Panangsapul iti Namnama iti Lubong a Napno iti Rigat
“ITI INTERO a pakasaritaan ti tao, nabilbileg ita ti impluensia dagiti ordinario nga umili nga agaramid iti naimbag agpaay iti publiko ken mangsolbar kadagiti gagangay a parikut.” Dayta ti kinuna ti dati a presidente ti Estados Unidos a ni Bill Clinton bayat ti maysa a komperensia idiay Ottawa, Canada, idi Marso 2006. Kinunana a sipud idi napasamak ti tsunami idi 2004, agtitinnulongen ti nadumaduma a pagilian iti lubong ken napnuan namnama a kinunana a dimteng itan “ti tiempo ti awan pay kapadana a sangalubongan a panagpannuray ti tattao iti maysa ken maysa.”
Manamnamatayo kadi a dagiti natural a didigra ti pakatignayan dagiti tattao iti sadinoman a lugar tapno agtitinnulongda agpaay iti nasaysayaat a masanguanan? Ti kadi “awan pay kapadana a sangalubongan a panagpannuray ti tattao iti maysa ken maysa” ket umdas a pagibasaran iti panangnamnama nga addanto pudpudno a talna ken manayon a kinatalged iti masanguanan?
Gubuayan ti Pudno a Namnama
Ti nabayagen a panagregget ti sangatauan iti nasurok nga innem a ribu a tawen ipakitana a maulit-ulit a papaayen ti tao ti padana a tao. Rasonable ngarud daytoy a balakad kadatayo ti naipaltiing a Kasuratan: “Dikay ikabil ti panagtalekyo kadagiti natan-ok, wenno uray iti anak ti naindagaan a tao, a kenkuana awan pannakaisalakan.” (Salmo 146:3) Mapaaytayo laeng no mangnamnamatayo kadagiti organisasion ti lubong, iti material a bambanagna, ken kadagiti kalatna. Apay? Gapu ta “ti lubong aglabas ken kasta met ti tarigagayna.”—1 Juan 2:17.
Nupay kasta, sinigsiglon nga insaad dagiti nalinteg a tattao ti di maisin a namnamada iti Dios. Isu ket inawagan ti Biblia kas “ti namnama ti [nagkauna nga] Israel” ken “ti namnama dagidi amma” ti Israel. Naglaon pay ti Biblia iti adu nga ebkas ti panangnamnama, panagtalek, ken panagkompiansa kenkuana. (Jeremias 14:8; 17:13; 50:7) Kinapudnona, iparegta ti Kasuratan a ‘manginanamatayo ken Jehova.’—Salmo 27:14.
Idagadag kadatayo ti Proverbio 3:5, 6: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” Naan-anay a makapagtalekkayo iti kasta a kari agsipud ta ni Jehova ket di agbalbaliw, mapagpannurayan, ken kanayon a tungpalenna ti saona. (Malakias 3:6; Santiago 1:17) Ti kasayaatan a pagimbaganyo ti pampanunotenna, ken no kanayon nga ipangagyo ti ibaga ti Saona a ti Biblia, dayta ti sibaballigi a mangiwanwan kadakayo kadagitoy nakabutbuteng a tiempo.—Isaias 48:17, 18.
Ti tao a naimpusuan nga agpapaiwanwan iti Dios mapagpannurayanna daytoy a kari: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto. Pudno a tulongankanto. Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg.” (Isaias 41:10) Ti naimpusuan a kararag agraman ti panangmennamenna iti dayta a pammatalged ket makaliwliwa unay iti amin a pudno nga agayat ken Jehova a Dios, agsipud ta dayta ti tumulong kadakuada a mangdaer kadagiti narigat a kasasaad ken pakadanagan.
Usigenyo ti maipapan ken ni Andrea, maysa kadagiti Saksi ni Jehova nga addaan iti dua nga annak. Kunana: “Babaen laeng iti kararag ken panangmennamennak kadagiti kari ni Jehova a mapabpabilegak nga agibtur no dumteng dagiti kanito a kumapuy ti pammatik. No kanayon a sipapanunotak iti kinapateg ni Jehova iti biagko, nalaklaka a taginayonen ti kinatibkerko.”
Pabilgenyo ti Pananginanamayo ken Jehova
Iti panangitampokna iti kinapateg ti panangnamnama ken Jehova, kinuna ti maysa a salmista: “Ti naruay a talna kukua dagidiay mangay-ayat iti lintegmo, ket awan ti pakaitibkolanda.” (Salmo 119:165) Nagdakkel ti maaramidan ti napasnek a panagadal iti Sao ti Dios tapno mapno ti panunot ken pusoyo kadagiti ‘bambanag a napudno, serioso a pakaseknan, nalinteg, nadalus, maay-ayat, naimbag ti pakasarsaritaanda, aniaman a nainaig iti kinasingpet, ken nadayaw.’ No sipapasnek a pagreggetanyo ti dumngeg, mangammo, mangawat, ken mangyaplikar kadagita a banag, “ti Dios ti talna addanto kadakayo.”—Filipos 4:8, 9.
Maibasar iti adun a tawen a kapadasanna, kastoy ti kuna ni John: “Tapno mabalbaliwak idi dagiti kapanunotak maipapan iti masanguanan, nasken a mangaramidak iti dakkel a panagbalbaliw iti personalidad ken panagpampanunotko tapno manamnamak a maaddaanak iti relasion iti perpekto ken di makita a Dios. Ti kakaisuna a pamay-an a mapatibkerko dayta a relasion ket babaen ti panagbalinko a naespirituan a tao. Ramanen dayta ti panangtuladko iti panagpampanunot ti Dios, nga ammuek ti kapanunotanna iti bambanag babaen ti panangbasak iti naipaltiing a Saona ken panangmennamennak iti dayta.”
No sagrapenyo ti makapabang-ar ken mangted-biag a danum ti kinapudno a linaon ti naipaltiing a Kasuratan, mangus-usarkayo iti epektibo ken nasuboken a pamay-an a pangsaranget iti kanayon ken nagadu a dakes a banag nga inaldaw nga iparparang ti media. Ti panangyaplikar iti ibagbaga ti Biblia pabilgenna met ti panagiinnayatyo a sangapamiliaan ken makatulong a mangpabassit iti pakadanagan. Maysa pay, ikarkari ti Dios nga isu ket nakasagana a ‘mangipakita iti pigsana maigapu kadagidiay a ti pusoda naan-anay kenkuana.’ (2 Cronicas 16:9) Risutennanto ti bambanag iti pamay-an nga awan a pulos ti pagbutngam.
Ni Phinehas, a nagbiag kabayatan ti gubat ken reprep a panangpapatay, kastoy ti kunana: “Nasursurok nga italek ti biagko iti naayat a panangaywan ni Jehova. Naliklikak ti adu a parikut gapu iti panangsurotko kadagiti prinsipio ti Biblia.” No talaga nga agtalekkayo ken Jehova a Dios, tulongannakayo a mangsaranget iti aniaman nga arig pader a pakarigatan. (Salmo 18:29) No ti maysa nga ubing ket nasinged kadagiti dadakkelna, masursurona ti naan-anay nga agtalek kadakuada ken mariknana ti kinatalged iti dennada uray no agsaksakit wenno marigrigatan. Kasta met ti mariknayo no agreggetkayo ken awatenyo ti awis a manginanamakayo ken Jehova.—Salmo 37:34.
Sigurado a Pundasion ti Namnama
Kinuna ni Jesus kadagiti pasurotna: “Agkararagkayo . . . a kastoy: ‘Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.’” (Mateo 6:9, 10) Dayta a nailangitan a Pagarian—maysa a gobierno nga iturayan ni Jesu-Kristo—ti pamay-an ti Dios a mangipakita iti kalinteganna a mangituray ditoy daga.—Salmo 2:7-12; Daniel 7:13, 14.
Ti adu a kita ti panagbuteng a mangap-apektar iti amin a paset ti biag ita ti nalawag a mangipakita a rumbeng a bumallaeten ti Dios. Makaparagsak ta asidegen dayta nga ibaballaetna! Kas ti Mesianiko nga Ari nga intronon ti Dios, naitaleken ken ni Jesu-Kristo ti autoridad a mangalangon iti kinasoberano ni Jehova ken mangsantipikar iti naganna. (Mateo 28:18) Din agbayag, ti turay ti Pagarian ket maiturongton ditoy daga tapno maikkat ti amin a banag a mangpatpataud iti buteng ken danag. Dinakamat ti Isaias 9:6 dagiti akem a mangipakita a maikari ni Jesus kas Agturay a makabael a mangikkat iti butengtayo. Kas pagarigan, ni Jesus ket naawagan iti “Agnanayon nga Ama,” “Nakaskasdaaw a Manangbalakad,” ken “Prinsipe ti Kappia.”
Utobenyo ti nadungngo nga ebkas nga “Agnanayon nga Ama.” Gapuna, addaan ni Jesus iti pannakabalin ken autoridad—ken iti tarigagay—a mangipanamnama iti agnanayon a biag ditoy daga kadagiti natulnog a tattao, babaen ti pateg ti daton a pangsubbotna. Kaipapanan dayta a mawayawayaandanton iti basol ken kinaimperpekto a natawidda manipud iti managbasol nga umuna a tao a ni Adan. (Mateo 20:28; Roma 5:12; 6:23) Usarento met ni Kristo ti inted ti Dios nga autoridadna a mangpagungar iti adu a natay.—Juan 11:25, 26.
Idi adda ditoy daga, impakita ni Jesus nga isu ket “Nakaskasdaaw a Manangbalakad.” Gapu iti pannakaammona iti Sao ti Dios ken ti naidumduma a pannakaawatna iti kababalin ti tao, ammo ni Jesus no kasano a risuten dagiti parikut iti inaldaw a biag. Sipud idi maitrono idiay langit, nagtultuloy ni Kristo kas ti “Nakaskasdaaw a Manangbalakad,” nga agserserbi kas ti kangrunaan a persona iti kalasugan nga us-usaren ni Jehova a makikomunikar iti sangatauan. Kanayon a nainsiriban ken perpekto ti balakad ni Jesus a nailanad iti Biblia. No ammuen ken patienyo dayta, mabalin a maaddaankayo iti biag nga awanan iti panagduadua ken mangpakapuy a buteng.
Iti Isaias 9:6, nayam-ammo pay ni Jesus kas ti “Prinsipe ti Kappia.” Babaen dayta nga akemna, iti din mabayag, usarenton ni Kristo ti pannakabalinna a mangikkat iti amin a kinaawan hustisia a gapuanan ti politika, diskriminasion, ken sistema ti ekonomia. Kasano? Babaen ti pannakaipasidong ti sangatauan iti maymaysa a natalna a panangituray ti Mesianiko a Pagarian.—Daniel 2:44.
Babaen ti turay ti Pagarian, agarinto ti manayon a talna iti intero a daga. Apay a masiguradoyo dayta? Mabasatayo iti Isaias 11:9 ti naipalgak a makagapu: “[Dagiti iturayan ti Pagarian] saandanto a mangaramid iti aniaman a panangdangran wenno mangpataud iti aniaman a panangdadael iti intero a nasantuan a bantayko; agsipud ta ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.” Amin a tattao ket maaddaanto met laengen iti umiso a pannakaammo maipapan iti Dios ken agbalindanton a natulnog kenkuana. Makaparagsak kadi kadakayo dayta a namnama? No wen, saanyon nga itantan ti gumun-od iti nakapatpateg a “pannakaammo ken Jehova.”
Magunggonaankayo iti makapabileg-pammati ken mangted-biag a pannakaammo maipapan iti Dios babaen ti panangsukimatyo iti talaga nga isursuro ti Biblia maipapan kadagiti pasamak iti panawentayo ken iti naraniag a masanguanan a naikari iti Biblia. Idagadagmi ngarud kadakayo nga awatenyo ti libre a programa ti panagadal iti Biblia nga ituktukon dagiti Saksi ni Jehova iti lugaryo. Maysa dayta a pamay-an tapno mapaksiatyo ti buteng ken masarakanyo ti pudno a namnama iti lubong a napno iti rigat.
[Kahon/Dagiti Ladawan iti panid 7]
No Apay a ti Pagarian a Gobierno Parayrayenna ti Namnama
Kas Ari iti Pagarian ti Dios, naikkan ni Jesu-Kristo iti abilidad ken kalintegan a mangituray iti uniberso. (Mateo 28:18) Isublinanto ti perpekto a kinabalanse ti ekolohia ti daga. Kabaelanna met a pagpatinggaen ti saksakit. Dagiti mannakabalin nga aramid idi ni Jesus ditoy daga ket panirpatan kadagiti nasaysayaat pay a bendision a masagrap iti sidong ti panagturayna kas perpekto ken mapangnamnamaan nga Agturay. Ania kadagiti galad daytoy a Mesianiko nga Ari a nailista ditoy baba ti nangnangruna a magustuam?
▪ Nalaka a maasitgan.—Marcos 10:13-16.
▪ Rasonable ken di mangidumduma.—Marcos 10:35-45.
▪ Responsable ken di managimbubukodan.—Mateo 4:5-7; Lucas 6:19.
▪ Nalinteg.—Isaias 11:3-5; Juan 5:30; 8:16.
▪ Sipapanunot iti kasapulan ti sabsabali, nakonsiderar, ken napakumbaba.—Juan 13:3-15.
[Ladawan iti panid 4]
Ti panagbasa iti Biblia ken panagmennamenna matulongannatayo a mangnamnama ken Jehova