SALUDSOD DAGITI AGTUTUBO
Ania ti Masapul nga Aramidek Kalpasan ti Bautismok?—Paset 1: Itultuloymo Dagiti Naespirituan nga Aktibidad
Manmantenerentayo a naimbag dagiti napateg a bambanag, kas iti balay wenno lugan. Pudno met dayta iti pannakigayyemmo iti Dios. Kasanom a mamantener ti pannakigayyemmo kenkuana kalpasan ti bautismom?
Iti daytoy nga artikulo
Itultuloymo nga adalen ti Sao ti Dios
Makatulong a bersikulo: ‘Aramidem ti tunggal nasayaat nga aramid ken paaduem ti umiso a pannakaammom maipapan iti Dios.’—Colosas 1:10.
Ti kayatna a sawen: Kalpasan ti bautismom, masapul nga itultuloymo a basaen ti Biblia ken panunotem a naimbag ti maad-adalmo.—Salmo 25:4; 119:97.
Ti ekspektarem: No dadduma, baka awan ti ganasmo nga agadal. Isu a mabalin a mapanunotmo a saanka a talaga a nagaget nga agadal.
Ti mabalinmo nga aramiden: Adalem a naimbag dagiti topiko ti Biblia a paginteresam. Mangaramidka iti eskediul ti personal a panagadalmo a saanka a madagsenan. Ti panggepmo ket tapno umuneg ti ayatmo ken Jehova ken iti Saona. Mabenepisiaranka ken maragsakanka iti kasta a panagadal.—Salmo 16:11.
Tip: Tapno talaga a mabenepisiaranka iti panagadalmo, mangbirokka iti naulimek a lugar a saanka a maistorbo.
Kasapulam ti tulong?
Basaem:
“Kasano a Matulongannak ti Biblia?—Paset 2: Pagbalinem a Makaparagsak ti Panagbasam iti Biblia”
Buyaem:
I-download-mo:
Itultuloymo ti agkararag ken Jehova
Makatulong a bersikulo: “Dikay madanagan iti aniaman, no di ket ipakaammoyo koma iti Dios ti amin a kiddawyo babaen ti kararag ken panagpakaasi, agraman panagyaman.”—Filipos 4:6.
Ti kayatna a sawen: Ti pannakikomunikar iti Dios ket: Dumngegka kenkuana no basaem ti Saona; makisaritaka met kenkuana no agkararagka. Laglagipem a mabalinmo nga iraman iti kararagmo ti panagdawat kadagiti kasapulam ken panagyaman kadagiti bendision a maaw-awatmo.
Ti ekspektarem: No dadduma, baka mariknam nga ulit-ulitem laeng dagiti ikarkararagmo. Mabalin a pagduaduaam payen no talaga a dengdenggen ni Jehova ti kararagmo wenno no kayatna ti dumngeg kenka.—Salmo 10:1.
Ti mabalinmo nga aramiden: Iti agmalem, panunotem dagiti mabalinmo nga ikararag. No saan nga ipalubos ti situasionmo a dagus nga ikararag dagita, laglagipem nga aramiden dayta iti sabali nga oras. Malaksid kadagiti bukodmo a problema, panunotem ti kasapulan ti dadduma.—Filipos 2:4.
Tip: No kasla maulit-ulit laengen dagiti kararagmo, ikararagmo dayta ken Jehova. Kayatna a mangngeg ti amin a pakaseknam, agraman dagiti pakaseknam iti panagkararagmo.—1 Juan 5:14.
Kasapulam ti tulong?
Basaem:
I-download-mo:
Itultuloymo nga ibaga iti dadduma ti patpatiem
Makatulong a bersikulo: “Kanayon nga asikasuem ti bagim ken ti isursurom. . . . ta no kasta ti aramidem, maisalakanmonto ti bagim ken dagiti dumngeg kenka.”—1 Timoteo 4:16.
Ti kayatna a sawen: No ibagam iti dadduma ti patpatiem, bumileg met ti pammatim. Kas resultana, mabalin a maisalakanmo ti bagim ken dagidiay dumngeg kenka.
Ti ekspektarem: No dadduma, mabalin a kasla saanmo a kayat nga ibaga ti patpatiem. Baka mabutengka pay ketdi a mangaramid iti dayta, lalo iti eskuelaan.
Ti mabalinmo nga aramiden: Determinadoka koma a manglaban kadagiti negatibo a riknam, kas iti buteng, a mangapektar kadagiti desisionmo. Insurat ni apostol Pablo: “Uray no mapilitanak [a mangipakaammo iti naimbag a damag], adda latta kaniak ti annongen a naitalek kaniak.”—1 Corinto 9:16, 17.
Tip: No ipalubos dagiti nagannakmo, mangbirokka iti tumulong kenka—maysa a kabsat a nasayaat a pagtuladan iti ministerio.—Proverbio 27:17.
Kasapulam ti tulong?
Itultuloymo ti makigimong
Makatulong a bersikulo: “Agpipinnanunottayo tapno matignaytayo a mangipakita iti ayat ken nasayaat nga ar-aramid, a ditay baybay-an ti panaggigimongtayo.”—Hebreo 10:24, 25.
Ti kayatna a sawen: Ti kapatgan a rason a makigimongtayo ket tapno maidaydayawtayo ni Jehova. Ngem adda pay dua a maitulong ti pannakigimong. Umuna, maparegtadaka dagiti kapammatiam. Maikadua, maparegtam ida no umatenderka ken makipartisiparka.—Roma 1:11, 12.
Ti ekspektarem: No dadduma, mabalin nga agtawataw ti panunotmo, isu nga adu ti mapalabasmo a napateg a pannursuro. Wenno mabalin a manmanoka payen a makigimong wenno baka ipalubosmo a saanka a makigimong gapu iti dadduma a banag, kas kadagiti aktibidad iti eskuelaan.
Ti mabalinmo nga aramiden: Saanmo a baybay-an ti panageskuelam, ngem determinadoka met koma a regular a makigimong, ken ikagumaam ti makasursuro a naimbag kadagiti gimong. Makipartisiparka babaen ti panagkomento. Kalpasan ti gimong, pagyamanam uray ti maysa laeng kadagiti nakipartisipar.
Tip: Agsaganaka a nasaksakbay. I-download-mo ti JW Library® app, ken usarem ti tab a “Meetings” tapno makitam dagiti maadal iti tunggal paset ti gimong.
Kasapulam ti tulong?