Panangipakita iti Panagraem Kadagiti Sagrado a Taripnongtayo
“Iyegkonto met ida iti nasantuan a bantayko ket pagrag-oek ida iti uneg ti balayko a pagkararagan.”—ISAIAS 56:7.
1. Ania dagiti Nainkasuratan a rason no apay nga ipakitatayo ti umiso a panagraem kadagiti gimongtayo?
UM-UMMONGEN ni Jehova ti ilina, dagiti napulotan a Kristiano ken ti kakaduada tapno agdayawda kenkuana iti ‘nasantuan a bantayna.’ Parparagsakenna ida iti ‘balayna a pagkararagan,’ ti naespirituan a templona, a “balay a pagkararagan maipaay kadagiti amin a nasion.” (Isaias 56:7; Marcos 11:17) Dagita a naaramidan ni Jehova ti mangipakita a nasantuan, nadalus, ken natan-ok ti panagdayawtayo kenkuana. Babaen ti panangipakitatayo iti umiso a panagraem kadagiti gimongtayo tapno agadal ken agdayawtayo, mapaneknekantayo a tultuladentayo ti panangmatmat ni Jehova kadagiti sagrado a banag.
2. Ania ti mangipakita a para ken Jehova, sagrado a lugar ti pinilina a pagdayawan kenkuana ti ilina, ken kasano nga impakita ni Jesus a kasta met laeng ti panangmatmatna?
2 Iti nagkauna nga Israel, naibilang a sagrado ti lugar a pinili ni Jehova a pagdayawan kenkuana ti ilina. Ti tabernakulo agraman dagiti alikamen ken aruaten sadiay ket nasapsapuan ken nasantipikar “tapno pudno nga agbalinda a kasasantuan.” (Exodo 30:26-29) Ti dua a siled ti santuario ket naawagan iti “Nasantuan a Disso” ken “ti Kasasantuan.” (Hebreo 9:2, 3) Idi agangay, ti templo sadi Jerusalem ti naisukat iti tabernakulo. Kas sentro ti panagdayaw ken Jehova, ti Jerusalem ket naawagan iti “nasantuan a siudad.” (Nehemias 11:1; Mateo 27:53) Kabayatan ti ministeriona ditoy daga, impakita a mismo ni Jesus ti panagraemna iti templo. Nakaunget kadagiti tattao gapu iti awanan panagraem a panangusarda iti aglawlaw ti templo kas pagnegosioan ken kas panglintegan a dalanda.—Marcos 11:15, 16.
3. Ania ti mangipakita a sagrado ti panaggigimong idi dagiti Israelita?
3 Regular idi nga agtataripnong dagiti Israelita tapno agdayawda ken Jehova ken dumngeg iti pannakaibasa ti Lintegna. Ti sumagmamano nga aldaw kadagiti piestada ket naawagan iti nasantuan a kombension wenno nadaeg a gimong, a mangipakita iti kinasagrado dagita a taripnong. (Levitico 23:2, 3, 36, 37) Iti gimong ti publiko idi kaaldawan da Esdras ken Nehemias, dagiti Levita “inlawlawagda ti linteg kadagiti umili.” Yantangay “amin dagiti umili agsangsangitda idi bayat a dengdenggenda ti sasao ti linteg,” dagiti Levita “binilbilinda dagiti amin nga umili nga agulimekda, a kunkunada: ‘Agulimekkayo! ta daytoy nga aldaw nasantuan.’” Kalpasanna, rinambakan dagiti Israelita ti pito nga aldaw a Piesta Dagiti Abong-abong buyogen ti “dakkel unay a panagrag-o.” Kanayonanna, “mabasa idi a sipipigsa iti libro ti linteg ti pudno a Dios iti inaldaw, manipud iti umuna nga aldaw agingga iti maudi nga aldaw; ket inangayda ti piesta iti pito nga aldaw, ket iti maikawalo nga aldaw adda idi ti maysa a nadaeg nga asamblea, maitunos iti pagannurotan.” (Nehemias 8:7-11, 17, 18) Talaga a nasantuan dagidi nga okasion isu a naikalikagum kadagiti timmabuno a mangipakitada iti panagraem.
Dagiti Gimongtayo ket Sagrado a Taripnong
4, 5. Ania dagiti paset dagiti gimongtayo a mangpaneknek a sagrado dagita a taripnong?
4 Pudno nga awanen ti literal a nasantuan a siudad ni Jehova ditoy daga, nga addaan iti naisangsangayan a templo a mausar laeng iti panagdayaw kenkuana. Nupay kasta, ditay koma liplipatan a dagiti gimong agpaay iti panagdayaw ken Jehova ket sagrado a taripnong. Mamitlo kada lawas nga aggigimongtayo tapno basaen ken adalentayo dagiti Kasuratan. ‘Maibinsabinsa’ ti Sao ni Jehova, ket kas idi kaaldawan ni Nehemias, adda “panangipaay iti kaipapananna.” (Nehemias 8:8) Amin dagiti gimongtayo ket mangrugi ken agngudo babaen iti kararag. Iti kaaduan kadagitoy, agkansiontayo kadagiti kanta a mangidaydayaw ken Jehova. (Salmo 26:12) Rumbeng nga ipakitatayo ti kinapasnek ken panagraem kadagiti gimongtayo iti kongregasion agsipud ta dagita ket talaga a paset ti panagdayawtayo.
5 Bembendisionan ni Jehova ti ilina bayat nga agtataripnongda tapno agdayaw kenkuana, adalenda ti Saona, ken tagiragsakenda ti makaay-ayo a Nakristianuan a panaglalangen. No panawen ti gimong, masiguradotayo a sadiay nga ‘ibilin ni Jehova a maadda ti bendision.’ (Salmo 133:1, 3) Masagraptayo dayta a bendision no tumabuno ken dumngegtayo a naimbag iti naespirituan a programa. Kanayonanna, kastoy ti kinuna ni Jesus: “No sadino nga adda dua wenno tallo a naguurnong iti naganko, sadiay addaak iti nagtengngaanda.” Iti kontekstona, dagita a sasao ket agaplikar kadagiti Kristiano a panglakayen nga agmimiting tapno tamingenda dagiti nadagsen a parikut iti nagbaetan dagiti kakabsat. Nupay kasta, mabalin met nga agaplikar dayta kadagiti gimongtayo. (Mateo 18:20) No ni Kristo, babaen ti nasantuan nga espiritu, ket adda iti panaggigimong dagiti Kristiano a sangsangkamaysa iti naganna, saan kadi a rumbeng laeng nga ibilangtayo a sagrado dagita a taripnong?
6. Ania ti maikunatayo kadagiti pagtataripnongantayo, dadakkel man wenno babassit?
6 Agpayso a saan nga agnanaed ni Jehova kadagiti templo nga inaramid ti tattao. Nupay kasta, dagiti Kingdom Hall ket lugar ti pudno a panagdayaw. (Aramid 7:48; 17:24) Aggigimongtayo sadiay tapno agadal iti Sao ni Jehova, agkararag, ken agkanta iti panagdayaw kenkuana. Pudno met dayta kadagiti Assembly Hall nga us-usarentayo. Dagiti dadakkel a pasilidad a naabangan agpaay kadagiti kombensiontayo —kas kadagiti auditorium, exhibition hall, wenno istadium a maus-usar kadagiti paay-ayam—ket agbalin a lugar a pagdayawan bayat nga us-usarentayo dagita agpaay iti sagrado a taripnongtayo. Dagita nga okasion agpaay iti panagdayaw, dadakkel ken babassit, ket maikari iti panagraemtayo, ket rumbeng a maipakitatayo dayta iti kababalin ken tigtignaytayo.
Dagiti Wagas a Maipakitatayo ti Panagraem Kadagiti Taripnongtayo
7. Kasanotay a maipakita ti panagraemtayo kadagiti taripnongtayo?
7 Adda dagiti pamay-an a maipakitatayo ti panagraemtayo kadagiti taripnongtayo. Ti maysa ket babaen ti kaaddatayo kabayatan ti panagkansion kadagiti kanta ti Pagarian. Adu kadagitoy ti naisao kas karkararag, isu a rumbeng a nadayaw ti panangkantatayo kadagita. Kas panangadawna iti Salmo 22, kastoy ti insurat ni apostol Pablo a kinuna ni Jesus: “Ideklarakto ti naganmo iti kakabsatko; iti tengnga ti kongregasion idaydayawkanto babaen iti kanta.” (Hebreo 2:12) Gapuna, iyugalitayo koma nga addatayon iti tugawtayo sakbay nga idauluan ti tserman ti panagkantatayo. Kalpasanna, imutektekantayo ti kababagas dagiti lirikona bayat a kankantaentayo dayta. Ti panagkantatayo iparangarangna met koma ti rikna ti salmista a nangisurat kadagitoy a sasao: “Idayawkonto ni Jehova buyogen ti isuamin a pusok iti nasinged a bunggoy dagidiay napalungdo ken iti gimong.” (Salmo 111:1) Wen, ti panagkanta iti panagdayaw ken Jehova ket maysa a nagsayaat a rason tapno nasapatayo a sumangpet kadagiti gimongtayo ken agtalinaed agingga a malpas dayta.
8. Ania a pagarigan iti Biblia ti mangipakita a rumbeng a raementayo dagiti kararag kadagiti gimongtayo?
8 Ti sabali pay a paset a mangparayray iti amin a taripnongtayo ket ti naimpusuan a kararag a maidaulo agpaay kadagidiay amin a timmabuno. Naminsan, dagiti Kristiano idiay Jerusalem idi umuna a siglo nagtataripnongda ken “sangsangkamaysada a nangipigsa ti timekda iti Dios” iti nasged a kararag. Nagbanaganna, iti laksid ti panangidadanes, intultuloyda ti ‘situtured a panagsaoda maipapan iti sao ti Dios.’ (Aramid 4:24-31) Adda ngata dagiti nangipalubos nga agalla-alla ti panunotda kabayatan dayta a kararag? Awan, ta “sangsangkamaysada” a nagkararag. Dagiti kararag a mayebkas kadagiti gimongtayo ti mangyanninaw iti rikna ti amin a timmabuno. Maikari dagitoy iti panagraemtayo.
9. Babaen iti panagkawkawes ken kababalintayo, kasanotay a maipakita ti panagraemtayo iti kinasagrado dagiti taripnongtayo?
9 Kanayonanna, maipakitatayo ti nauneg a panagraemtayo iti kinasagrado ti taripnongtayo babaen ti panagkawkawestayo. Ti langatayo agraman ti panagkawkawes ken estilo ti buoktayo nagdakkel ti maaramidanda tapno ad-adda a maipakitatayo a mararaem dagiti gimongtayo. Kastoy ti imbalakad ni apostol Pablo: “Tarigagayak nga iti tunggal lugar agtultuloy koma nga agkararag dagiti lallaki, nga itag-ayda ti nasungdo nga im-ima, naisina iti pungtot ken debdebate. Kasta met a tarigagayak a dagiti babbai arkosanda ti bagbagida iti naimbag-pannakaurnosna a kawes, buyogen ti kinaemma ken kinasimbeng ti panunot, saan a kadagiti estilo a panangsallapid iti buok ken balitok wenno kadagiti perlas wenno nangina unay a lupot, no di ket iti wagas a maitutop kadagiti babbai nga agkunkuna nga agraemda unay iti Dios.” (1 Timoteo 2:8-10) No tumabunotayo kadagiti dadakkel a kombension a maangay kadagiti istadium a saan unay a naatepan, mabalintay ti agkawes sigun iti kasasaad ti paniempo ngem kaskasdi a natakneng koma. Kanayonanna, ti panagraemtayo iti dayta nga okasion ti makatulong kadatayo a mangliklik iti pannangan wenno panagngalngal iti bubble gum kabayatan dagiti sesion. Ti umiso a panagkawkawes ken kababalin kadagiti taripnongtayo ti mangitandudo ken Jehova a Dios, iti panagdayawtayo kenkuana, ken kadagiti kapammatiantayo.
Kababalin a Maitutop iti Sangakabbalayan ti Dios
10. Kasano nga impakita ni apostol Pablo a kasapulan ti nangato a pagalagadan ti kababalin kadagiti Nakristianuan a gimongtayo?
10 Iti 1 Corinto, kapitulo 14, masarakantayo ti nainsiriban a balakad ni apostol Pablo maipapan iti rumbeng a pannakaangay dagiti Nakristianuan a gimong. Kinunana: “Ti amin a bambanag maaramid koma a sitatakneng ken sigun iti urnos.” (1 Corinto 14:40) Dagiti gimongtayo ket napateg a paset ti aktibidad ti kongregasion Kristiano, isu a masapul nga ipakitatayo ti kababalin a maitutop iti sangakabbalayan ni Jehova.
11, 12. (a) Ania ti masapul a maipaganetget kadagiti annaktayo a tumabtabuno kadagiti gimongtayo? (b) Kadagiti gimongtayo, kasano ti maitutop a panangyebkas dagiti ubbing iti pammatida?
11 Masapul a maisuro a nangnangruna kadagiti ubbing no kasanoda nga agtignay a sitatakneng kadagiti gimongtayo. Dagiti Kristiano a nagannak rumbeng nga ilawlawagda kadagiti annakda a ti Kingdom Hall ken ti pakaangayan ti Panagadal iti Libro ti Kongregasion ket saan a lugar a pagay-ayaman. Mausar dagita a lugar iti panagdayawtayo ken Jehova ken iti panagadaltayo iti Saona. Kastoy ti insurat ni masirib nga Ari Solomon: “Saluadam dagita sakam kaanoman a mapanka iti balay ti pudno a Dios; ket adda koma iyaadani a dumngeg.” (Eclesiastes 5:1) Insuro ni Moises kadagiti Israelita nga agtataripnong a sangsangkamaysa dagiti natataengan ken “ubbing.” Kinunana: “Ummongem dagiti umili . . . tapno makapagimdengda ken tapno makasursuroda, yantangay masapul nga agbutengda ken Jehova a Diosyo ken annadanda nga itungpal ti amin a sasao daytoy a linteg. Ket ti annakda a saan a nakaammo rebbeng nga umimdengda, ket masapul a masursuroda ti agbuteng ken Jehova.”—Deuteronomio 31:12, 13.
12 Umasping ita, makigimong dagiti ubbing pay nga annak a kadua dagiti nagannakda nangnangruna tapno agimdeng ken agsursuroda. Apaman nga ammodan ti agatension ken maawatandan dagiti pamunganayan a kinapudno nga isursuro ti Biblia, dagiti ubbing kabaelandanto metten ti mangaramid iti “publiko a panangideklara” iti pammatida babaen kadagiti ababa a komentoda. (Roma 10:10) Ti ubing ket mabalin a mangrugi babaen ti panangibagana iti sumagmamano a sasao kas sungbat iti saludsod a maawatanna. Iti damo, mabalin a basaenna ti sungbatna, ngem inton agangay, padasennan ti sumungbat babaen ti bukodna a sasao. Makagunggona ken makaparagsak dayta para iti ubing, ket ti kasta a situtulok a panangyebkasna iti pammatina ti mangparagsak kadagiti natataengan a timmabuno. Gagangay a dagiti nagannak ti mangipakita iti ulidan babaen ti panagkomentoda a mismo. No mabalin, nasayaat no ti tunggal ubing adda koma bukodna a Biblia, libro a pagkantaan, ken kopia ti publikasion a maad-adal. Rumbeng a maisuro kadakuada ti umiso a panagraem kadagita a publikasion. Dagita ti mangipaganetget kadagiti ubbing a sagrado dagiti taripnongtayo.
13. Ania koma ti namnamaentayo kadagidiay damo a tumabuno kadagiti gimongtayo?
13 Siempre, ditay kayat a pagbalinen dagiti gimongtayo a kas iti misa dagiti relihion ti Kakristianuan. Dagita ket awanan pannakaseknan ken aginsasanto wenno naarimbangaw a kas kadagiti konsierto ti rock. Kayattayo a nainggayyeman ken makaawis dagiti gimongtayo iti Kingdom Hall ngem saan nga agingga iti punto nga agbalin dayta a kasla sosial a timpuyog. Aggigimongtayo tapno agdaydayaw ken Jehova, isu a rumbeng a kanayon a nadayaw dagiti gimongtayo. Ti koma manamnamatayo a reaksion dagidiay damo a tumabuno, kalpasan a nangngegda ti naipalawag ken naimatanganda ti kababalintayo ken ti kababalin dagiti annaktayo, ket ti panangibagada kadatayo a “ti Dios pudno nga adda iti tengngayo.”—1 Corinto 14:25.
Permanente a Paset ti Panagdayawtayo
14, 15. (a) Kasanotay a maliklikan ti ‘panangliway iti balay ti Diostayo’? (b) Kasano a matungtungpalen ti Isaias 66:23?
14 Kas nadakamaten, um-ummongen ni Jehova ti ilina ken parparagsakenna ida iti uneg ti ‘balayna a pagkararagan,’ ti naespirituan a templona. (Isaias 56:7) Pinalagipan ni matalek a Nehemias dagiti padana a Judio a rumbeng nga ipakitada ti umiso a panagraem iti literal a templo babaen ti panangipaayda iti material a suportada. Kinunana: “Rebbeng a saantay a liwayan ti balay ti Diostayo.” (Nehemias 10:39) Kanayonanna, ditay koma paayen ti awis ni Jehova nga agdayawtayo kenkuana iti ‘balayna a pagkararagan.’
15 Kas panangipakita iti kinapateg ti regular a panaggigimong tapno agdaydayaw, kastoy ti impadto ni Isaias: “‘Pudno unay a mapasamakto a manipud iti baro a bulan agingga iti baro a bulan ken manipud iti sabbath agingga iti sabbath isuamin a lasag umaydanto agruknoy iti sanguanak,’ kinuna ni Jehova.” (Isaias 66:23) Mapaspasamaken dayta iti kaaldawantayo. Regular, iti kada lawas ti kada bulan nga agtataripnong dagiti dedikado a Kristiano tapno agdayawda ken Jehova. Karaman kadagiti dadduma a wagas a panangaramidda iti daytoy ket babaen ti itatabuno kadagiti Nakristianuan a gimong ken pannakiraman iti panangasaba. Maysaka kadi kadagidiay regular nga ‘um-umay ken agrukruknoy iti sanguanan ni Jehova’?
16. Apay a ti regular a pannakigimong ket rumbeng a permanente a paset ti biagtayo ita?
16 Ti Isaias 66:23 ket matungpalto iti naan-anay a wagas iti inkari ni Jehova a baro a lubong. Iti dayta a tiempo, “isuamin a lasag,” literal nga ‘umaydanto agruknoy iti sanguananna,’ wenno agdaydayawda ken Jehova iti linawas ken binulan iti agnanayon. Yantangay ti panaggigimongtayo tapno agdayaw ken Jehova ket permanente a paset ti naespirituan a panagbiagtayo idiay baro a sistema ti bambanag, saan kadi a rumbeng laeng a pagbalinentayo itan a permanente a paset ti biagtayo ti regular nga itatabuno kadagiti sagrado a taripnongtayo?
17. Apay a masapul nga aggigimongtayo ‘nangnangruna a kasta bayat a makitkitatayo nga umas-asidegen ti aldaw’?
17 Bayat nga umad-adanin ti panungpalan, ad-adda koma a determinadotayo a tumabuno kadagiti Nakristianuan a taripnongtayo tapno agdayawtayo. Kas panagraem iti kinasagrado dagiti gimongtayo, ditay ipalubos a ti panggedantayo, leksion idiay eskuelaan, wenno ti panageskuela iti rabii ti makagapu a maliwayantayo ti regular a pannakigimong a kadua dagiti kapammatiantayo. Kasapulantayo ti pammabileg nga agtaud iti panagtitimpuyogtayo. Dagiti gimongtayo iti kongregasion ti mangipapaay kadatayo iti gundaway nga agiinnammo, agpipinnabileg, ken agpipinnaregta iti “ayat ken nasayaat nga ar-aramid.” Nasken nga aramidentayo dayta ‘nangnangruna a kasta bayat a makitkitatayo nga umas-asidegen ti aldaw.’ (Hebreo 10:24, 25) Sapay koma ngarud ta kanayon nga ipakitatayo ti umiso a panagraem kadagiti sagrado a taripnongtayo babaen ti regular nga itatabuno, maitutop a panagkawkawes, ken naimbag a kababalin. No aramidentayo ti kasta, ipakpakitatayo a tultuladentayo ti panangmatmat ni Jehova kadagiti sagrado a bambanag.
Kas Pangrepaso
• Ania ti mangipakita a rumbeng a maibilang a sagrado dagiti taripnong ti ili ni Jehova?
• Aniada a paset dagiti gimongtayo ti mangpaneknek a sagrado dagita a taripnong?
• Kasano a maipakita dagiti ubbing a raraemenda ti kinasagrado dagiti gimongtayo?
• Apay a rumbeng a pagbalinentayo a permanente a paset ti biagtayo ti regular a pannakigimong?
[Ladawan iti panid 28]
Dagiti gimong tapno agdayawtayo ken Jehova ket sagrado a taripnong sadinoman ti pakaangayanda
[Ladawan iti panid 31]
Makigimong dagiti ubbing pay nga annaktayo tapno agimdeng ken agsursuroda