Panangparang-ay iti Abilidadtayo iti Ministerio​—Panangisardeng Kadagiti Saan a Nabunga a Panangyadal iti Biblia

NO APAY A NAPATEG: Masapul nga umawag dagiti tattao iti nagan ni Jehova tapno maisalakanda. (Ro 10:13, 14) Ngem saan nga amin a mayat nga agpayadal ket mayat a mangyaplikar kadagiti pagalagadan ni Jehova. Mausartayo a naimbag ti napateg a tiempotayo iti ministerio no tulongantayo dagiti talaga a mayat nga agbalbaliw tapno maay-ayoda ni Jehova. No saan a rumangrang-ay ti estudiante ti Biblia kalpasan ti kalkalainganna a kabayag ti panagadalna, nainsiriban nga isardengtayon nga iyadalan ket usarentayo ti tiempotayo a tumulong kadagiti iyasideg ni Jehova iti bagina ken iti organisasionna. (Jn 6:44) Ngem no agbalbaliw inton agangay ken ipakitana nga “addaan iti umiso a kababalin nga umawat iti agnanayon a biag,” maragsakantayo a mangituloy a mangyadal kenkuana.​—Ara 13:48.

NO KASANO NGA ARAMIDEN:

• Komendaram ti estudiante ta kayatna ti maaddaan iti umiso a pannakaammo.​—1Ti 2:4

• Ipaganetgetmo ti kinapateg ti panangyaplikar kadagiti maad-adalna.​—Lu 6:46-49

• Siaanus nga ilawlawagmo ti ilustrasion ni Jesus maipapan iti tao a nagmula, ken ibagam a panunotenna no ania ti mabalin a manglaplapped kenkuana a rumang-ay.​—Mt 13:18-23

• Sitataktika nga ilawlawagmo no apay nga isardengmon nga iyadalan

• Ibagam a sagpaminsan a sumarungkarka tapno paregtaem ken mabalin nga ituloymonto nga iyadalan no rumang-ayto iti masanguanan

BUYAEN TI VIDEO, SA SUNGBATAN DAGITOY A SALUDSOD:

• Ania ti nasursurom iti saritaan a mangipakita a saan a rumangrang-ay iti naespirituan ti estudiante?

• Kasano a tinulongan ti agibumbunannag ti estudiante tapno matarusanna a kasapulanna ti rumang-ay?

• Ania ti imbaga ti agibumbunannag a mangipakita a mabalinnanto manen nga ituloy nga iyadalan ti estudiante?