, nangasaba dagiti kakabsat iti sangladan ti dakkel nga isla ti Chuuk tapno makasaritada dagiti tattao a mapan kadagiti adayo nga isla. Nagipaimada kadagiti libro nga Agbiag nga Agnanayon. Immanamong ti maysa a nagpa-Polowat a mangala iti sangakarton a libro nga iwarasna kadagiti kaarrubana. Maysa daytoy agkabannuag a lalaki kadagiti immawat.

Sakbay a pimmanawda iti Polowat, namin-adu a sinarungkaranda ti agkabannuag tapno paregtaen ken isuro no ania ti magunggonana iti panagadal iti Biblia. Insuroda met nga agbirok kadagiti teksto ken mangisurat kadagiti kangrunaan a punto kadagiti marhin ti librona.

Makaparagsak a maammuan nga uray kadagiti adayo nga isla nga awanan iti TV, radio, diario, wenno Internet, makatulong dagiti publikasiontayo tapno maammuan dagiti tattao ti kinapudno iti bukodda a pagsasao!

Tallo a Bala, Tallo a Rason

Nasurok bassit a 20 ti tawen ti di bautisado nga agibumbunannag a ni Anna idi kimmaro ti guerra sibil iti Bougainville iti Papua New Guinea. Idi 1991, maysa ni Anna iti grupo dagiti Saksi a buklen ti innem nga adulto ken pito nga ubbing manipud Arawa Congregation a napilitan a nagkamang iti kabakiran. Bassit laeng ti naitugotda nga ik-ikutanda. Dua a tawen a nagnaedda kadagiti nagpanawan a balay ken nagbirokda iti taraonda. Dua laeng a libro ti us-usarenda nga aggigimong​—ti Biblia ni Anna ken ti libro a Nagkaykaysa iti Panagdayaw iti Maymaysa a Pudno a Dios. Sangsangkamaysada nga agkararag, agkanta kadagiti kanta ti Pagarian, ken mangasaba kadagiti makasaritada.

Nasarakan ida dagiti rebelde a soldado ken kayatda a makikadua kadakuada ti dua a kakabsat a lallaki, ngem raraemenda ti neutral a takder dagiti Saksi. Maysa a soldado ti nangipakita ken Anna iti tallo a bala sa kinunana, “Makiasawaka kaniak wenno matayka.” Nangted ni Anna iti tallo a rason​—maysa iti kada bala​—no apay a dina kayat ti makiasawa kenkuana. Ti kangrunaan ket ti kuna ti Biblia a makiasawa ‘laeng iti Apo.’ (1 Cor. 7:39) Awan naaramidan ti lalaki ket pimmanaw.

Idi 2012, naammuan ni Anna, a maysan a regular pioneer, a dakkel ti panagkasapulan kadagiti agibumbunannag iti Arawa, isu a nagsubli a kaduana ti maysa pay a payunir tapno tumulong a mangipasdek iti maysa a grupo. Dinamagda no maamak nga agsubli iti lugar a nakaimatanganna iti adu a panagpipinnatay ken nakapasaranna iti napalalo a rigat bayat ti gubat. “Maragsakanak ketdi nga agsubli ditoy,” insungbatna. “Awan ti makapasardeng iti trabaho ni Jehova, uray ti guerra sibil.”