SALUDSOD DAGITI AGTUTUBO
Ania ti Masapul nga Aramidek Kalpasan ti Bautismok?—Paset 2: Agtalinaed a Matalek
Kuna ti Biblia a “saan nga ipaidam ni Jehova ti aniaman a naimbag kadagidiay awan pagkuranganna,” wenno matalek. (Salmo 84:11) Ania ti kayat a sawen ti “awan pagkuranganna,” wenno matalek? Kayatna a sawen nga ipakpakita ti panagbiagmo a tungtungpalem ti karim idi indedikarmo ti bagim ken Jehova. (Eclesiastes 5:4, 5) Kasanoka a makapagtalinaed a matalek kalpasan ti bautismom?
Iti daytoy nga artikulo
Itultuloymo nga anusan dagiti problema
Makatulong a bersikulo: “Masapul a sumrektayo iti Pagarian ti Dios babaen ti adu a rigat.”—Aramid 14:22.
Ti kayatna a sawen: Ti agpayso, amin a Kristiano ket maipasango kadagiti problema iti biag. Dadduma kadagiti problema a pakaipasanguam, kas iti pannakauy-uyaw wenno ibubusor, ket gapu ta maysaka a Kristiano. Dadduma, kas iti problema iti kuarta wenno sakit, apektaranna ti amin a tao.
Ti ekspektarem: No dadduma, mabalin nga agbalbaliw ti biagmo, ken mabalin a saanmo a magustuan dayta. Ibagbaga ti Biblia a mapasamak ti dakes iti asinoman—Kristiano man ken saan a Kristiano.—Eclesiastes 9:11.
Ti mabalinmo nga aramiden: Gapu ta ammom a maipasangoka kadagiti problema, mabalinmo a saganaan a sanguen dagita. Ibilangmo dagiti problema kas oportunidad a mangpabileg iti pammatim ken ad-adda nga agtalek ken Jehova. (Santiago 1:2, 3) Maibagamto met ti kas iti imbaga ni apostol Pablo: “Ta adda pigsak a mangsango iti amin a banag gapu iti daydiay mangpabpabileg kaniak.”—Filipos 4:13.
PUDNO A KAPADASAN. “Idi kababautisarko, pinanawan dagiti manongko ti kinapudno, nagsakit dagiti nagannakko, ken nagsakitak met. Naglaka laeng koma ti sumuko—lipatekon ti karik idi nagdedikarak a ti panagserbik iti Dios ti kapatgan kaniak. Ngem ti dedikasionko ti nakatulong tapno kayak a sanguen dagita a problema.”—Karen.
Tip: Adalem ti maipapan ken Jose. Basaem ti pakasaritaan ti biagna iti Genesis kapitulo 37 ken 39 agingga iti 41. Panunotem: Ania dagiti saanna nga inekspektar a problema, ken kasano a sinangona dagita? Kasano a tinulongan ni Jehova ni Jose?
Kasapulam ti tulong?
Basaem:
“Kasanok a Sanguen ti Trahedia?”
I-download-mo:
Itultuloymo a labanan ti sulisog
Makatulong a bersikulo: “Masubok ti tunggal maysa no maallukoy ken masulisog iti bukodna a tarigagay.”—Santiago 1:14.
Ti kayatna a sawen: No dadduma, masulisogtayo amin iti tarigagay a no saantayo a malabanan, makaaramidtayo iti kamali.
Ti ekspektarem: Kalpasan ti bautismom, addanto latta dagiti “tarigagay ti lasag.” (2 Pedro 2:18) Mabalin a masulisogka pay ketdi a makiseks uray saanka pay a nagkasar.
Ti mabalinmo nga aramiden: Agdesisionka itan—sakbay a maipasangoka iti sulisog—tapno saan a ti tarigagaymo ti agdesision para kenka. Laglagipem ti imbaga ni Jesus: “Awan ti adipen a makapagserbi iti dua nga amo.” (Mateo 6:24) Mabalinmo ti agpili no asino ti amom. Ni koma Jehova ti piliem. Kasano man kapigsa ti dakes a tarigagay, kayam a labanan dayta.—Galacia 5:16.
Tip: Ammuem dagiti paglaingam ken pagkapuyam. Piliem dagiti gagayyem a makatulong kenka a maaddaan kadagiti nasayaat nga ugali. Adaywam dagiti tattao, lugar, ken situasion a saan a makatulong kenka nga agaramid iti umiso.—Salmo 26:4, 5.
Kasapulam ti tulong?
Basaem:
“Kasanok a Malabanan ti Sulisog?”
“Kasano a Maikkatko iti Panunotko ti Seks?”
“No Kasano a Malabanan ti Di Nasayaat nga Impluensia ti Kakadua”
Itultuloymo ti kinaregtam
Makatulong a bersikulo: “Ipakita ti tunggal maysa kadakayo ti isu met laeng a kinagaget agingga iti panungpalan, tapno . . . saankayo nga agsadsadut.”—Hebreo 6:11, 12.
Ti kayatna a sawen: No saan a nakapokus ti maysa iti trabahona, in-inut nga agbalin a nabuntog ken nasadut.
Ti ekspektarem: Mabalin nga eksayted ken nakaregregtaka kalpasan ti bautismom. Kasta unay ti panagayatmo ken Jehova. Ngem intono kuan, mabalin a marigatanka nga agtultuloy a mangtungpal iti amin a bilin ni Jehova, ket dayta ti mangupay kenka ken mabalin a mangpabaaw iti regtam.—Galacia 5:7.
Ti mabalinmo nga aramiden: Itultuloymo nga aramiden ti nasayaat, uray no dadduma ket kasla saanmo a kayat nga aramiden dayta. (1 Corinto 9:27) Kasta met, am-ammuem a naimbag ti nailangitan nga Amam ken kanayonka a makisarita kenkuana babaen ti kararag tapno agbalinka a nadekket kenkuana. Itultuloymo met ti makigayyem kadagidiay maragragsakan nga agserbi ken Jehova.
Tip: Laglagipem nga ay-ayatennaka unay ni Jehova ken nakasagana a tumulong kenka. Saanmo koma a panunoten a makapungtot kenka no apagbiit a bimmaaw ti regtam. Kuna ti Biblia: “Mangted iti pannakabalin iti daydiay nabannog ken naan-anay a bileg kadagidiay awanan iti pigsa.” (Isaias 40:29) Bendisionannanto ti panangikagumaam a mangpasubli iti regtam.
Kasapulam ti tulong?
Basaem:
“Agtutubo—Itultuloyyo nga Itrabaho ti Bukodyo a Pannakaisalakan”
“Kasanok a Pagbalinen a Makaparagsak ti Panagdaydayawko iti Dios?”
Buyaem:
Ti Kuna Dagiti Padam nga Agtutubo—Ti Kasayaatan Pay Laeng a Biag
Ti punto: No agtultuloyka a matalek, maparagsakmo ti puso ni Jehova! (Proverbio 27:11) Maragsakan no isuna ti piliem, ken itedna ti amin a kasapulam tapno malabanam ti pannulisog ni Satanas.