Pagkalap nga Iket Dagiti Tsino Idiay India
BABAEN TI KORESPONSAL TI AGRIINGKAYO! IDIAY INDIA
ADDA ti siudad ti Kochi a dati a Cochin iti makinlaud a kosta ti India, 250 a kilometro manipud iti makin-abagatan a murdong ti subkontinente ti India. Naintar iti agsumbangir a takdang ti dan-aw sadiay ti karkarna nga iket nga estilo Tsino. Kasano a nakadanon dagitoy sadiay?
Agnanaed dagiti Tsino iti dayta a rehion nanipud idi maikawalo a siglo K.P. ken agpatpatuloy, ket maipagarup a dagiti komersiante a Tsino iti pagarian ni Kublai Khan ti damo a nangisangpet kadagitoy a kita ti iket idiay Cochin sakbay ti 1400. Adu nga ikan ti makalap iti asideg ti takdang iti dandanum iti aglawlaw ti Cochin. Isu a nausar a naimbag iti nasurok a maysa a siglo dagitoy a dadakkel, de mano a pagkalap, agingga a pinapanaw dagiti Arabo dagiti Tsino.
Idi awanen dagiti Tsino, napukaw metten dagiti iket. Ngem idi rugrugi ti maika-16 a siglo, pinapanaw dagiti Portugues dagiti Arabo. Nabatad nga impausar manen dagiti Portugues dagita nga iket idiay Cochin. Naggapu dagitoy iti kolonia idi ti Portugal a puro ti Macao iti makin-abagatan a daya ti China.
Nupay adun a siglo ti kabayag ti konsepto, nagsayaat pay laeng ti maaramidan ti iket dagiti Tsino ken manmano pay laeng ti nagbaliwan ti dati a disenio wenno pannakausarda. Ket agtultuloy a mangipapaayda iti pagsapulan ti adu a mangngalap ken taraon ti adu a tattao. Kinapudnona, ti makalapan ti maysa nga iket ket umanay a pagtaraon ti intero a bario. Ngem malaksid a makatulong, napintas met dagiti iket, nangnangruna no makitam ti anniniwanda iti bimmalitok a langit no agsapa wenno rabii.
Kasano ti Pannakausarda?
Dagiti nagdadakkel nga iket dagiti Tsino ket addaan iti pataw ken agsumbangir a padagsen a mangbalanse ti dagsen ti iket ken ti makalapan. Maibitin ti iket ken ti pangsuportar a baskagna no di maus-usar. Parbangon pay laeng no mangrugi ti panagkalap nga agpaut iti uppat wenno lima nga oras. Dagiti iket ket siiinayad a maisaruag. Tapno maaramid daytoy, dagiti mangngalap ti mangbalbaliw kadagiti padagsen a naikabit iti kasumbangir a pungto ti mangbalanse a sistema, wenno ti pangulo ti grupo nga agkalap, ti magna iti makintengnga a tapaya ti iket. Mapagtalinaed ti iket iti danum iti 5 agingga iti 20 a minuto sakbay a siiinayad a maisang-at. Masagap dagiti aglanglangoy nga ikan nga agpatakdang. Gapu ta adun a tawen ti kapadasan ti mangidadaulo, ammona ti eksakto a tiempo a panangguyod iti iket.
Babaen ti senias ti pangulo, ti dadduma pay a miembro ti grupo a buklen ti lima wenno innem a lallaki ti mangisang-at iti iket babaen ti panangguyod kadagiti tali a nakaigalutan dagiti padagsen a bato. Bayat a mayaon ti iket, dagiti suli ti iket ti umuna a mayaon. Isu a ti iket kas man la dakkel a malukong a napno iti ikan. Anian a ragsak dagiti mangngalap! Agpipinnikpikda kas panangipakita iti ragsak gapu iti adu a nakalapanda. Kalpasanna, mailako dagiti ikan kadagiti komersiante, agtagtagibalay, ken turista a pasaray umay.
Adun a Tsino, Arabo, ken Portugues ti nagbiag ken pimmusay. Ngem agtultuloy pay laeng a maisaruag ken maguyod ti iket dagiti Tsino iti dandanum ti Kochi, kas iti inaramidda nasurok nga 600 a tawenen ti napalabas.
[Mapa iti panid 31]
(Para iti aktual a pannakaurnosna, kitaem ti publikasion)
Kochi
[Credit Line]
Mountain High Maps® Copyright © 1997 Digital Wisdom, Inc.