“Realistiko ken Praktikal a Libro”
ITAY napan a kalgaw, rinepaso ti Arkansas Democrat Gazette ti sumagmamano a libro nga impablaak ti Watch Tower Bible and Tract Society. Kastoy ti kinunana maipapan iti maysa kadagitoy: “Dagiti Saludsod nga Iyimtuod ti Agtutubo ket realistiko ken praktikal a libro para kadagiti pamilia, aniaman ti relihionda. . . .
“Adu ti maipaay daytoy a libro a nagsayaat a moral ken emosional a balakad. Kas pagarigan, ammo dagiti autor a tarigagayan ti amin nga agtutubo a saan koma nga estrikto dagiti nagannak kadakuada, ngem kastoy ti balakadna kadagiti agtutubo:
“‘Kayatyo aya ti ad-adu pay a wayawaya ken responsabilidad? No kasta paneknekanyo a responsablekayo. Aramidenyo a sisiserioso ti aniaman nga obra nga ituding dagiti dadakkelyo kadakayo.’
“Manmano a nagannak ti di mangapresiar iti libro a kanayon a mamagbaga a manungsungbat ti maysa a tao ken kanayon a mamalakad kadagiti agtutubo a pagraemanda ti bagida ken ti dadduma a tattao. Nupay kanayon a mangipaay ti libro iti biblikal a pangsuportar iti balakadna, ad-adda a naibasar dayta iti praktikal a kinasirib ken kinamanakem. . . . Nangnangruna a makaguyugoy ti seksion maipapan iti panagraem iti bagi, agsipud ta adu nga agtutubo ti naallilaw iti panangipagarupda a makagunggona ti nalabes a panangpadayaw iti bagida.”
Kalpasan ti panangadawna iti sumagmamano a paset ti libro, intuloy ti artikulo: “Ti naasi a palagip a maysa a kita ti kinatangsit ti panangipannakkel iti bagi ken ti kinapakumbaba ti pundasion ti Nakristianuan a biag ket nasamay a pangsumra iti dadduma kadagiti nalatak a sikolohia a di maitutop nga ipapaannurot dagiti nasayaat-panggepda a gagayyem ken mamalbalakad kadagiti agtutubo.”
No kayatmo ti matulongan iti impormasion nga adda iti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, mabalin a maaddaanka iti kopia babaen ti panangsurat ken panangibusonmo iti naipakuyog a kupon iti direksion a makita iti kupon wenno iti maitutop a direksion a nailista iti panid 5 daytoy a magasin.
□ Patulodandak iti libro a Dagiti Saludsod nga Iyimtuod ti Agtutubo—Dagiti Sungbat nga Epektibo.
□ Interesadoak iti libre a panagadal iti Biblia iti pagtaengan.