Magnatayo iti Nagan ni Jehova a Diostayo

“Datayo, iti biangtayo, magnatayto iti nagan ni Jehova a Diostayo agingga iti tiempo a di nakedngan, iti mismo nga agnanayon.”​—MIKIAS 4:5.

1. No maipapan iti moralidad, ania ti kasasaad idi kaaldawan ni Noe, ken kasano a naiduma ni Noe?

NI Enoc ti nadakamat iti Biblia a kaunaan a tao a nakipagna iti Dios. Ni Noe ti maikadua. Ibaga kadatayo ti rekord: “Ni Noe maysa a lalaki a nalinteg. Pinaneknekanna ti bagina nga awan pagkuranganna iti tengnga dagiti kapatadanna. Ni Noe nakipagna iti pudno a Dios.” (Genesis 6:9) Idi kaaldawan ni Noe, kaaduan a tattao ti simiasi manipud iti nasin-aw a panagdayaw. Ad-adda a dimmakes ti kasasaad gapu kadagiti rebelioso nga anghel a di nakaisigudan a nakidenna kadagiti babbai ket nagbunga dayta kadagiti annak a naawagan Nefilim, “dagidiay mannakabalin,” wenno “agdindinamag a lallaki,” kadagidi nga aldaw. Saan a pakasdaawan a napno idi ti daga iti kinaranggas! (Genesis 6:2, 4, 11) Kaskasdi, pinaneknekan ni Noe nga awan pagkuranganna ken “maysa a manangaskasaba iti kinalinteg.” (2 Pedro 2:5) Idi binilin ni Jehova a mangbangon iti maysa a daong a mangispal iti biag, situtulnog nga “inaramid ni Noe ti maitunos iti isuamin nga imbilin kenkuana ti Dios. Inaramidna ti kasta met laeng.” (Genesis 6:22) Pudno a nakipagna ni Noe iti Dios.

2, 3. Ania a nasayaat nga ulidan ti impasdek ni Noe agpaay kadatayo?

² Ni Pablo inramanna ni Noe iti listaan dagiti matalek a saksi idi insuratna: “Babaen iti pammati, kalpasan a naipaayan iti nadibinuan a pakdaar maipapan iti bambanag a saan pay a nakita, nangipakita ni Noe iti nadiosan a buteng ket nangibangon iti daong a pakaisalakanan ti sangakabbalayanna; ket babaen itoy a pammati kinondenarna ti lubong, ket isu nagbalin nga agtawid iti kinalinteg a maitunos iti pammati.” (Hebreo 11:7) Anian a nagsayaat nga ulidan! Gapu ta agtalek a matungpal ti sasao ni Jehova, nangbusbos ni Noe iti panawen, pigsa, ken ik-ikutanna tapno maibanagna ti imbilin ti Dios. Umasping iti dayta, adu ita ti nangtallikud kadagiti sekular nga oportunidad iti daytoy a lubong ket binusbosda ti panawen, pigsa, ken ik-ikutanda tapno matungpalda dagiti bilin ni Jehova. Mapagwadan ti pammatida ken agresulta dayta iti pannakaisalakan ti biagda, agraman ti biag dagiti dadduma.​—Lucas 16:9; 1 Timoteo 4:16.

³ No iti biang ni Noe ken iti pamiliana, nagrigat la ketdi idi nga annuroten ti pammati kas iti napasaran ni Enoc, ti apong ni Noe, a nausig iti immuna nga artikulo. Kas idi kaaldawan ni Enoc, manmano dagiti pudno nga agdaydayaw idi kaaldawan ni Noe​—walo laeng a matalek a tattao a nakalasat iti Layus. Inkasaba ni Noe ti kinalinteg iti maysa a naranggas ken imoral a lubong. Maysa pay, nasken a mangbangonda iti dakkel a kayo a daong kas panagsagana iti sangalubongan a layus, nupay awan pay idi ti nakakita iti kasta a layus. Masmasdaaw la ketdi dagidiay mangpalpaliiw kadakuada.

4. Ania ti pinagminar ni Jesus a nagkurangan dagiti tattao idi kaaldawan ni Noe?

⁴ Nakakadkadlaw ta idi tinukoy ni Jesus ti kaaldawan ni Noe, saanna a dinakamat ti kinaranggas, palso a relihion, wenno imoralidad nga agraraira idi​—nupay pudno a nakaro dagita. Ti pinagminar ni Jesus a nagkurangan dagiti tattao ket isu ti saanda a panangipangag iti pakdaar. Kinunana a “mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a simrek ni Noe iti daong.” Mangmangan, umin-inum, mangas-asawa​—ania koma ti dakes iti dayta? “Normal” laeng dagita iti biag! Ngem adda mapaspasungadan a layus, ket ikaskasaba ni Noe ti kinalinteg. Nagserbi koma a pakdaar kadakuada ti sinao ken ar-aramid ni Noe. Ngem “saanda a nangikankano agingga nga immay ti layus ket inyanudna amin ida.”​—Mateo 24:38, 39.

5. Ania dagiti galad a kasapulan ni Noe ken ti pamiliana?

⁵ No taliawentayo daydi a panawen, makitatayo a nainsiriban ti inaramid ni Noe. Ngem kadagidi a panawen sakbay ti Layus, masapul a naturedka no kayatmo ti maiduma. Masapul idi a natibker ti pammati ni Noe ken ti pamiliana tapno maibangonda ti dakkel a daong ken punuenda dayta iti nadumaduma a kita ti animal. Adda kadi gundaway a ti dadduma kadagitoy a manmano a matalek a tattao tinarigagayanda ti agbalin a saan unay a naiduma kadagiti tattao iti aglawlawda ket agbiagda laengen a “normal”? No kas pagarigan man ta napanunotda dayta, saan a kimmapuy ti kinatarnawda. Kalpasan ti adu a tawtawen​—a napapaut ngem iti masapul nga anduran ti asinoman kadatayo iti daytoy a sistema ti bambanag​—nalasatan ni Noe ti Layus gapu iti pammatina. Nupay kasta, dinadael ni Jehova amin dagidiay nagbiag iti “normal” ken di nangikankano iti kaipapanan ti panawen a nagbiaganda.

Nagraira Manen ti Kinaranggas iti Sangatauan

6. Ania ti nagtultuloy a kasasaad kalpasan ti Layus?

⁶ Kalpasan nga immes-es dagiti danum ti Layus, naaddaan ti sangatauan iti gundaway a mangabaruanan. Ngem imperpekto latta ti tattao ket “ti pagannayasan ti puso ti tao” nagtultuloy a “dakes manipud pay kinaagtutubona.” (Genesis 8:21) Ken uray pay saanen a mabalin nga aglasag dagiti demonio, nagtalinaedda nga aktibo. Dagus nga impakita dagiti saan a nadiosan a tattao nga ‘addada iti pannakabalin daydiay nadangkes,’ ket kas iti kaaldawantayo, nasken a makidangadang idi dagiti pudno nga agdaydayaw maibusor “kadagiti pangallilaw a pamuspusan ti Diablo.” ​—1 Juan 5:19; Efeso 6:11, 12.

7. Kasano a limmanlan ti kinaranggas iti lubong kalpasan ti Layus?

⁷ Sipud idi panawen ni Nimrod kalpasan ti Layus, napno manen daytoy daga kadagiti kinaranggas ti tattao. Kas resulta ti dumakdakkel a populasion ken rumangrang-ay a teknolohia, limmanlan ti kinaranggas bayat ti panaglabas ti panawen. Idi umuna a tiempo, ti maus-usar ket kampilan, pika, pana ken bai, ken karuahe. Idi agangay, napataud ti musket ken kanyon, kalpasanna ti riple ken ti nabilbileg nga armas iti rugrugi ti maika-20 a siglo. Pinataud ti Gubat Sangalubongan I dagiti nakaal-alinggaget nga armas kas iti eroplano, tangke, submarino, ken makasabidong a gas. Iti dayta a gubat, minilion a biag ti ginudas dagita nga armas. Ninamnama kadi dayta? Wen.

8. Kasano a natungpal ti Apocalipsis 6:1-4?

⁸ Idi tawen 1914, naitrono ni Jesus kas Ari iti nailangitan a Pagarian ti Dios, ket nangrugi “ti aldaw ti Apo.” (Apocalipsis 1:10) Iti maysa a sirmata a nailanad iti libro nga Apocalipsis, nagparang ni Jesus kas maysa nga Ari a sibaballigi a nakasakay iti maysa a puraw a kabalio. Adda dagiti kumakabalio a sumarsaruno kenkuana, a tunggal maysa ti mangiladawan kadagiti nagduduma a saplit iti sangatauan. Maysa kadakuada ti nakasakay iti maris-apuy a kabalio, ket naipalubos kenkuana “nga ikkatenna ti talna iti daga tapno papatayenda ti maysa ken maysa; ket maysa a dakkel a kampilan ti naited kenkuana.” (Apocalipsis 6:1-4) Daytoy a kabalio ken ti nakasakay iti dayta iladawanda ti gubat, ket ti dakkel a kampilan iladawanna ti awan kaaspingna a panangdadael ti moderno-aldaw a gubat agraman dagiti nabileg nga armasna. Dagita nga armas iramanda dagiti nuklear nga igam, a ti tunggal maysa kabaelanna a papatayen ti pinullo a ribu a tattao; dagiti rocket a makabael a mangipan kadagita nga igam kadagiti puntiriada a rinibu a kilometro ti kaadayona; agraman dagiti kabaruan a kemikal ken biolohikal nga armas para iti nasaknap a panangdadael.

Ipangagtayo Dagiti Pakdaar ni Jehova

9. Komusta ti lubong ita no idilig iti lubong sakbay ti Layus?

⁹ Idi kaaldawan ni Noe, dinadael ni Jehova ti sangatauan gapu iti nakaro a kinaranggas dagiti nadangkes a pinakaro pay dagiti Nefilim. Komusta met ita? Nakarkaro kadi ti kinaranggas ditoy lubong idi ngem ita? Saan! Maysa pay, kas idi kaaldawan ni Noe, naipamaysa dagiti tattao iti inaldaw nga aktibidadda, nga agbibiagda iti “normal,” a dida ikankano dagiti pakdaar a maikalkallangogan. (Lucas 17:26, 27) No kasta, adda kadi rason a pagduaduaantayo a dadaelen manen ni Jehova ti sangatauan? Awan.

10. (a) Ania a pakdaar ti maulit-ulit kadagiti padto ti Biblia? (b) Ania ti kakaisuna a nainsiriban nga aramidentayo ita?

¹⁰ Ginasut a tawtawen sakbay ti Layus, impadto ni Enoc ti pannakadadael a dumteng iti kaaldawantayo. (Judas 14, 15) Dinakamat met ni Jesus ti umad-adani a “dakkel a rigat.” (Mateo 24:21) Namakdaar ti dadduma pay a mammadto mainaig iti dayta a tiempo. (Ezequiel 38:18-23; Daniel 12:1; Joel 2:31, 32) Ken iti libro nga Apocalipsis, mabasatayo ti nalawag a pannakailadawan dayta a maudi a pannakadadael. (Apocalipsis 19:11-21) Kas indibidual, tuladentayo ni Noe ken siaaktibo nga ikasabatayo ti kinalinteg. Ipangagtayo dagiti pakdaar ni Jehova ken siaayat a tulongantayo dagiti kaarrubatayo a mangaramid met iti dayta. Iti kasta, kas ken ni Noe, makipagnatayo met iti Dios. Pudno nga asinoman nga agtarigagay iti biag, masapul nga itultuloyna ti makipagna iti Dios. Kasanotay a maaramid dayta iti laksid dagiti rigat a pakaipaspasanguantayo iti inaldaw? Nasken a maaddaantayo iti nabileg a pammati a matungpal ti panggep ti Dios.​—Hebreo 11:6.

Itultuloyyo ti Makipagna iti Dios Bayat Dagiti Nariribuk a Panawen

11. Iti ania a wagas a tultuladentayo dagiti Kristiano idi umuna a siglo?

¹¹ Idi umuna a siglo, dagiti napulotan a Kristiano ket natukoy kas kameng “Ti Dalan.” (Aramid 9:2) Naipamaysa ti biagda iti pammatida ken ni Jehova ken Jesu-Kristo. Nagnada iti dana nga impasdek ti Apoda. Iti kaaldawantayo, kasta met laeng ti ar-aramiden dagiti matalek a Kristiano.

12. Ania ti napasamak idi simimilagro a pinakan ni Jesus ti maysa a bunggoy?

¹² Ti kinapateg ti pammati ket nagminar iti maysa a pasamak kabayatan ti ministerio ni Jesus. Naminsan, simimilagro a pinakan ni Jesus ti maysa a bunggoy ti agarup 5,000 a tattao. Nagsiddaaw ken naragsakan dagiti tattao. Ngem imutektekanyo ti simmaruno a napasamak. Mabasatayo: “Idi a dagiti tattao nakitada dagiti pagilasinan nga inaramidna, rinugianda a kunaen: ‘Sigurado a daytoy ti mammadto nga umay iti lubong.’ Gapuna ni Jesus, idi naammuanna nga umayda koman ket kemmegenda tapno pagbalinenda nga ari, napan manen nga agmaymaysa idiay bantay.” (Juan 6:10-15) Iti dayta a rabii, napan ni Jesus iti sabali a lugar. Nalabit a nadismaya ti adu gapu iti panagkedked ni Jesus nga agbalin nga arida. Total, saan aya nga impakitana nga isu ket maikari nga agbalin nga ari gapu iti kinasiribna ken kabaelanna a penneken dagiti pisikal a kasapulan dagiti tattao? Wen, ngem saan pay a dayta ti tiempo nga inkeddeng ni Jehova tapno isu ket agturay kas Ari. Maysa pay, nailangitan ti Pagarian ni Jesus, saan a naindagaan.

13, 14. Ania a panangmatmat ti impakita ti adu, ken kasano a nasubok ti pammatida?

¹³ Kaskasdi, determinado ti bunggoy a simmurot ken ni Jesus ket nasarakanda iti ‘ballasiw ti baybay,’ kas panangiladawan ni Juan. Apay a simmurotda kenkuana idinto ta nagkedkedanna ti panagreggetda a mangisaad kenkuana kas ari? Adu ti nangipakita a natauan ti panangmatmatda, a dinakamatda dagiti material a probision nga impaay ni Jehova idiay let-ang idi kaaldawan ni Moises. Dayta ti mangipasimudaag a kayatda nga itultuloy ni Jesus nga ipaay dagiti material a kasapulanda. Gapu ta nabasa ni Jesus dagiti di umiso a motiboda, rinugianna nga insuro dagiti naespirituan a kinapudno a tumulong a mangatur kadagiti pampanunotda. (Juan 6:17, 24, 25, 30, 31, 35-40) Ngem dadduma ti nagtanabutob kenkuana nangnangruna idi dinakamatna daytoy nga ilustrasion: “Pudno unay kunak kadakayo, Malaksid no kanenyo ti lasag ti Anak ti tao ken inumenyo ti darana, awanankayo ti biag iti bagbagiyo. Ti agtaraon iti lasagko ken uminum iti darak addaan iti agnanayon a biag, ket pagungarekto iti kamaudianan nga aldaw.”​—Juan 6:53, 54.

¹⁴ Dagiti ilustrasion ni Jesus masansan a tignayenda dagiti tattao a mangipakita no pudno a tarigagayanda ti makipagna iti Dios. Kasta met laeng ti epekto daytoy nga ilustrasion. Adu ti naklaat. Mabasatayo: “Adu kadagiti adalanna, idi nangngegda daytoy, kinunada: ‘Makapakigtot daytoy a sasao; siasino ti makapagimdeng iti dayta?’” Intuloy nga inlawlawag ni Jesus a masapul nga utobenda ti naespirituan a kaipapanan ti sasaona. Kinunana: “Ti espiritu isu ti mangted-biag; ti lasag awan a pulos ti usarna. Ti sasao nga insaok kadakayo ket espiritu ken biag.” Kaskasdi, adu ti saan a namati iti dayta, isu a kuna ti salaysay: “Maigapu itoy adu kadagiti adalanna ti napan iti bambanag a nalikudan ket saandan a makipagna kenkuana.”​—Juan 6:60, 63, 66.

15. Ania nga umiso a panangmatmat ti adda kadagiti dadduma a pasurot ni Jesus?

¹⁵ Ngem saan a kasta ti reaksion ti dadduma nga adalan ni Jesus. Pudno, dagiti nasungdo nga adalan dida naan-anay a naawatan ti kinuna ni Jesus. Kaskasdi, nagtalinaed a natibker ti pammatida kenkuana. Ni Pedro, maysa kadagidi a nasungdo nga adalan, inyebkasna ti rikna dagidiay nagtalinaed a kadua ni Jesus idi kinunana: “Apo, iti siasino ti papananminto? Addaanka iti sasao ti agnanayon a biag.” (Juan 6:68) Anian a nagsayaat a kababalin ken ulidan!

16. Ania dagiti mabalin a pakasubokantayo, ken ania nga umiso a panangmatmat ti maadda koma kadatayo?

¹⁶ Mabalintayo met ti masubok kas kadagidi a nagkauna nga adalan. Mabalin a maupaytayo no saan a dagus a matungpal dagiti kari ni Jehova sigun iti namnamaentayo. Mabalin a mariknatayo a narigat a matarusan dagiti pannakailawlawag ti Kasuratan kadagiti naibatay iti Biblia a publikasiontayo. Mabalin a makaaramid ti padatayo a Kristiano iti maysa a banag a pakaupayantayo. Nainkalintegan kadi nga isardengtayon ti makipagna iti Dios gapu kadagita wenno kadagiti umasping a rason? Saan! Dagiti adalan a nangpanaw ken ni Jesus impakitada ti nainlasagan a panagpampanunot. Liklikantayo koma a tuladen ti kasta.

“Saan a Datayo ti Kita nga Agsanud”

17. Ania ti makatulong tapno agtultuloy a makipagnatayo iti Dios?

¹⁷ Insurat ni apostol Pablo: “Amin a Kasuratan impaltiing ti Dios.” (2 Timoteo 3:16) Babaen kadagiti binulong ti Biblia, nalawag nga ibaga kadatayo ni Jehova: “Daytoy ti dalan. Magnakayo iti dayta.” (Isaias 30:21) Ti panagtulnogtayo iti Sao ti Dios tulongannatayo nga ‘agtultuloy nga agaluad a siinget iti pannagnatayo.’ (Efeso 5:15) ‘Maitultuloytayo ti magna iti kinapudno’ babaen ti panagadal iti Biblia ken panangmennamenna iti maad-adaltayo. (3 Juan 3) Pudno, kas kinuna ni Jesus, “ti espiritu . . . mangted iti biag; ti lasag awan a pulos ti usarna.” Ti kakaisuna a mapagpannurayan a giya a mangiturong kadagiti addangtayo ket naespirituan a panangiwanwan, nga aggubuay manipud iti Sao, espiritu, ken organisasion ni Jehova.

18. (a) Ania ti minamaag nga ar-aramiden ti dadduma? (b) Ania a kita ti pammati ti adda kadatayo?

¹⁸ Kadagidiay naupay gapu ta nainlasagan ti panagpampanunotda wenno gapu ta saan a natungpal dagiti namnamaenda, masansan a naan-anay a gundawayanda dagiti tukon daytoy a lubong. Gapu ta saandan a marikna ti kinaganat ti panawen, saandan a matmatan a kasapulan ti ‘agtultuloy a panagbantay,’ ket pilienda a ragpaten dagiti managimbubukodan a kalat imbes nga iyun-unada dagiti interes ti Pagarian. (Mateo 24:42) Nakaro a kinamaag ti kasta a tignay. Imutektekanyo ti kinuna ni apostol Pablo: “Saan a datayo ti kita nga agsanud nga agturong iti pannakadadael, no di ket ti kita nga addaan pammati nga agturong iti pannakataginayon a sibibiag ti kararua.” (Hebreo 10:39) Kas kada Enoc ken Noe, agbibiagtayo iti nariribuk a panawen, ngem kas kadakuada, addaantayo iti pribilehio a makipagna iti Dios. No aramidentayo dayta, sigurado a makitatayto ti pannakatungpal dagiti kari ni Jehova, ti pannakadadael dagiti nadangkes, ken ti pannakaipasdek ti maysa a nalinteg a baro a lubong. Anian a nagsayaat a namnama!

19. Kasano ti panangdeskribir ni Mikias iti dana dagiti pudno nga agdaydayaw?

¹⁹ Sigun iti napaltiingan a mammadto a ni Mikias, dagiti nasion ti lubong “magnadanto tunggal maysa iti nagan ti diosna.” Kalpasanna, tinukoyna ti bagina ken dagiti matalek nga agdaydayaw idi kinunana: “Datayo, iti biangtayo, magnatayto iti nagan ni Jehova a Diostayo agingga iti tiempo a di nakedngan, iti mismo nga agnanayon.” (Mikias 4:5) No ti determinasionyo ket kas ken ni Mikias, agtalinaedkayo ngarud a nasinged ken ni Jehova kasanoman kariribuk ti lubong. (Santiago 4:8) Sapay koma ta ti naimpusuan a tarigagayan ti tunggal maysa kadatayo isu ti pannakipagna ken ni Jehova a Diostayo ita ken iti awan inggana, uray iti agnanayon!

Ania ti Sungbatyo?

• Ania dagiti nagpadaan ti kaaldawan ni Noe ken ti kaaldawantayo?

• Ania a dana ti sinurot ti Noe ken ti pamiliana, ken kasanotayo a matulad ti pammatida?

• Ania ti di umiso a panangmatmat ti dadduma a pasurot ni Jesus?

• Ania ti determinado nga aramiden dagiti pudno a Kristiano?

[Dagiti Ladawan iti panid 20]

Kas idi kaaldawan ni Noe, naipamaysa ita dagiti tattao kadagiti inaldaw nga aktibidadda

[Ladawan iti panid 21]

Kas manangaskasaba iti Pagarian, “saan a datayo ti kita nga agsanud”