‘Walk by Faith, Not by Sight’

Sakbay la unay ti pannakalakub ti Jerusalem a nagbanag iti pannakadadaelna, insurat ni apostol Pablo a dagiti Kristiano, kas nasasayaat a soldado ni Kristo, masapul a namnamaenda ti panagrigat ken saanda nga ipangpangruna ti bukodda a pagnam-ayan ken pagragsakan. (2 Tim. 2:3, 4) Bayat nga umas-asideg ti pannakadidigra daytoy di nadiosan a lubong, masapul a patibkerentayo ti pammatitayo tapno kanayon a maipangpangrunatayo ti naespirituan a bambanag. (2 Cor. 4:18; 5:7) Buyaenyo ti video a ‘Walk by Faith, Not by Sight.’ (Mapan iti jw.org, ken kitaen ti PUBLICATIONS > VIDEOS.) Siputanyo no kasano a ti nalabes a panangipateg iti material a bambanag ket nagbalin a makapapatay a silo kada Naham ken Abital. Kalpasanna, repasuenyo dagiti sumaganad a saludsod.

(1) Ania ti ‘makarimon a banag a sitatakder iti nasantuan a disso’ idi umuna a siglo, ken ania ti masapul idi nga aramiden a dagus dagiti Kristiano nga agnanaed idiay Jerusalem? (Mat. 24:15, 16) (2) Apay a kasapulan ti pammati iti ipapanawda iti siudad? (3) Ania dagiti sakripisio a ramanen ti ipapanawda? (4) Apay a saan a pimmanaw a dagus da Naham ken Abital? (Mat. 24:17, 18) (5) Ania pay ti nakasubokan ti pammati ni Rachel idi panawanda ti Jerusalem? (Mat. 10:34-37; Mar. 10:29, 30) (6) Kasano nga impakita ni Ethan ti nagsayaat nga ulidan ti pammati ken panagtalek ken Jehova? (7) Ania dagiti rigat a napasaran dagiti Kristiano idiay Pella? (8) Kasano nga in-inut a kimmapuy ti pammati da Naham ken Abital? (9) Kasano nga impaay ni Jehova ti kasapulan dagiti Kristiano nga agnanaed idiay Pella? (Mat. 6:33; 1 Tim. 6:6-8) (10) Kasanotayo a matulad da Abraham ken Sara bayat nga umas-asideg ti panungpalan ti sistema ti bambanag? (Heb. 11:8-10) (11) Kasano nga inkalintegan da Naham ken Abital ti panagsublida idiay Jerusalem, ken apay a saan nga umiso ti kapanunotanda? (Luc. 21:21) (12) Ania ti agpayso a kasasaad ti biag idiay Jerusalem idi nagsubli da Naham ken Abital? (13) Apay a masapul a patibkerentayo ti pammatitayo itan sakbay a dumteng ti panungpalan daytoy a sistema ti bambanag?—Luc. 17:31, 32; 21:34-36.

Ti pannagna babaen ti pammati kaipapananna nga (1) agtalektayo iti panangiwanwan ni Jehova, (2) ipalubostayo a dagiti instruksionna ti mangigiya kadatayo, ken (3) ipakitatayo a napatpateg ti naespirituan a bambanag ngem iti material a bambanag. Determinadotayo koma a magna iti pammati, nga agtalektayo a “ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.”—1 Juan 2:17.