Dagiti Saksi ni Jehova Idiay New Zealand—Natalna ken Napasnek a Kristiano?

Idi Oktubre 21, 1940, indeklara ti New Zealand a dagiti Saksi ni Jehova ket maysa nga organisasion a kontra iti gobierno ken mamagpeggad iti seguridad ti publiko. Uray napasaranda ti adu a problema gapu iti dayta a deklarasion, saanda a naupay. Kas pagarigan, intultuloyda latta ti naggigimong uray no posible a rauten ken arestuen ida dagiti autoridad.

Ni Andy Clarke ket asawa ti maysa a Saksi nga agnagan iti Mary. Nadlawna ti determinasion ni baketna nga agtultuloy a makigimong uray no adda peggad. Maamak ni Andy a maaresto ni baketna bayat a makigimgimong. Saan idi a makigimgimong ni Andy, ngem rinugiannan a kuyogen ni Mary ket imbagana: “No arestuendaka, masapul nga arestuendak met!” Sipud idin, kanayonen a makigimong ni Andy a kadua ni Mary. Idi agangay, nagpabautisar metten kas maysa a Saksi. Nupay naidadanes ti adu a Saksi idiay New Zealand idi Gubat Sangalubongan II, adu ti kas ken Mary a nagtalinaed a matalek iti Dios.

Rimmang-ayda Uray Nakabaludda

Maysa nga aldaw, pinasardeng dagiti polis ti 78 ti tawenna a ni John Murray bayat a makisarsarita maipapan iti Biblia iti binalaybalay. Sinentensiaan ti korte gapu iti pannakipasetna kadagiti aktibidad ti maysa nga organisasion a kontra iti gobierno. Adu pay a Saksi ti naidemanda, dadduma ti napagmulta, ken adda dagiti naibalud agingga iti tallo a bulan.

Saan a kayat dagiti Saksi ti agsoldado gapu iti konsiensiada a sinanay ti Biblia. (Isaias 2:4) Kas resultana, napasaranda ti nakaro a rigat idi adu ti naayaban nga agsoldado bayat ti gubat. Imbes nga agsoldadoda, agarup 80 a Saksi ti naipan kadagiti kampo a pagbaludan kabayatan ti gubat. Uray nakabalud dagitoy a kakabsat, nakaro ti pannakamaltratoda, ken nagkaro ti lamiis gapu iti winter, siraragsak nga intultuloyda ti panagdaydayawda ken Jehova.

Dagus nga inorganisar dagiti nakabalud a Saksi ti regular a panaggigimong ken panangasaba. Kasda la iti maysa a kongregasion nga addaan iti regular a panaggigimong ken urnos a panangasaba kadagiti padada a balud. Iti dadduma a kampo, napalubosan pay ketdi dagiti Saksi a mangangay kadagiti asamblea a bantayan ti maysa a guardia. Naammuan ti dadduma a balud dagiti kinapudno iti Biblia iti kampo ket nabautisaranda sadiay.

Ni Bruce ti inaudi nga anak da Mary ken Andy, a nadakamat itay. Imbilangna ti pannakaibaludna kas gundaway a maammuanna ti ad-adu maipapan iti Biblia. Malagipna, “Para kaniak, kaslaak idi ages-eskuela ta masansan a makisarsaritaak kadagiti aduan kapadasan a kakabsat kadagiti kampo ket nagadu ti nasursurok kadakuada.”

Idi 1944, plano ti gobierno a wayawayaan ti dadduma a nakabalud kadagiti kampo. Nupay kasta, saan nga immanamong dagiti opisial ti militar gapu ta mamatida a no mawayawayaan dagiti Saksi, itultuloyda nga ikasaba ti pammatida. Imbaga ti report: “Nupay mabalin a makontrol ti kinapanatiko dagiti kastoy a tattao no maibaludda, saanda a pulos nga agbalbaliw.”

Saan a Peggad iti Seguridad ti Publiko

Gapu ta nagdinamag ti pannakaiparit dagiti Saksi ni Jehova, dadduma a tattao ti nagbalin nga interesado maipapan kadakuada. Idi agangay, adu ti nakaamiris a saan gayam a peggad dagiti Saksi ni Jehova iti seguridad ti publiko. Naammuanda a saan a mangdangran dagiti Saksi no di ket natalnada a Kristiano. Kas resultana, ti 320 a Saksi idiay New Zealand idi 1939 ket nagbalin a 536 idi 1945!

Adda dagiti gundaway a bigbigen dagiti patas nga opisial a saan a nainkalintegan ti pannakaiparit dagiti Saksi ni Jehova. Idi inusig ti maysa a hues ti ebidensia kontra iti maysa a kabsat a naidemanda gapu iti panangasabana, imbasurana ti kaso. Kinunana: “Sigun iti kapanunotak ken iti pannakaawatko iti linteg, ti maysa ket saan a maibilang a kriminal gapu iti panangiwarasna iti Biblia.”

Idi nagpatingga ti gubat, naikkat met laengen ti panangiparit. Mas determinadon dagiti Saksi a tumulong kadagiti kaarrubada a mangammo maipapan iti Pagarian ti Dios. Kastoy ti linaon ti maysa a surat idi 1945 manipud iti sanga nga opisina para iti amin a kongregasion iti New Zealand: “Agbalintayo koma a nataktika, mannakigayyem, ken naimbag iti amin. Liklikantayo dagiti kontrobersia ken panagririri. Laglagipentayo a dagiti tattao a makasaritatayo sipapasnek a patienda dagiti pannursuro ti relihionda ken ikagkagumaanda nga iyaplikar dagita. . . . Adu kadakuada ti ‘karnero’ ti Apo a masapul nga iturongtayo ken Jehova ken iti pagarianna.”

Ita, itultuloy dagiti Saksi ni Jehova idiay New Zealand nga ipakaammo ti mensahe ti Biblia kadagiti lumugar ken turista. Maysa nga aldaw, iti dua la nga oras, 67 a bisita manipud iti 17 a pagilian ti nakasabaan ti 4 a Saksi idiay Turangi!

Nalawag a bigbigen dagiti umili ti New Zealand a dagiti Saksi ni Jehova ket natalna ken napasnek a Kristiano a mangipatpateg unay kadagiti kinapudno iti Biblia. Iti kada tawen, ginasut ti mababautisaran kas Saksi ni Jehova. Idi 2019, nasuroken a 14,000 a Saksi ti siraragsak nga agserserbi ken Jehova iti daytoy makin-abagatan a pagilian.