Manipud Kadagiti Agbasbasa
Dagiti Prinsipio Nasdaawak iti panglukat a parapo iti maikadua nga artikulo ti serye nga “Ania ti Napasamaken Kadagiti Prinsipio?” (Hunio 8, 2003) Kunana: “Karaman kadagiti kasayaatan a maisagut dagiti nagannak iti annakda isut’ awan kondisionna a panagayatda ken dagiti prinsipio nga iyulidanda a saanda laeng a basta ibaga.” No dagiti ubbing ken nataengan ket agtignay a kas man la maikarida latta iti panagayat ti maysa ken maysa, kanayon a dumakes dagiti prinsipio.
K. B., Estados Unidos
Sungbat ti “Agriingkayo!”: Nausar ti sasao nga “awan kondisionna a panagayat” tapno maisingasing a saan koma nga iparipirip dagiti nagannak a saan a napudno wenno mapagduaduaan ti panagayatda kadagiti annakda—a mabalin a babawyen iti aniaman a kanito gapu iti panagkamali ti anak wenno obligado ti maysa nga anak a gun-oden ti panagayat ti dadakkelna babaen ti naan-anay a panagaramidna iti amin a banag.—Efeso 6:4; Colosas 3:21.
Para kaniak, nagsayaat ti pannakaisurat ti maudi nga artikulo daytoy a serye. Nakasimsimple, lohikal, ken makaparegta unay ti material. Napintas ti retrato. Pagyamanan kadagita a makaliwliwa nga artikulo.
M. P., Estados Unidos
Danum Pagyamanan iti artikulo a “Danum—Likido a Napateg iti Biag.” (Hunio 8, 2003) Inadaw daytoy nga artikulo ti imbaga ti maysa nga espesialista iti kinalukmeg a nangisingasing a dagiti nasalun-at a tattao ket rumbeng nga uminum iti walo agingga iti sangapulo a baso a danum iti kada aldaw. Nupay kasta, no adda sakit ti puso wenno agpalia ti bato ti maysa a tao, isingasing dagiti doktor a saan unay nga uminum dagiti pasiente iti danum.
T. A., Japan
Sungbat ti “Agriingkayo!”: Nagduduma dagiti singasing maipapan iti daytoy a banag. Kuna iti dadduma nga eksperto nga iti sumagmamano a kasasaad, masapul a limitado ti danum nga inumen. Nainsiriban nga agkonsulta ti maysa a tao iti personal a doktorna agpaay iti kanayonan a balakad.
Postpartum Depression Maysaak nga ina ket addaanak iti patpatgen nga anak a babai a makatawen pay laeng. Nariknak ti kinadungngo ni Jehova idi inukagko ti Agriingkayo! ken binasak ti artikulo a “Pannakaawat iti Postpartum Depression.” (Hunio 8, 2003) Kurang ti sasao a mangyebkas iti panagyamanko gapu iti daytoy nga artikulo. Agyamanak unay ta miembroak ti maysa nga organisasion a siaayat a mangay-aywan iti tunggal miembrona. Pagyamanan unay!
M. G., Espania
Crossword Puzzle Pagyamanan iti Hunio 8, 2003 nga Awake! Nakitak ti segseggaak unay—ti crossword puzzle! Agarup uppat a tawenen a maysaak a Saksi ni Jehova, ket nasungbatakon ti dandani amin a puzzle a naipablaak sipud idi. Nagsayaat dayta a pangammo kadagiti teksto iti Biblia. Itultuloyyo ti nagsayaat a trabahoyo. Segseggaak a sungbatan ti ad-adu pay a puzzle-yo iti masanguanan!
K. G., Estados Unidos
Sungbat ti “Agriingkayo!”: Iti dadduma a lenguahe, ti pannubok nga ‘Ammoyo Kadi?’ ti kasandi ti crossword puzzle.
Dagiti Sentido Pagyamanan iti serye a “Dagiti Nakaskasdaaw a Sentido iti Biag—Apresiarem Aya Dagitoy?” (Marso 8, 2003) Dagiti sentidotayo ti talaga a makatulong kadatayo a mangapresiar iti biag ken aglawlawtayo. Dagiti artikulo a kas kadagitoy ti mangpabileg iti panagayattayo iti Dios. Pagyamanan iti panangipablaakyo kadagitoy.
J. N., Burundi
Materialismo Kayatko ti agyaman gapu iti artikulo a “Ti Panangmatmat ti Biblia: Ania ti Materialismo?” (Abril 8, 2003) Agpayso nga adu a tattao ita ti agtarigagay a bumaknang, ket nakalkaldaang ta daytoy a problema ti mabalin met a mangapektar kadagiti Kristiano. Tinulongannak daytoy nga artikulo tapno maawatak no ania ti materialismo ken no kasano a liklikan dayta. Ita, aramidek ti amin a kabaelak tapno maipangpangrunak dagiti naespirituan a banag imbes a dagiti material a banag. Agyamanak unay iti panangipablaakyo kadagita a makaisuro nga artikulo!
Z. K., Russia