Panangikondukta iti Epektibo a Panangyadal iti Biblia
1. Ania ti responsabilidad dagiti agibumbunannag nga addaan kadagiti iyad-adalan iti Biblia?
1 Dagiti laeng ‘iyasideg’ ni Jehova ti makapagserbi kenkuana. (Juan 6:44) Nupay kasta, masapul nga aramiden dagiti agibumbunannag ti pasetda a mangtulong kadagiti tattao nga umadani iti nailangitan nga Amada. (Sant. 4:8) Agkasapulan daytoy iti panagsagana. Saan nga umdas ti basta panangbasa iti tunggal parapo ken panangisaludsod iti nayimprenta a saludsod tapno maala ti estudiante ti punto ket rumang-ay.
2. Ania ti maibanag ti epektibo a panangyadal iti Biblia?
2 Tapno epektibo ti panangyadal, masapul a tulongan dagiti agibumbunannag dagiti iyad-adalanda a (1) mangtarus, (2) mangawat, ken (3) mangyaplikar kadagiti isursuro ti Biblia. (Juan 3:16; 17:3; Sant. 2:26) Mabalin nga adu a bulbulan ti kasapulan tapno maaramid dagitoy nga addang. Ngem ti tunggal addang ipakitana a rumangrang-ay ti espiritualidad ti estudiante ket inton agangay, agdedikar ken Jehova.
3. Apay a dagiti epektibo a mannursuro ket mangibangon kadagiti saludsod a mangaon iti kapanunotan?
3 Ania ti Pampanunoten ti Mayad-adalan?: Tapno maammuantayo no natarusan ken awaten ti iyad-adalantayo dagiti maad-adalna, saan koma a datayo ti makaadu nga agsao no di ket paregtaentayo nga iyebkasna ti kapanunotanna. (Sant. 1:19) Naawatanna met la kadi ti kuna ti Biblia maipapan iti topiko nga ad-adalenyo? Mailawlawagna kadi dayta iti bukodna a sasao? Ania ti panangmatmatna iti nasursurona? Mamati kadi a nainkalintegan dagiti isursuro ti Biblia? (1 Tes. 2:13) Matarusanna kadi a dagiti maad-adalna ket dakkel ti epektona iti wagas ti panagbiagna? (Col. 3:10) Tapno masungbatan dagitoy a saludsod, nasken a sitataktika a mangibangontayo kadagiti saludsod a mangaon iti kapanunotanna sa dumngegtayo.—Mat. 16:13-16.
4. Ania ti aramidentayo no marigatan ti iyad-adalantayo a mangtarus wenno mangyaplikar kadagiti maad-adalna iti Biblia?
4 Adu a panawen ti kasapulan tapno maiwaksi dagiti aramid ken kapanunotan a nakairuaman ti maysa. (2 Cor. 10:5) Kasano no saan nga awaten wenno iyaplikar ti iyad-adalantayo dagiti maad-adalna? Kasapulan ti anus ken panawen tapno makaramut ti Sao ti Dios ken agtignay ti nasantuan nga espiritu iti puso ti estudiante. (1 Cor. 3:6, 7; Heb. 4:12) Imbes a pilitentayo ti iyad-adalantayo, masansan a nasaysayaat no umallatiwtayo iti sabali a topiko no marigatan a mangtarus wenno mangyaplikar iti isursuro ti Biblia. Bayat a siaanus ken siaayat nga itultuloytayo nga iyadalan iti Biblia, mabalin a matignayto met laeng a mangaramid kadagiti napateg a panagbalbaliw.