Manipud Kadagiti Agbasbasa
Dagiti Artikulo Para Kadagiti Agtutubo Agtawenak iti 12, ket magustuak unay a basaen dagiti magasinyo. Sakbay a nangrugiak nga agbasa kadagiti magasinyo, marigatanak idi a makilangen kadagiti gagayyemko agsipud ta in-inaunada amin ngem siak. Ngem kalpasan a nabasak dagiti artikulo iti “Agimtuod Dagiti Agtutubo . . .”, nalaklakak idan a kalangen. Pagyamanan kadagiti magasinyo. Makatulongda unay.
N. I., Russia
Panagsursuro iti Lenguahe Pagyamanan kadagiti makatulong a singasing iti artikulo a “Kayatmo Kadi ti Agadal iti Sabali a Lenguahe?” (Enero 8, 2000) Rinugiak ti nagadal iti Español dua a tawen ti napalabasen, ket talaga a nakatulong ti pannakaammok iti daytoy a lenguahe. Kabayatan ti nabiit pay nga internasional a kombension, natulongak ti adu a padak a Kristiano a naggapu iti sabsabali a pagilian.
K.L.R., Brazil
Tallo a tawenen nga agad-adalak iti Pranses, ket masapul nga iyebkasko ti panagyaman gapu iti artikulo. Makaparegta unay dayta! Napabaro ti determinasionko a mangituloy iti panagadalko, ket manginanamaak ken ikarkararagko nga addanto aldaw a mausarko ti pannakaammok iti sabali a lenguahe iti dadduma a benneg iti Nakristianuan a ministerio.
L. C., Estados Unidos
Nagadu ti ganggannaet ditoy Bavaria. Nupay Aleman ti lenguahe ti kaaduan, nasaysayaat ti panagtignayda iti naimbag a damag iti Biblia no mangngegda dayta iti nakayanakanda a lenguahe. Tangay adu ti naggapu idiay Russia, inkeddengko nga adalen ti lenguaheda. Hustokayo iti panagkunayo a makapakarit daytoy. Ngem naparmekko ti umuna a lapped nga isu ti panagsursuro iti alpabeto—ken dagiti letra ket saanen a kas man la iti hieroglyph dagiti Egipcio a narigat a maawatan.
B. K., Alemania
Insingasingyo ti panagusar kadagiti audiocassette iti panagadal iti maysa a lenguahe kabayatan ti panagmaneho. Panagkunak ket saan a nasayaat ti panangisingasing nga adda sabali nga aramidentayo nga agkasapulan iti panangipamaysa iti panunot kabayatan ti panagmaneho. Mabalin nga agtungpal daytoy iti aksidente.
K. S., Japan
Inimtuodmi ti sumagmamano nga organisasion a nainaig iti kinatalged ti panagmaneho, ket awan ti nakaipaay iti aniaman a panagsirarak a mangipakita a napegpeggad ti panagimdeng kadagiti makaisuro nga audiocassette kabayatan ti panagmaneho ngem iti panagimdeng iti musika wenno pannakisarita kadagiti pasahero. Nupay kasta, maapresiar unay ti palagip a nasken ti kanayon a panagannad kabayatan ti panagmaneho.—ED.
Panagopera a Di Mausar ti Dara Kayatko ti agyaman iti serye a “Panangagas ken Panagopera a Di Mausar ti Dara—Umad-adu ti Agkalikagum.” (Enero 8, 2000) Nakatulong a nangikkat iti dadduma a di umiso a panangmatmat dagiti tattao maibusor kadagiti Saksi ni Jehova. Nangitugotak iti adu a magasin idiay opisinak ket intukonko dagitoy kadagiti katrabahuak. Kabayatan ti pangngaldaw, nadlawko ti maysa a katrabahuak a sigagagar a mangbasbasa iti magasin. Kalpasanna, inasitgannak ket kinunana: “Diak impagarup a nagadu gayam dagiti makapainteres nga artikulo iti daytoy a magasin!”
I. S., Czech Republic
Dagiti Insekto Pagyamanan iti artikulo a “Ti Nakaskasdaaw a Lubong Dagiti Insekto.” (Enero 8, 2000) Nagsayaat ti pannakaisalaysay ti impormasion a talaga a bunga ti napasnek a panagsirarak. Kayatko koma ti agbuya iti TV, ngem binasak ketdi dayta a ruar ti Agriingkayo! Kalpasan ti panagbasak iti daytoy nga artikulo, ammok nga umiso ti inaramidko.
O. K., Francia
Nupay awan ammok a lohikal a panangilawlawag iti kaadda dagiti insekto, nakunak nga inaramid ni Jehova dagitoy tapno masierto a manteneren dagiti tattao a nadalus dagiti pagtaenganda. Ngem impaawat kaniak daytoy nga artikulo a dagiti insekto ti maysa pay a benneg iti libro iti panamarsua a pakasursuruantayo iti ad-adu pay maipapan iti natan-ok a Namarsua kadatayo.
A. A., Estados Unidos