“Pangngaasiyo ta Tulongandak! Dakayo Laeng ti Namnamak”

KASTA TI MAUDI A KINUNA TI MAYSA A DOKTOR idiay Kaunas Medical University idiay Lithuania iti suratna iti opisina dagiti Saksi ni Jehova iti dayta a pagilian. Inlawlawag ti doktor:

“Rinugiak ti nagbasa iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo idiay panggedak. Planok idi nga usaren ti impormasion manipud iti dayta para iti sumagmamano nga artikulok, ngem adda napasamak ken napukaw ti libro. Nabatad nga adda nangala iti dayta. Masuronak unay ta napukawko ti maysa a banag a kasta ti kapategna. Pangngaasiyo man ta kaasiandak unay a patulodan iti maysa a kopia.

“Kasapulak unay daytoy a libro ta sumarsarungkarak iti adu nga eskuelaan ken makilanglangenak kadagiti agtutubo, ket makatulong kaniak daytoy a libro a mangsungbat iti adu a saludsodda. No maawatko ti sabali pay a kopia, idulinkonto dayta idiay balay ken an-annadakton. Nakapatpateg ti linaon dayta a libro isu a nalabit nga adda nangala iti dayta. Kadagitoy narikut a panawen, masapul nga adda panggun-odak iti pammabileg. Pangngaasiyo ta tulongandak! Dakayo laeng ti namnamak.”

Sungbatan ti libro nga Iyimtuod ti Agtutubo ti adu a saludsod nga ut-utoben dagiti agtutubo a kas iti: “Kasano a Maallukoyko Dagiti Dadakkelko nga Ikkandak ti Ad-adu Pay a Wayawaya?,” “Rebbeng Aya a Pumanawak iti Balay?,” “Kasanoak a Maaddaan ti Pudpudno a Gagayyem?,” “Ania a Karera ti Rebbeng a Piliek?,” “Ti Ngay Panagdenna Sakbay ti Panagasawa?,” ken “Kasanok a Masierto no Pudno nga Ayat Dayta?” Dagiti nadakamat ket sumagmamano laeng a paulo dagiti kapitulo. No kayatmo ti agkiddaw iti daytoy a libro, suratam ken ibusonmo ti kupon iti baba iti address a makita iti kupon wenno iti maitutop nga address iti panid 5 daytoy a magasin.

□ Kayatko ti maaddaan iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo.

□ Interesadoak iti libre a panagadal iti Biblia iti pagtaengan.