Ti Di Maartapan a Pateg ti Nadiosan nga Edukasion
“Pudno nga ibilangko met ti amin a bambanag kas pukaw maigapu iti naringbaw a pateg ti pannakaammo ken Kristo Jesus.”—FIL. 3:8.
1, 2. Ania ti inkeddeng ti dadduma a Kristiano, ken apay?
NALAING iti eskuelaan ni Robert sipud pay kinaubingna. Idi walo ti tawenna, simmarungkar iti pagtaenganda ti maysa kadagiti maestrana ket kinunana nga adu ti mabalinto a magapuananna. Namnamaenna nga agbalinto ni Robert a maysa a doktor. Gapu iti nangato a gradona iti haiskul, kualipikado nga ageskuela iti aniaman a kasayaatan nga unibersidad iti pagilianda. Ngem saan nga inawat ni Robert ti ibilang ti adu kas naisangsangayan nga oportunidad tapno maragpatna ti kalatna nga agbalin kas regular pioneer.
2 Kas ken Robert, adu a Kristiano—agtutubo ken nataengan—ti addaan iti oportunidad a rumang-ay iti agdama a sistema ti bambanag. Dadduma ti nangikeddeng a saanda a naan-anay a gundawayan dagita nga oportunidad tapno maragpatda dagiti naespirituan a kalatda. (1 Cor. 7:29-31) Ania ti nangtignay kadagiti Kristiano a kas ken Robert tapno ipamaysada ti biagda iti trabaho a panangasaba? Ti kangrunaan a rason ket ti panagayatda ken Jehova. Malaksid iti dayta, apresiarenda ti kinapateg ti panangisuro kadakuada ti Dios. Pinampanunotmo kadin no ania ti biagmo no saanmo a naammuan ti kinapudno? Ti panangutob iti dadduma a naisangsangayan a bendision a tagtagiragsakentayo gapu ta sinursuruannatayo ni Jehova ket makatulong a mangtaginayon iti panangipategtayo iti naimbag a damag ken ad-adda a mangparegta kadatayo a mangiranud iti dayta.
Pribilehio ti Agpaisuro iti Dios
3. Apay a masiguradotayo a sidadaan ni Jehova a mangisuro kadagiti imperpekto a tattao?
3 Gapu iti kinaimbagna, sidadaan ni Jehova a mangisuro kadagiti imperpekto a tattao. Kuna ti padto iti Isaias 54:13 maipapan kadagiti napulotan a Kristiano: “Amin nga annakmo tattaonto a sinursuruan ni Jehova, ket ti talna ti annakmo naruayto.” Agaplikar met dagita a sasao kadagiti “sabsabali a karnero” ni Kristo. (Juan 10:16) Nabatad dayta iti padto a matungtungpal iti kaaldawantayo. Nasirmata ni Isaias dagiti tattao manipud iti amin a nasion nga agturturong iti pudno a panagdayaw. Inladawanna ida a mangibagbaga iti tunggal maysa: “Sumang-attayo iti bantay ni Jehova, iti balay ti Dios ni Jacob; ket isuronatayto maipapan kadagiti dalanna, ket magnatayto kadagiti danana.” (Isa. 2:1-3) Anian a pribilehio ti agpaisuro iti Dios!
4. Ania ti ikalikagum ni Jehova kadagidiay isurona?
4 Kasanotayo a makualipikar nga agpaisuro iti Dios? Ti kangrunaan a maikalikagum ket ti panagbalin a naemma ken nalaka a maisuro. Insurat ni salmista David: “Naimbag ken nalinteg ni Jehova. . . . Kadagidiay naemma isuronanto ti dalanna.” (Sal. 25:8, 9) Ken kinuna ni Jesus: “Idaydayawka iti publiko, Ama, Apo ti langit ken daga, agsipud ta dagitoy a banag siaannad nga inlimedmo kadagiti mamasirib ken nasasaririt, ket impalgakmo ida kadagiti maladaga.” (Luc. 10:21) Saan kadi nga umasideg ti riknam iti Dios a “mangted iti di kaikarian a kinamanangngaasi kadagiti napakumbaba”?—1 Ped. 5:5.
5. Iti ania laeng a pamay-an a naammuantayo ti kinapudno maipapan iti Dios?
5 Kas adipen ni Jehova, ipagaputayo kadi iti bagitayo a naammuantayo ti kinapudno? Saan. Kinapudnona, saantay a pulos a naam-ammo ti Dios no iti kabukbukodantayo laeng. Kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” (Juan 6:44) Babaen ti trabaho a panangasaba ken iti nasantuan nga espirituna, ur-urnongen ni Jehova dagiti marakarnero a tattao, ‘dagiti matarigagayan a banag kadagiti amin a nasion.’ (Hag. 2:7) Saanka kadi a maragsakan a maysaka kadagiti inyadani ni Jehova iti Anakna?—Basaen ti Jeremias 9:23, 24.
Nabileg a Mangbalbaliw iti Biag
6. Ania ti naisangsangayan nga epektona kadagiti tattao ti pananggun-od iti “pannakaammo ken Jehova”?
6 Babaen iti napintas nga ilustrasion, inladawan ti padto ni Isaias ti panagbalbaliw ti personalidad ti tao a mapaspasamak iti kaaldawantayo. Dagiti dati a naranggas a tattao nagbalinda a mannakikappia. (Basaen ti Isaias 11:6-9.) Dagiti dati nga agkabusor gapu iti nagduma a puli, nasionalidad, tribu, wenno kultura, nasursuroda ti agbiag buyogen ti panagkaykaysa. Arigna a ‘pinitpitda dagiti kampilanda a pinagbalinda a subsob ti arado.’ (Isa. 2:4) Ania ti pakaigapuan dagita a naisangsangayan a panagbalbaliw? Gapu ta nanggun-od dagiti tattao iti “pannakaammo ken Jehova” ken inyaplikarda dayta. Nupay imperpekto dagiti adipen ti Dios, agbibiagda kas maysa a pudno nga internasional nga agkakabsat. Gapu ta makaay-ayo iti amin a kita ti tao ti naimbag a damag ken ti nagsayaat a resultana, pammaneknek dayta a di maartapan ti pateg ti nadiosan nga edukasion.—Mat. 11:19.
7, 8. (a) Ania ti sumagmamano kadagiti “natibker ti pannakasarikedkedna a bambanag” a pakawayawayaan dagiti tattao babaen ti nadiosan nga edukasion? (b) Ania ti mangipakita a mangyeg iti pakaidayawan ni Jehova ti nadiosan nga edukasion?
7 Sigun ken apostol Pablo, ti ministerio dagiti adipen ti Dios ket mayarig iti naespirituan a pannakidangadang. Insuratna: “Dagiti igam ti pannakigubatmi saan a nainlasagan, ngem mannakabalin babaen iti Dios a maipaay a pangbalintuag iti natibker ti pannakasarikedkedna a bambanag. Ta ibalbalintuagmi dagiti panagrasrason ken tunggal natan-ok a banag a naibangon maibusor iti pannakaammo iti Dios.” (2 Cor. 10:4, 5) Ania ti sumagmamano kadagiti “natibker ti pannakasarikedkedna a bambanag” a pakawayawayaan dagiti tattao babaen ti nadiosan nga edukasion? Ti sumagmamano ket ti pannakaadipen manipud kadagiti palso a pannursuro, an-anito, ken pilosopia dagiti tattao. (Col. 2:8) Ti nadiosan nga edukasion tulonganna dagiti tattao a mangiwaksi kadagiti dakes nga aramid ken mangsukay kadagiti nadiosan a galad. (1 Cor. 6:9-11) Pasayaatenna pay ti biag ti pamilia. Ken ikkanna iti pudno a panggep ti biag dagiti awanan iti namnama. Daytoy a kita ti edukasion ti kasapulantayo ita.
8 Ti maysa kadagiti galad a pangtulongan ni Jehova kadagiti tattao tapno mapatanorda ket ti kinamapagpiaran, kas ipakita ti sumaganad a kapadasan. (Heb. 13:18) Maysa a babai idiay India ti nagpayadal iti Biblia ken nakualipikar kas di bautisado nga agibumbunannag idi agangay. Naminsan, iti panagawidna manipud iti pagibangonan iti Kingdom Hall, napidutna iti asideg ti estasion ti bus ti maysa a balitok nga alahas nga agpateg iti walo gasut a doliar (U.S.). Nupay narigat ti biagna, impanna dayta iti estasion ti polis. Saan a makappapati ti polis! Kalpasanna, insaludsod ti sabali pay a polis, “Apay nga insublim ti alahas?” Inlawlawag ti babai, “Nasursurok ti agbalin a mapagpiaran gapu iti Biblia.” Gapu ta nasdaaw, kinuna ti polis iti panglakayen ti kongregasion a nangkuyog iti babai a napan iti estasion: “Adda nasurok a 38 a milion a tattao iti daytoy nga estado. No matulonganyo ti sangapulo a tattao nga agbalin a kas iti daytoy a babai, dakkelen a gapuanan dayta.” No panunotentayo ti minilionen a tattao a natulongan ti nadiosan nga edukasion nga agbalbaliw, saan kadi nga addaantayo iti aglaplapusanan a rason a mangidaydayaw ken Jehova?
9. Kasano a makaaramid dagiti tattao kadagiti dakkel a panagbalbaliw?
9 Ti pannakabalin ti Sao ti Dios a mamagbalbaliw agraman ti tulong nga ipapaay ni Jehova babaen ti nasantuan nga espiritu tulonganna dagiti tattao a mangaramid kadagiti dakkel a panagbalbaliw. (Roma 12:2; Gal. 5:22, 23) Kuna ti Colosas 3:10: “Kawesanyo ti bagbagiyo iti baro a personalidad, a babaen iti umiso a pannakaammo mapabpabaro maitunos iti ladawan Daydiay nangparsua iti dayta.” Ti mensahe ti Sao ti Dios, ti Biblia ket addaan iti pannakabalin a mangipalgak iti pudno a kinatao ti maysa ken kabaelanna a balbaliwan ti panagpampanunot ken uray pay ti panagriknana kadagiti bambanag. (Basaen ti Hebreo 4:12.) Posible a ti maysa ket agbalin a gayyem ti Dios ken maaddaan iti namnama nga agbiag nga agnanayon babaen ti pananggun-odna iti umiso a pannakaammo ti Biblia ken ti panagbiagna a maitunos iti nalinteg a pagalagadan ni Jehova.
Panagsagana Para iti Masanguanan
10. (a) Apay a ni laeng Jehova ti makatulong kadatayo nga agsagana para iti masanguanan? (b) Ania a dakkel a panagbalbaliw ti mapasamakto iti intero a daga?
10 Ni laeng Jehova ti makatulong kadatayo nga agsagana gapu ta ammona ti mapasamak iti masanguanan ken no ania ti masakbayan ti sangatauan. (Isa. 46:9, 10) Ipalgak ti padto ti Biblia a “ti dakkel nga aldaw ni Jehova asidegen.” (Sof. 1:14) No maipapan iti dayta nga aldaw, pumudnonto ti kuna ti Proverbio 11:4: “Ti agkakapateg a bambanag saanto a pakagunggonaan iti aldaw ti rungsot, ngem ti met laeng kinalinteg mangispalto manipud ken patay.” Inton iwayat ni Jehova ti panangdadaelna iti lubong ni Satanas, ti napateg ket no ania ti takdertayo iti Dios. Awanto ti serserbi ti kuarta. Kinapudnona, kuna ti Ezequiel 7:19: “Kadagiti kalsada ipuruakdanto ti mismo a pirakda, ket ti bukodda a balitok agbalinto a makaparurod a banag.” Dayta a pannakaammo iti masanguanan ti tumulong kadatayo nga agtignay a nainsiriban.
11. Ania ti maysa a pamay-an a matulongannatayo ti nadiosan nga edukasion nga agsagana para iti masanguanan?
11 Ti maysa a naisangsangayan a pamay-an nga isagananatayo ti nadiosan nga edukasion para iti umad-adani nga aldaw ni Jehova ket ti panangtulongna kadatayo a mangipasdek kadagiti umiso a prioridad. Ni apostol Pablo insuratna ken Timoteo: “Ibilinmo kadagidiay babaknang itoy agdama a sistema ti bambanag a saanda koma a napalangguad, ken isadagda ti namnamada, saan nga iti pagduaduaan a kinabaknang, no di ket iti Dios.” Uray no saantayo a nabaknang, magunggonaantayo iti dayta a naipaltiing a balakad ti Dios. Ania ti ramanenna? Imbes nga agurnongtayo iti material a kinabaknang, masapul nga ikagumaantayo ti ‘agaramid iti naimbag’ ken ‘agbalin a nabaknang iti nasayaat nga aramid.’ Babaen ti panangyun-una kadagiti naespirituan a bambanag, ‘agur-urnongtayo maipaay iti bagbagitayo iti nasayaat a pamuon.’ (1 Tim. 6:17-19) Kinasirib ti kasta a panagsakripisio ta kinuna ni Jesus, “ania ti magunggonanto ti maysa a tao no magun-odna ti intero a lubong ngem mapukawna ti kararuana?” (Mat. 16:26, 27) Gapu iti kinaasideg ti aldaw ni Jehova, masapul nga usigen ti tunggal maysa kadatayo: ‘Sadino ti pagur-urnongak iti gameng? Agpapaadipenak kadi iti Dios wenno iti Kinabaknang?’—Mat. 6:19, 20, 24.
12. Apay a ditay sumuko no tagibassiten ti dadduma ti ministeriotayo?
12 Ti kangrunaan kadagiti ‘aramid a naimbag’ a nailanad iti Sao ti Dios agpaay kadagiti Kristiano ket ti mangispal-biag a trabaho a panangasaba ken panagaramid iti adalan. (Mat. 24:14; 28:19, 20) Kas idi umuna a siglo, dadduma ti mabalin a mangtagibassit iti ministeriotayo. (Basaen ti 1 Corinto 1:18-21.) Ngem saan a dayta ti mangkissay iti pateg ti mensahetayo ken ti panangipaay iti tunggal maysa iti gundaway a mangipakita iti pammatida bayat nga adda pay tiempo. (Roma 10:13, 14) Bayat a tulongantayo ti dadduma a magunggonaan iti nadiosan nga edukasion, posible a masagraptayto ti adu a bendision.
Bendision nga Itden ti Panagsakripisio
13. Ania dagiti insakripisio ni apostol Pablo gapu iti naimbag a damag?
13 Sakbay a nagbalin a Kristiano ni apostol Pablo, masansanay idi nga agbalin a natan-ok iti kagimongan dagiti Judio. Nalabit a sakbay nga agtawen iti 13, immakar idiay Jerusalem manipud iti nakayanakanna a siudad ti Tarso tapno agsursuro iti sakaanan ti mararaem a mannursuro iti Linteg a ni Gamaliel. (Ara. 22:3) Idi agangay, nagbalin a nalalaing ni Pablo ngem kadagiti kasadaranna ken no nagtultuloy koma iti dayta, posible a nagbalin a natan-ok iti Judaismo. (Gal. 1:13, 14) Idi inawatna ti naimbag a damag ken nangrugi a mangasaba, tinallikudanna amin dagita. Nagbabawyan kadi ni Pablo dayta a pangngeddengna? Saan. Kinapudnona, insuratna: “Pudno nga ibilangko met ti amin a bambanag kas pukaw maigapu iti naringbaw a pateg ti pannakaammo ken Kristo Jesus nga Apok. Maigapu kenkuana inawatko ti pannakaipukaw ti amin a bambanag ket ibilangko ida kas adu a basura.”—Fil. 3:8.
14, 15. Ania dagiti bendision a masagraptayo kas ‘katrabahuan ti Dios’?
14 Kas ken Pablo, agsaksakripisio met dagiti Kristiano ita gapu iti naimbag a damag. (Mar. 10:29, 30) Agkurkurang kadi ti kasapulantayo gapu iti panangaramidtayo iti dayta? Ni Robert, a nadakamat iti rugi, inyebkasna ti narikna met ti adu: “Awan a pulos ti pagbabawyak. Ti amin-tiempo a ministerio ti nangyeg kaniak iti rag-o ken pannakapnek ken inikkannak iti gundaway a ‘mangnanam ken mangkita a ni Jehova ket naimbag.’ Tunggal isakripisiok ti material a bambanag tapno ragpatek dagiti naespirituan a kalat, kanayon a bendisionannak ni Jehova iti ad-adu ngem iti insakripisiok. Kasla awan ti insakripisiok. Nagganansiaak pay ketdi!”—Sal. 34:8; Prov. 10:22.
15 No nabayagen a makiramramanka iti panangasaba ken panangisuro, awan duadua a nananammo ken nakitam a ni Jehova ket naimbag. Adda kadi gundaway a nariknam ti tulong ti espirituna bayat nga ikaskasabam ti naimbag a damag? Nakitam kadi no kasano a naragsakan dagiti dadduma bayat a linuktan ni Jehova ti pusoda nga umimdeng iti mensahe? (Ara. 16:14) Tinulongannaka kadi ni Jehova a nangdaer kadagiti lapped, nalabit tapno mapalawam ti ministeriom? Tinulongannaka kadi bayat dagiti pakarigatam tapno maitultuloymo ti agserbi kenkuana uray kadagiti panawen a kasla napaksuyankan? (Fil. 4:13) No personal a nariknatayo ti tulong ni Jehova bayat nga itungtungpaltayo ti ministeriotayo, ad-adda a suminged ken bumileg ti pammatitayo kenkuana. (Isa. 41:10) Saan kadi a maysa a bendision ti agbalin a ‘katrabahuan ti Dios’ iti naindaklan a trabaho ti nadiosan nga edukasion?—1 Cor. 3:9.
16. Ania ti panangmatmatmo kadagiti panagregget ken sakripisiom mainaig iti nadiosan nga edukasion?
16 Adu a tattao ti mayat a makairingpas iti maysa a banag nga agpaut ti pategna bayat ti panagbiagda. Ngem uray dagiti naisangsangayan a gapuanan ti lubong ita masansan a malipatandanton. Nupay kasta, agnanayon a malaglagipto ti ili ni Jehova dagiti trabaho nga itungtungpal ti Dios ita mainaig iti pannakasantipikar ti naganna. (Prov. 10:7; Heb. 6:10) Sapay koma ta tagipatgentayo ti pribilehio a pannakiraman iti nadiosan nga edukasion a dinto pulos malipatan.
Ania ti Sungbatyo?
• Ania ti kalikaguman ni Jehova kadagidiay isurona?
• Kasano a ti nadiosan nga edukasion pasayaatenna ti biag dagiti tattao?
• Kadagiti ania a pamay-an a mabendisionantayo gapu iti panangtulong kadagiti sabsabali a magunggonaan iti nadiosan nga edukasion?
[Ladawan iti panid 23]
Dagidiay sinursuruan ni Jehova buklenda ti pudno nga internasional a panagkakabsat
[Ladawan iti panid 24]
Saan kadi a maysa a bendision ti agbalin a ‘katrabahuan ti Dios’?