Panagadal Maipanggep iti Biag
“Ti Biblia [ti] kasayaatan a mangiwanwan iti panagbiag.”—Thomas Tiplady, 1924.
SAAN a panaglablabes ti panagkuna a ti adal a naibatay iti Biblia mabalbaliwanna ti panagbiag. Naaddaanen iti panggep ken namnama dagidiay makarikna nga awan idi ti serserbida ken maup-upayda. Insurat ti maysa nga agsolsolo nga ina a taga Namibia iti sanga nga opisina dagiti Saksi ni Jehova idiay South Africa:
“Agtawenak iti 29, ket dua nga aldaw laeng a binasak ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo. Napikapik unay ti pusok ta malidlidayak a talaga. Natay ti nobiok iti aksidente ti lugan ket napanawanak nga addaan iti dua nga annak. Kasta unay ti panagsagabami. No maminsan, pampanunotek a gudasen laeng idan ket kalpasanna gudasek metten ti biagko. Ngem idi nagun-odak daytoy a libro, nagbalbaliw ti panunotko. Pangngaasiyo ta tulongandak babaen ti libre a panagadal iti Biblia.”
Ti Biblia ket makaiwanwan a libro a makatulong kadagiti tattao nga agballigi iti amin a kasasaad ti biag—iti pannakilangen iti pamiliada, katrabahuanda, ken iti tattao iti komunidad. (Salmo 19:7; 2 Timoteo 3:16) Nagsayaat a mangiwanwan no kasano nga itultuloy ti agaramid iti naimbag ken liklikan ti dakes. Daytat’ libro a sipupudno a mangilawlawag iti kaipapanan ti biag. Bayat ti panangbasam iti dayta, mabigbigmo a napno iti salaysay maipapan kadagiti agpaypayso a tattao. Maamirismo no ania ti nangparagsak ken nakagunggonaan ti biag ti dadduma ken namagbalin a nakalkaldaang ken nakain-inaka ti dadduma. Agbalin a nabatad kenka no ania dagiti bambanag a makagunggona ken no ania dagiti saan.
Panagadal Maipanggep iti Biag Itan
Ipaganetget ti Biblia ti kinapateg ti praktikal a kinasirib. Kunana: “Ti sirib isu ti kangrunaan a banag. Gun-odem ti sirib.” (Proverbio 4:7, NW) Bigbigenna met a masansan a kurang ti pannakaawat dagiti tattao, isu a mamalakad: “No ti asinoman kadakayo agkurang iti sirib, agtultuloy koma nga agdawat iti Dios, ta isu mangted a sipaparabur kadagiti isuamin.”—Santiago 1:5.
Kasano a sipaparabur a mangted ti sirib ti Namarsua kadatayo a ni Jehova a Dios? Ipaayna babaen ti Saona, ti Biblia, isu nga iparparegtana a basaentayo dayta. Kidkiddawen ti Dios: “Anakko, no awatemto dagiti saok, ket ipenpenmo kenka dagiti bilinko; iti kasta iyallingagmo ta lapayagmo iti kinasirib . . . , maawatamto ti panagbuteng ken ni Jehova, ken masarakamto ti pannakaammo iti Dios. Ta ni Jehova mangted iti sirib.” (Proverbio 2:1, 2, 5, 6) No iyaplikartay ti balakad a masarakan iti Sao ti Dios ket makitatayo a praktikal dayta, mabigbigtayo a talaga nga iparangarangna ti nadibinuan a sirib.
Alaenyon a pagarigan ti panangdaer iti kinapanglaw. Irekomendar ti Biblia ti kinagaget ken mamakdaar a liklikantayo dagiti aramid a mangsayang iti bassit a kuarta. Nabatad ngarud a dagiti bisio a kas iti panagsigarilio ken nalabes a panaginum iti arak ket maikontra kadagiti prinsipio ti Biblia.—Proverbio 6:6-11; 10:26; 23:19-21; 2 Corinto 7:1.
Dagiti met ngay impluensia ti kakadua iti panagbiagtayo? Kuna ti Biblia: “Makikuyogka kadagiti masirib a tattao, ket masiribkanto: ngem ti makikuyog kadagiti maag pagsikorannanto.” (Proverbio 13:20) Napaliiwmo kadin a ti panangpilit dagiti kapatadan masansan a mangituggod kadagiti tattao—agtutubo man ken nataengan—iti panagbartek, panagdroga, ken imoralidad? Wen, no makikaduatayo kadagiti tattao nga agar-aramid kadagita, agbalintayto a kas kadakuada, kas kuna ti Biblia: “Dagiti dakes a pannakitimpuyog dadaelenda dagiti makagunggona nga ug-ugali.”—1 Corinto 15:33.
Sigurado a kayattay amin ti agragsak. Ngem kasano nga agragsaktayo? Naamirismo kadi ti kuna ti Biblia a saan a dagiti bambanag ti mangparagsak kadatayo no di ket, dagiti umno a kababalin ken relasion, nangnangruna ti naimbag a relasion iti Dios? (1 Timoteo 6:6-10) Kinuna ni Jesu-Kristo iti nalatak a sermonna idiay Bantay, a dagidiay pudpudno a naragsak ket “sipapanunot iti naespirituan a kasapulanda,” “naalumamay ti kaririknada,” “mawaw iti kinalinteg,” “naasi,” “nasin-aw ti pusoda,” ken “mannakikappia.”—Mateo 5:1-9.
No panunotem a naimbag dagiti pannursuro ti Biblia, maapresiarmo no kasano a makatulong dagitoy a mangibagnos iti panagbiagtayo. Kas gubuayan iti balakad, naisangsangayan ti Biblia. Kanayon a makagunggona ti balakadna—saan laeng a teoria dayta. Di pulos mangisuro iti pakadangrantayo. Dagidiay mangyaplikar iti ibalbalakad ti Biblia kanayon a magunggonaanda.
Panagadal Maipanggep iti Biag
Ngem, malaksid iti pannakagunggonatayo itan, ipanamnama ti Biblia ti panagbiag iti masanguanan. Salaysayenna ti nakaskasdaaw unay a pannakadalus ti daga ken panagbalin dayta a nakapimpintas a pagtaengan dagidiay agserbi iti Dios. Amirisem daytoy makaparagsak a salaysay maipapan iti masanguanan: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti tattaona. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”—Apocalipsis 21:3, 4; Proverbio 2:21, 22.
Panunotem laengen: Awanton ti agsakit nga ubbing, awanton ti mabisinan, awanton dagiti nakaam-amak a sakit a mangpakapuy iti bagi, awanton ti nakaro nga ut-ot! Dagiti lua gapu iti pannakapaay, pannakaupay, ken panagladingit mapukawton, ta mabaliwan wenno maikkatton dagiti pakaigapuan dagita a bambanag. Tangay dadaelenton dagiti anghel ti Dios dagiti tattao a sipapakinakem nga agar-aramid iti dakes, awanton dagiti mannanakaw, mammapatay, naulbod, ken dadduma pay a mamagpeggad iti biag. Addaanton dagiti tattao iti bukodda a balay ket tagiragsakendanto dayta a sitatalged.—Isaias 25:8, 9; 33:24; 65:17-25.
Magustuam kadi dayta? Kayatmo kadi a maammuan ti ad-adu pay maipapan iti panangyaplikar kadagiti prinsipio ti Biblia tapno magunggonaanka itan ken iti masakbayan? No kasta, pangngaasim ta makiumanka kadagiti Saksi ni Jehova, ket maragsakandanto a mangiraman kenka ken iti pamiliam iti programada iti intero a lubong a “panagadal maipanggep iti biag.”