EBED-MELEC

[Adipen ti Ari].

Etiope a eunuko iti balay ni Ari Zedekias. Babaen iti tignayna, imparangarangna a naan-anay nga umanamong iti trabaho ni Jeremias a mammadto ni Jehova. Idi a dagiti prinsipe ti Juda nangidatagda maibusor ken Jeremias iti ulbod a pammabasol a panagalsa, ni Zedekias insukona ti mammadto iti ima dagitoy a prinsipe. Kalpasanna, dagitoy a prinsipe innalada ni Jeremias ket impisokda iti napitak a pagurnongan ti danum ni Malkias, nga adda iti Paraangan ti Guardia, tapno sadiay a matay iti kaawan taraon. (Jer 38:4-6) Iti laksid ti peggad a pakaipasanguanna idi gapu iti agraraira a nakaro a gura ken Jeremias ken iti mensahena, ni Ebed-melec situtured ken sipapanayag nga immadani iti ari a situtugaw iti Ruangan ni Benjamin ket sadiay indatagna ti maysa a kiddaw maipagapu ken Jeremias. Immannugot ni Zedekias. Idin ni Ebed-melec, sigun iti bilin ti ari, nangala iti 30 a lallaki a mapan iti pagurnongan ti danum ket nangipababada kadagiti tali nga addaan kadagiti rutrot a rigis ken pedaso ti lupot nga ikabil ni Jeremias kadagiti kilikilina tapno mayaonda manipud iti pagurnongan ti danum. (Jer 38:7-13) Mabalin a ni Zedekias binilinna ni Ebed-melec a mangikuyog iti 30 a lallaki, saan a gapu ta kasapulan ti kasta a kaadu ti lallaki a mangyaon ken Jeremias manipud iti pagurnongan ti danum, no di ket tapno maipatungpal ti naballigi a panangispal agpapan pay aniaman a posible a pannakibiang dagiti prinsipe wenno ti papadi. Gapu iti daytoy nalinteg a tignay maipaay iti mammadto ti Dios, ni Jehova impanamnamana ken Ebed-melec, babaen ken Jeremias, a saanto a mapukaw kabayatan ti pananglakub ti Babilonia no di ket maipaayanto iti itatalaw.​—Jer 39:15-18; kitaenyo ti EUNUKO.