Kada tawen, adu a tin-edyer ken agtutubo a napadakkel iti pamilia a Saksi ti agpabpabautisar. Pampanunotem met kadi ti agpabautisar? No wen, masapul a maawatam ti kaipapanan ti dedikasion ken bautismo.

• Ania ti bautismo?

• Ania ti panagdedikar?

• Apay nga importante ti bautismo?

• Ti kuna dagiti padam nga agtutubo

• Saan nga agpayso a kapanunotan ken agpayso

Ania ti bautismo?

Ti bautismo a tuktukoyen ti Biblia ket ti pannakaitaneb ti intero a bagi iti danum—saan la a basta panangwarsi iti danum. Nakapatpateg ti isimbolo dayta.

• Ti pannakaitaneb bayat ti bautismom ipakitana iti publiko a saankan nga agbiag nga aramidem laeng ti pagragsakam.

• Ti iruruarmo iti danum ipakitana a nangrugin ti baro a biagmo a nakapokus iti panagaramid iti bambanag a mangparagsak iti Dios.

Babaen ti bautismom, ipakpakaammom iti publiko a bigbigbigem ti autoridad ni Jehova a mangibaga iti umiso ken di umiso, ken ti karim nga aramidem no ania ti kayatna.

Panunotem: Apay a kayatmo nga ipakaammo iti publiko nga agtulnogka ken Jehova iti intero a biagmo? Kitaem ti 1 Juan 4:19 ken Apocalipsis 4:11.

Ania ti panagdedikar?

Sakbay nga agpabautisarka, masapul nga idedikarmo ti bagim ken Jehova. Kasano?

Iti personal a kararagmo, ikarim ken Jehova nga agserbika kenkuana iti agnanayon ken aramidem ti pagayatanna uray ania ti mapasamak ken uray ania ti aramiden ti dadduma.

Ti bautismo ipakitana iti dadduma a nagdedikarkan ken saankan nga agbiag para iti bagim no di ket para ken Jehova.—Mateo 16:24.

Panunotem: Apay a sumayaat ti biagmo no agbiagka para ken Jehova? Kitaem ti Isaias 48:17, 18 ken Hebreo 11:6.

Apay nga importante ti bautismo?

Imbaga ni Jesus a kasapulan a mabautisaran dagiti agbalin nga adalanna. (Mateo 28:19, 20) Isu a masapul a mabautisaran dagiti Kristiano. Kinaagpaysuanna, ibagbaga ti Biblia a kasapulan dayta tapno maisalakan ti maysa.—1 Pedro 3:21.

Ngem ti koma motibom nga agpabautisar ket ay-ayatem ni Jehova ken ibilangmo nga importante ti relasionmo kenkuana. Ipakitam koma ti imbaga ti salmista: “Ania ti isubadko ken Jehova gapu iti amin a naimbag nga inaramidna kaniak? . . . Umawagakto iti nagan ni Jehova. Tungpalekto dagiti karik ken Jehova.”—Salmo 116:12-14.

Panunotem: Ania dagiti inaramid ni Jehova para kenka ken ania met ti kayatmo nga aramiden para kenkuana? Kitaem ti Deuteronomio 10:12, 13 ken Roma 12:1.

No sursurotemon dagiti paglintegan iti Biblia ken dumekdekketen ti relasionmo iti Dios, baka mapampanunotmon ti agpabautisar. Kasanom a maibaga a nakasaganakan?a

Iti daytoy nga artikulo

• Kasano kaadu ti masapul a maammuak?

• Ania ti masapul nga aramidek?

• Ti kuna dagiti padam nga agtutubo

Kasano kaadu ti masapul a maammuak?

No agsagsaganaka para iti bautismo, saan met a kasapulan nga i-memorize-mo dagiti kinapudno, kas iti estudiante tapno makapasa iti eksam. Ngem masapul nga usarem ti ‘abilidadmo nga agpanunot’ tapno mas kombinsidoka a ti isursuro ti Biblia ket kinapudno. (Roma 12:1) Kas pagarigan:

• Patiem kadi nga adda Dios ken maikari a pagdayawam?

  Ti kuna ti Biblia: “Asinoman nga umasideg iti Dios ket masapul a patienna nga adda Dios ken isu ti manggunggona kadagidiay napasnek a mangsapsapul kenkuana.”—Hebreo 11:6.

  Isaludsodmo iti bagim: ‘Apay a mamatiak iti Dios?’ (Hebreo 3:4) ‘Apay a masapul nga agdaydayawak kenkuana?’—Apocalipsis 4:11.

  Kasapulam ti tulong? Kitaem ti “Panamarsua Wenno Ebolusion?—Paset 1: Apay a Mamati iti Dios?”

• Patiem kadi a ti mensahe ti Biblia ket naggapu iti Dios?

  Ti kuna ti Biblia: “Inwanwan ti Dios ti pannakaisurat ti intero a Kasuratan ken makagunggona dayta iti panangisuro, panangtubngar, panangilinteg iti bambanag, ken panangdisiplina para iti kinalinteg.”—2 Timoteo 3:16.

  Isaludsodmo iti bagim: ‘Apay a mamatiak a ti Biblia ket saan laeng a basta libro a naglaon kadagiti kapanunotan ti tao?’—Isaias 46:10; 1 Tesalonica 2:13.

  Kasapulam ti tulong? Kitaem ti “Kasano a Matulongannak ti Biblia?—Paset 1: Adalem a Naimbag ti Bibliam.”

• Patiem kadi nga us-usaren ni Jehova ti Nakristianuan a kongregasion tapno maaramidna ti pagayatanna?

  Ti kuna ti Biblia: “Maikari [ti Dios iti] dayag babaen ti kongregasion ken babaen ken Kristo Jesus iti amin a henerasion iti agnanayon nga awan inggana.”—Efeso 3:21.

  Isaludsodmo iti bagim: ‘Para kaniak, naggapuan dagiti nasursurok iti Biblia kadagiti Nakristianuan a gimong? Kadagiti tattao wenno ken Jehova?’ (Mateo 24:45) ‘Makigimgimongak kadi latta uray saan a makigimong dagiti nagannakko (no ipalubosda nga aramidem dayta)?’—Hebreo 10:24, 25.

  Kasapulam ti tulong? Kitaem ti “Apay a Makigimongka iti Kingdom Hall?””

Ania ti masapul nga aramidek?

Saanmo a kasapulan ti agbalin a perpekto tapno mabautisaranka. Ngem masapul nga ipakitam a talaga a kayatmo nga ‘adaywan ti dakes ken aramiden ti naimbag.’ (Salmo 34:14) Kas pagarigan:

• Sursurotem kadi dagiti paglintegan ni Jehova?

  Ti kuna ti Biblia: “Taginayonenyo ti nasayaat a konsiensia.”—1 Pedro 3:16.

  Isaludsodmo iti bagim: ‘Kasanok a naipakita a ti abilidadko nga agpanunot ket nasanayen a mangilasin iti umiso ken di umiso?’ (Hebreo 5:14) ‘Adda kadi dagiti espesipiko a situasion a nalabanak ti panangpilit kaniak dagiti gagayyemko a mangaramid iti di umiso? Im-impluensiaandak kadi dagiti gagayyemko a mangaramid iti umiso?’—Proverbio 13:20.

  Kasapulam ti tulong? Kitaem ti “Kasanok a Sanayen ti Konsiensiak?””

• Nalawag kadi kenka a manungsungbatka ken Jehova kadagiti ar-aramidem?

  Ti kuna ti Biblia: “Tunggal maysa ngarud kadatayo ket manungsungbatto iti Dios.”—Roma 14:12.

  Isaludsodmo iti bagim: ‘Napudnoak kadi iti bagik ken iti sabsabali?’ (Hebreo 13:18) ‘Am-aminek kadi dagiti kamalik, wenno iseksekretok dagita wenno ipabpabasolko iti dadduma?’—Proverbio 28:13.

  Kasapulam ti tulong? Kitaem ti “Kasano ti Panangsangok Kadagiti Kamalik?”

• Patpatibkerem kadi ti relasionmo ken Jehova?

  Ti kuna ti Biblia: “Umasidegkayo iti Dios, ket umasidegto kadakayo.”—Santiago 4:8.

  Isaludsodmo iti bagim: ‘Ania dagiti ar-aramidek tapno mas nadekdekket ti relasionko ken Jehova?’ Kas pagarigan, ‘Kanayonak kadi nga agbasbasa iti Biblia?’ (Salmo 1:1, 2) ‘Regularak kadi nga agkarkararag?’ (1 Tesalonica 5:17) ‘Kasano kaespesipiko dagiti kararagko? Gayyem kadi ni Jehova dagiti gagayyemko?’—Salmo 15:1, 4.

  Kasapulam ti tulong? Kitaem ti “Kasano a Matulongannak ti Biblia?—Paset 2: Pagbalinem a Makaparagsak ti Panagbasam iti Biblia” ken ti “Apay a Masapul nga Agkararagak?”

TIP: Tapno matulonganka nga agsagana para iti bautismo, basaem ti kapitulo 37 ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 2. Panunotem a naimbag ti worksheet nga adda iti panid 308 ken 309.

Panunotem pay laeng kadi ti agdedikar ken Jehova ken agpabautisar ket agnerbioskan? No wen, makatulong daytoy nga artikulo tapno malabanam dagiti pagbutbutngam.

Iti daytoy nga artikulo

• Kasanon no makabasolak no nabautisaranakon?

• Kasanon no mabutengak kadagiti responsabilidad ti panagbalin a bautisado?

• Kasanon no panagriknak ket saanak a maikari nga agserbi ken Jehova?

• Ti kuna dagiti padam nga agtutubo

Kasanon no makabasolak no nabautisaranakon?

No apay a mabutengka: Mabalin nga adda am-ammom a nakaaramid iti serioso a basol ket naikkat iti kongregasion. (1 Corinto 5:11-13) Baka madanaganka a mapasamak met dayta kenka.

“Idi pampanunotekon ti agpabautisar, nagbutengak ta baka makabasolakto. Sigurado a maibabain dagiti nagannakko.”—Rebekah.

Makatulong a bersikulo: “Panawan koma ti dakes a tao ti dalanna . . . Agsubli koma ken Jehova, a mangngaasinto kenkuana, iti Diostayo a naan-anayto a mangpakawan kenkuana.”—Isaias 55:7.

Panunotem: Maikkat iti kongregasion dagiti saan nga agbabbabawi a nakabasol, ngem ipakitaan ni Jehova iti asi dagiti napakumbaba nga agbabbabawi ken mangawat iti disiplina.—Salmo 103:13, 14; 2 Corinto 7:11.

Daytoy ti agpayso: Uray no imperpektoka, kayam a labanan ti sulisog iti tulong ti Dios. (1 Corinto 10:13) Ken asino ti agdesision no ania ti aramidem? Sika? Wenno ti sabali a tao?

“Mabutengak idi ta baka makaaramidak iti serioso a basol no nabautisaranakon, ngem na-realize-ko a kamali met laeng no saanak pay laeng nga agpabautisar. Isu a diak kayat a dagiti posible a mapasamak iti masanguanan ti rason a saanak pay laeng nga agpabautisar.”—Karen.

Tandaanam: No piliem ti saan nga agaramid iti serioso a basol, kas iti adu nga agdaydayaw ken Jehova, maliklikam ti agbasol.—Filipos 2:12.

Kasapulam ti tulong? Kitaem ti “Kasanok a Malabanan ti Sulisog?”

Kasanon no mabutengak kadagiti responsabilidad ti panagbalin a bautisado?

No apay a mabutengka: Baka adda am-ammom nga agtutubo nga immakar iti lugar nga adayo iti pamilia ken gagayyemna tapno ad-adu ti maaramidanna iti panagserbina ken Jehova. Ket pampanunotem a kasta met ti ekspektaren ti dadduma kenka.

“Adda dagiti bautisado a Kristiano a kualipikado para iti dakdakkel a pribilehio, ngem saan a nakasagana ti dadduma nga agpausar wenno saan nga ipalubos ti situasionda.”—Marie.

Makatulong a bersikulo: “Sukimaten koma ti tunggal maysa dagiti aramidna tapno addanto panggapuanna nga agrag-o kadagiti aramidna, ken saan a gapu iti panangikomparana iti bagina iti sabali.”—Galacia 6:4.

Panunotem: Imbes nga ikomparam ti bagim iti dadduma, agpokuska iti ibaga ti Marcos 12:30: “Masapul nga ayatem ni Jehova a Diosmo iti amin a pusom.”

Tandaanam a ni Jehova ti masapul a pagserbiam iti amin a pusom—saan a ti dadduma. No talaga nga ay-ayatem ni Jehova, makakitaka iti pamay-an tapno maitedmo kenkuana ti kasayaatam.

“Talaga a serioso ti panagpabautisar, ngem saan a mangpadagsen iti biagmo. No makikaduaka kadagiti nasayaat ti impluensiana, masiguradom a tulongandaka. Bayat a manaynayonan ti responsabilidadmo, naragragsakkanto. Isu a no saanka pay laeng nga agpabautisar, parparigatem laeng ti bagim.”—Julia.

Tandaanam: Paunegem ti apresasionmo iti ayat ni Jehova kenka tapno maaramidmo ti kasayaatan para kenkuana kas panagyamanmo.—1 Juan 4:19.

Kasapulam ti tulong? Kitaem ti “Kasanoak Karesponsable?”

Kasanon no panagriknak ket saanak a maikari nga agserbi ken Jehova?

No apay a mabutengka: Ni Jehova ti Soberano iti uniberso. Awan serserbi ti tao no maikompara kenkuana! Isu a baka pampanunotem a saannaka pay ketdi nga am-ammo.

“Saksi ni Jehova dagiti nagannakko, isu a panagriknak, ibilangnak laeng ni Jehova a gayyem gapu kadakuada, saan a gapu ta inyasidegnak kenkuana.”—Natalie.

Makatulong a bersikulo: “Awan ti tao a makaumay kaniak malaksid no iyasideg ti Ama, a nangibaon kaniak.”—Juan 6:44.

Panunotem: Uray pampanunotem pay laeng ti agpabautisar, ipakita dayta nga iyas-asidegnaka ni Jehova kenkuana tapno agbalinkayo a nadekket nga aggayyem. Awatem kadi dayta nga imbitasionna?

Tandaanam met a ni Jehova—saan a sika wenno ti dadduma—ti mangibaga no asino ti maikari nga iyasidegna. Ken ipaspasigurado ti Saona a no ‘umasidegka iti Dios, umasidegto met kenka.’—Santiago 4:8.

“Am-ammomon ni Jehova ken aggayyemkayon ket ebidensia dayta nga ay-ayatennaka. Isu a no panagriknam ket saanka a maikari nga agserbi kenkuana, ipalagipmo iti bagim a saan a kasta ti panangkita kenka ni Jehova, ket husto a kanayon ni Jehova.”—Selina.

Tandaanam: No naaramidmon ti ibagbaga ti Biblia a kasapulan iti bautismo, maikarikan nga agdayaw ken Jehova, ken maikari iti panagdayawmo.—Apocalipsis 4:11.

Kasapulam ti tulong? Kitaem ti “Apay a Masapul nga Agkararagak?”