Negosio Laeng Kadi ti Relihion?
Nadlawyo kadi nga adu a relihion ti kasla mas nakapokus iti panagbirok iti kuarta imbes nga isuroda dagiti tattao nga agdayaw iti Dios? Agpabayadda kadagiti serbisioda ken aglakoda kadagiti produktoda. Adu kadagiti liderda ti dadakkel ti sueldoda ken naluho ti panagbiagda. Dagitoy ti sumagmamano a pagarigan:
Ipakita ti maysa nga imbestigasion a 13 a tawen nga inusar ti maysa nga obispo ti Katoliko dagiti pondo ti simbaan a nangbayad iti dandani 150 a panagbiahe iti private jet ken dandani 200 a panaglugan iti limousine. Nasurok nga uppat a milion a doliar ti ginastosna para iti renovation ti balay a paggigiananna a kukua ti simbaan.
Maysa a pastor iti maysa a pagilian ti Africa ti regular a mangikonkondukta iti relihioso a sermon iti pinullo a ribu a tattao. Nakaad-adu a produkto ti mailaklako iti nakadakdakkel a simbaanna, kas iti makaagas a lana, labakara, ken T-shirt nga adda nai-print a rupana. Marigrigat dagiti kaaduan a pasurotna, idinto ta nakabakbaknang isuna.
Dua iti uppat a sagrado a bantay dagiti Budista iti China ti nairehistro kas kompania. Adu a negosio ti patpatarayen ti sikat a Shaolin Temple. Ti lider a monghe ket aw-awagan ti adu kas “business manager monk.”
Adu a kompania iti intero nga America ti mangbaybayad kadagiti tattao tapno mangaramidda kadagiti ritual a konektado iti relihion ken mangtedda iti naespirituan a pammagbaga kadagiti empleadoda.
Ania ti panagkunam kadagiti agnegnegosio a relihion? Napampanunotmo kadin no ania ti marikna ti Dios kadagiti tattao a panguarkuartaanda dagiti aktibidad dagiti relihion?
Ania ngata ti marikna ti Dios kadagidiay mangar-aramid iti relihion kas negosio?
Kagura ti Dios nga aglaok ti relihion ken negosio. Ipakita ti Biblia nga iti napalabas, kagura unay ti Dios dagiti papadi a mangibagbaga nga ireprepresentarda ti Dios ngem ‘agpabayadda no mangisuroda.’ (Mikias 3:11) Imbilang ti Dios a nakadakdakes dagiti ar-aramiden dagiti naagum a negosiante ta pinagbalinda dagiti lugar a pagdaydayawan kenkuana kas “kueba dagiti mannanakaw.”—Jeremias 7:11.
Kasta met laeng ti marikrikna ni Jesus kadagidiay mangar-aramid a negosio iti relihion. Idi kaaldawan ni Jesus, adda maal-ala dagiti lider ti relihion a kuarta kadagiti naagum a negosiante a pinalubosanda nga agnegosio iti uneg ti templo ti Jerusalem. Ginundawayanda dagiti nasingpet a tattao a mapan agdayaw idiay templo. Nakaturtured a pinapanaw ni Jesus dagiti mananggundaway a negosiante iti templo. Imbagana: “Isardengyo a pagbalbalinen a pagtagilakuan ti balay ni Amak!”—Juan 2:14-16.
Kasta met, tinulad ni Jesus ti panagpampanunot ti Dios iti panangitungpalna iti ministeriona. (Juan 8:28, 29) Saanna a siningir dagiti tattao idi sinuruanna ida maipapan iti Dios. Saan a nagpabayad idi nangaramid kadagiti milagro, kas idi pinakanna dagiti mabisin, pinaimbagna dagiti masakit, ken pinagungarna dagiti natay. Saan nga inusar ni Jesus ti ministeriona tapno agpabaknang—awan pay ketdi ti bukodna a balay.—Lucas 9:58.
Kasano a makita kadagiti nagkauna a Kristiano a saanda a pinagbalin a negosio ti panagdayawda?
Imbilin ni Jesus kadagiti pasurotna a saanda a pabayadan dagiti naespirituan a serbisioda. Imbagana: “Inawatyo nga awan bayadna, itedyo nga awan bayadna.” (Mateo 10:8) Dagiti pasurotna a naawagan kas Kristiano ket sinurotda dagiti bilin ni Jesus. Kitaentayo ti dadduma a pagarigan:
Ni apostol Pedro a kadkadua ni Jesus iti ministeriona, ket kayat a pasuksokan ti lalaki nga agnagan Simon, ta kayatna ti maaddaan iti posision ken autoridad. Saan nga inawat dayta ni Pedro ken dagus a kinorehirna ni Simon. Imbagana: “Madadael koma ti pirakmo ken uray sika, ta pinanunotmo a magatangmo ti awan bayadna a sagut ti Dios.”—Aramid 8:18-20.
Pagaammo unay ni apostol Pablo a mapmapan kadagiti nadumaduma a lugar tapno agserbi. Uray adu ti inar-aramidna para iti adu a kongregasion iti mano a tawen, saanna a pulos pinabayadan dagita. Isuna ken dagiti padana a Kristiano ket saan nga “aglaklako iti sao ti Dios a kas iti adu a tattao.” (2 Corinto 2:17) Imbes ketdi, insurat ni Pablo: “Nagtrabahokami iti rabii ken aldaw, tapno saankami nga agbalin a dakkel a paggastuan ti asinoman kadakayo idi inkasabami kadakayo ti naimbag a damag ti Dios.”—1 Tesalonica 2:9.
Siempre, kasapulan met dagidiay a Kristiano ti kuarta tapno masuportaranda ti dakkel a trabaho a panangasaba ken panangtulong iti dadduma. Ngem dida pulos nagpabayad iti serbisioda. Mabalin met a mangted dagiti tattao no kayatda, maibatay kadagitoy a prinsipio:
2 Corinto 8:12: “Ta nangnangruna nga awaten ti Dios ti naimpusuan a panagdonar, ta kayatna a mangted ti tao sigun iti kabaelanna, saan a ti awan kenkuana.”
Kaipapananna: Ti motibo ti maysa a tao a mangted ket mas napatpateg ngem iti kaadu ti itedna.
2 Corinto 9:7: “Aramiden koma ti tunggal maysa ti inkeddeng ti pusona, a saan a nasakit ti nakemna wenno mapilpilit, ta ay-ayaten ti Dios ti naragsak a mangted.”
Kaipapananna: Saan a kayat ti Dios a mapilpilitan a mangted ti asinoman. Maragsakan isuna no boluntario a mangted ti maysa.
Ania ti dandanin mapasamak kadagiti naagum a relihion?
Nalawag nga ibaga ti Biblia a saan nga awaten ti Dios ti amin a relihion wenno pamay-an ti panagdayaw. (Mateo 7:21-23) Iti maysa a padto, inladawan ti Biblia ti amin nga ulbod a relihion kas maysa a balangkantis ta nakialiansada kadagiti gobierno para iti kuarta ken dadduma pay a pagnam-ayanda ken ginundawayanda dagiti tattao iti amin a nasion. (Apocalipsis 17:1-3; 18:3) Ipakita dayta a padto a dandanin dadaelen ti Dios ti ulbod a relihion.—Apocalipsis 17:15-17; 18:7.
Saan a kayat ti Dios a dagiti dakes nga ar-aramid dagiti ulbod a relihion ti mangallilaw kadagiti tattao wenno manglapped kadakuada nga umasideg iti Dios. (Mateo 24:11, 12) Aw-awisenna dagiti nasingpet a tattao a mangammo iti pamay-an ti panagserbi nga awatenna ken tapno umikkatda iti ulbod a relihion.—2 Corinto 6:16, 17.