Ti Daga—Lugar ti Biag nga Agnanayon
DAGITI naisangsangayan a kaadu ti naitalimeng a biag iti daga ipalagipda kadatayo ti sasao ti Salmo 104:24, 25: “O Jehova, anian a nagadu dagiti ar-aramidmo! Nainsiriban ti panangaramidmo kadakuada amin: ti daga napno iti pagsanikuaam. Addayta ti baybay, dakkel ket nalawa, isu a yan dagiti agkukunolkunol a bambanag a di mabilang, babassit man ken dadakkel nga an-animal”—ket mabalin nga inayontayo, uray kadagiti langalang unay a lugar!
Nupay kasta, nakalkaldaang ta ti kinaignorante ken kinaagum ti tao ti nakaungawan ti dadduma a kita ti biag ken dandani maungawen ti dadduma. Ti polusion ti maysa kadagiti kangrunaan a makagapu. Gapuna, dadduma a sientista ad-adalenda ti sumagmamano nga organismo a makaandur iti sabidong ken pudot—kas kadagidiay adda iti asideg dagiti nauneg nga ubbog iti baybay ken napudot nga ubbog kas kadagiti adda iti Yellowstone National Park—tapno usarenda dagiti sekretoda a mangdalus kadagiti makamulit a banag. Kabayatanna, padpadasen a tarusan a naan-anay ti dadduma a sientista no kasano nga agandar ti sistema a mangsustiner ti biag ditoy daga ken no ania ti epekto dagitoy a sistema iti tao.
Eksperimento a Sistema a Mangsustiner ti Biag
Tapno ad-adda a matarusan dagiti sistema a mangsustiner ti biag ditoy daga, nageksperimento dagiti sientista idi dekada 1990 iti naan-anay a nakubong a sistema a mangsustiner ti biag idiay Arizona, E.U.A. Gapu ta namnamaenda a sustinerenna ti bagina, inawaganda dayta iti Biosphere 2 (ti daga ket “Biosphere 1”). Addaan dayta iti nasurok a 3,000 a kita ti nabiag, agraman ti walo a tattao. Amin dagitoy ket naiputong iti lubong iti dua a tawen. Nupay kasta, rimsua dagiti nakaro a parikut iti Biosphere 2. “Natay ti dandani amin a tumatayab ken animal ken insekto a rumbeng nga agbiag koma iti uneg—malaksid kadagiti ipes ken ‘crazy ant,’” kinuna ti maysa a report, ket innayonna pay a “nagbalin a pagkakatawaan ti natan-ok a plano a Biosphere 2.” Anian a pannakapaay daytoy nga eksperimento no idilig iti pannakaiparangarang ti kinadayag ti “Biosphere 1”!
Ti Namarsua Ispalennanto ti Daga!
No ad-adu ti maammuantayo maipapan iti daga ken dagiti nakaskasdaaw a nabiag nga adda iti dayta, masapul ngarud nga ad-adda a patanorentayo ti nauneg a panagraem iti talaga a nabunga a planeta ken ti awan patinggat’ kinasiribna a Namarsua iti dayta. Siempre, ipakita ti adu a tattao ti panagayatda iti daga, nalabit babaen ti pannakiraman a naan-anay kadagiti isyu maipapan iti aglawlaw. Ngem, nakalkaldaang ta nakaad-adu a tubeng ti naipasango kadagitoy a tattao, agraman ti kinaagum ken kinaignorante ti tao, a di kabaelan a pukawen dagiti katan-okanen a panggep.
Nupay kasta, maliwliwa dagiti maseknan unay a tattao iti kari ti Biblia nga asidegen a dadaelen ti Dios a mismo ti amin a naagum, awanan dios a tattao a “mangdaddadael iti daga.” (Apocalipsis 11:18; 2 Timoteo 3:1-5) Kalpasanna, rugianto ti Namarsua nga agnagan Jehova ti maysa a programa a mangpasayaat ken mangdalus a naan-anay iti daga ket pagbalinenna dayta a paraiso nga ubbog ti biag.—Salmo 83:18; Isaias 35:1, 2.
Maaramidto daytoy a panangpasayaat babaen ti Pagarian ti Dios—maysa a nailangitan a gobierno nga iturayan ni Kristo Jesus. (Daniel 2:44; Mateo 6:9, 10) Iti sidong daytoy a turay, sumayaatto ti planeta a Daga, ta daytat’ aywananto dagiti tattao a managbuteng iti Dios nga agayat iti kinasoberano ni Jehova ken addaan iti kasta unay a panagraem kadagiti amin nga inaramidna. (Salmo 37:10, 11; Apocalipsis 21:3, 4) Apay a siguradotayo a matungpal dagitoy a kari? Agsipud ta dagiti “di makita a kualidadna,” a naiparangarang agpadpada iti panamarsua ken iti Biblia, paneknekanda nga “iti Dios awan ti deklarasion a saanto a mabalin.”—Roma 1:20; Lucas 1:37.
[Ladawan iti panid 12]
Asidegen nga agbalin a paraiso ti dagatayo