Tuladenyo ti Pammatida
1. Anianto ti adalentayo iti Panagadal ti Kongregasion iti Biblia mangrugi iti lawas ti Oktubre 19?
1 Iti lawas ti Oktubre 19, 2015, rugiantayon nga adalen ti libro a Tuladenyo ti Pammatida iti Panagadal ti Kongregasion iti Biblia. Usigen daytoy a libro dagiti salaysay ti Biblia maipapan iti 14 a lallaki ken babbai a mapagulidanan iti pammati. Ti pannakaisurat daytoy a libro ket makatulong tapno mailadawan iti isiptayo a dagitoy a matalek a tattao ket pudpudno a nagbiag ken naipasangoda kadagiti problema bayat ti panagserbida ken Jehova. Adda met dagiti masursurotayo kadagiti salaysay iti daytoy a libro a mayaplikartayo ita iti biagtayo.—Heb. 6:12.
2. Ilawlawagyo ti sumagmamano a paset ti libro a Tuladenyo ti Pammatida.
2 Dagiti Pasetna: Naglaon ti libro iti time line ken mapa tapno maammuantayo no kaano a nagbiag ken sadino ti nagnaedan dagiti nadakamat a karakter. Kanayonanna, tunggal kapitulo ket addaan iti paset a napauluan, “Panunotem . . . ,” a tumulong kadatayo a mangutob kadagiti salaysay ken mangyaplikar kadagiti masursurotayo a leksion. Adu met dagiti napintas, napnuan iti kolor, detalyado ken naannad ti pannakasukimatna a ladawan daytoy a libro, a tumulong tapno agbalin a nabiag iti panunottayo dagiti salaysay.
3. Kasanotayo a mabenepisiaran iti panagadal iti daytoy a publikasion?
3 No Kasano a Mabenepisiaran: Paregtaennatayo ti surat ti Bagi a Manarawidwid nga adda iti pakaunana babaen kadagitoy a sasao: “Utobenyo a naimbag; panunotenyo a karamankayo iti eksena. Padasenyo a riknaen no ania ti narikna ken nakita dagitoy a karakter ti Biblia. Idiligyo ti reaksionda iti napasamak iti kayatyo koma a maaramid.” Siempre, ti panangutob a naimbag dina kayat a sawen a nalabes ti panangipapantayo. Imbes ketdi, iladawantayo sigun iti panangisalaysay ti Biblia ken kas iti panagrikna dagiti tattao a nadakamat. Kasapulan ti tiempo ken panagmennamenna tapno maaramidtayo dayta. (Neh. 8:8) No mangrugi ti leksion iti tengnga ti kapitulo, irugi ti mangidaulo ti panagadal babaen ti panangrepaso iti napalabas a napagadalan iti las-ud ti 30 agingga iti 60 a segundo. No ti paset a “Panunotem . . . ” ket saan a karaman iti mapagadalan, mabalin a mangted iti maysa wenno dua a saludsod kas pangserra a repaso.
4. Apay a masapul nga adalentayo ti libro a Tuladenyo ti Pammatida?
4 Agbibiagtayo iti lubong nga inaldaw nga adu a bambanag ti mabalin a mangdadael wenno mangpakapuy iti pammatitayo. Daytoy a libro—kasta met ti agtultuloy a serye iti Pagwanawanan a nakaibatayan daytoy—ket regalo ni Jehova a tumulong a mangpabileg iti pammatitayo. (Sant. 1:17) Naan-anay a mabenepisiarantayo no regular nga umatendertayo iti Panagadal ti Kongregasion iti Biblia ken naan-anay a makiramantayo iti panagkomento bayat nga adalentayo daytoy a publikasion!