Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • jy kap. 66 p. 158-p. 159 par. 1
  • Idiay Jerusalem Para iti Piesta ti Tabernakulo

Awan video-na ti napilim.

Pasensiakan, adda problema iti pannakai-load ti video.

  • Idiay Jerusalem Para iti Piesta ti Tabernakulo
  • Ni Jesus—Ti Dalan, ti Kinapudno, ti Biag
  • Umasping a Material
  • Idiay Piesta dagiti Abong-abong
    Katan-okan a Tao
  • Iti Piesta dagiti Abong-abong
    Ti Pagwanawanan Mangibumbunannag iti Pagarian ni Jehova—1988
  • “Awan Pay ti Tao a Kastoy ti Panagsaona”
    Ni Jesus—Ti Dalan, ti Kinapudno, ti Biag
  • Piesta ti Sabbath
    Pannakatarus iti Kasuratan, Tomo 2
Kitaen ti Ad-adu Pay
Ni Jesus—Ti Dalan, ti Kinapudno, ti Biag
jy kap. 66 p. 158-p. 159 par. 1
Mangisursuro ni Jesus iti templo idiay Jerusalem

KAPITULO 66

Idiay Jerusalem Para iti Piesta ti Tabernakulo

JUAN 7:​11-32

  • NANGISURO NI JESUS IDIAY TEMPLO

Nagbalin a nalatak ni Jesus kadagiti tawen kalpasan ti panagbautisarna. Rinibu a Judio ti nakakita kadagiti milagrona, ken nagdinamag iti intero a pagilian dagiti inaramidna. Iti Piesta ti Tabernakulo (wenno, Abong-abong) idiay Jerusalem, adu ti mangbirbirok kenkuana.

Agduduma ti ibagbagada maipapan ken Jesus. Ibaga ti dadduma: “Isu ket naimbag a tao.” Kuna met ti dadduma: “Saan. Al-allilawenna dagiti tattao.” (Juan 7:12) Ad-adda manen a nagsusupiatanda dayta kadagiti umuna nga aldaw ti piesta. Ngem awan ti makaitured a mangisakit ken Jesus gapu ta mabutengda iti aramiden dagiti Judio a lider.

Sumagmamano nga aldaw kalpasan a nangrugi ti piesta, napan ni Jesus iti templo. Nasdaaw ti adu a tattao iti kinalaingna a mangisuro. Saan a pulos a nageskuela iti pagadalan dagiti rabbi, isu a kinuna dagiti Judio: “Nangal-alaan daytoy a tao iti kasta a kinalaingna iti Kasuratan idinto ta saan met a nagadal kadagiti eskuelaan?”​—Juan 7:15.

“Ti isursurok ket saan a naggapu kaniak,” kinuna ni Jesus, “no di ket naggapu iti daydiay nangibaon kaniak. Ti asinoman a mayat a mangaramid iti pagayatan ti Dios, maammuannanto no ti isursurok ket naggapu iti Dios wenno bukodko a kapanunotan.” (Juan 7:​16, 17) Ti pannursuro ni Jesus ket maitunos iti Linteg ti Dios, isu a nalawag a ti Dios ti idaydayawna, saan a ti bagina.

Kalpasanna, kinuna ni Jesus: “Saan kadi a ni Moises ti nangted kadakayo iti Linteg? Ngem awan kadakayo ti mangtungtungpal iti Linteg. Apay a kayatdak a papatayen?” Dadduma kadagiti tattao ti mabalin a bisita a naggapu iti ruar ti siudad, a saan a makaammo iti dayta a panggep. Kasla saan a nakappapati kadakuada nga adda mayat a mangpapatay iti mannursuro a kas kenkuana. Isu nga imbagada a mabalin nga agmauyong ni Jesus ta ibagbagana dayta. “Nalugananka iti demonio,” kunada. “Siasino koma ti mayat a mangpapatay kenka?”​—Juan 7:​19, 20.

Kinapudnona, maysa ket kagudua a tawen sakbayna, dagiti Judio a lider kayatda idi a papatayen ni Jesus ta pinaimbagna ti maysa a lalaki iti aldaw ti Sabbath. Gapuna, nagusar ni Jesus iti mamagpanunot a sasao a mangipakita iti panagbalinda a saan a nainkalitegan. Imbagana a sigun iti Linteg, masapul a makugit ti maysa nga ubing a lalaki iti maikawalo nga aldaw, uray iti Sabbath. Sa insaludsodna: “No kugitenyo ti maysa a lalaki iti sabbath tapno matungpalyo ti Linteg ni Moises, makapungtotkayo kadi kaniak ta pinaimbagko ti maysa a lalaki iti sabbath? Isardengyo ti mangukom maibatay iti makitkitayo, no di ket nalinteg koma ti panangukomyo.”​—Juan 7:​23, 24.

Ammo ti dadduma nga umili ti Jerusalem dayta. Kinunada: “Saan kadi a daytoy ti tao a kayat [dagiti agtuturay] a papatayen? Kitaenyo! agsasao iti sanguanan dagiti tattao, ngem awan ti maikunada kenkuana. Saan ngata a kombinsidon dagiti panguluentayo nga isu ti Kristo?” Apay ngarud a saan a mamati dagiti tattao a ni Jesus ti Kristo? Kinunada: “Inton umay ti Kristo, awan ti makaammo iti paggapuanna. Ngem ammotayo ti naggapuan daytoy a tao.”​—Juan 7:​25-27.

Iti templo, insungbat ni Jesus: “Am-ammodak ken ammoyo ti naggapuak. Saanak nga immay iti bukodko a nakem. Ti nangibaon kaniak ket pudno, ngem saanyo nga am-ammo. Am-ammok Daydiay nangibaon kaniak gapu ta siak ti pannakabagina.” (Juan 7:​28, 29) Gapu iti dayta a naglawag a sungbat, inkagumaanda a tiliwen ni Jesus tapno ibaludda wenno papatayenda. Nupay kasta, saanda a natiliw ta saan pay a panawen a matay ni Jesus.

Ngem adu ti namati ken Jesus, ket rumbeng a mamatida. Nagna iti rabaw ti danum, pinagtalnana ti angin, pinakanna ti rinibu babaen ti sumagmamano laeng a tinapay ken ikan, nangpaimbag kadagiti masakit, pinapagnana dagiti pilay, linuktanna ti mata dagiti bulsek, nangpaimbag kadagiti agkukutel, ken nangpagungar pay iti natay. Gapuna, dinamagda: “Inton dumteng ti Kristo, agaramidto ngata iti ad-adu a milagro ngem iti inaramid daytoy a tao?”​—Juan 7:31.

Idi nangngeg dagiti Fariseo ti ibagbaga dagiti tattao, dagitoy ken dagiti panguluen a papadi nangibaonda kadagiti guardia a mangtiliw ken Jesus.

  • Idi simmangpet ni Jesus iti piesta, ania ti ibagbaga dagiti tattao maipapan kenkuana?

  • Ania ti insungbat ni Jesus a mangipakita a saanna a salsalungasingen ti Linteg ti Dios?

  • Apay nga adu ti namati ken Jesus?

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share