Rehabilitasion Kadagiti Pagbaludan ti Mexico

Babaen iti mannurat ti Agriingkayo! idiay Mexico

TI REHABILITASION, wenno panangtulong kadagiti preso a mangabaruanan, ti maysa kadagiti madakamat a makagapu iti pannakaibaludda. Nupay kasta, saan nga umdas ti pannakaibalud laeng tapno mangabaruanan ti maysa a preso. Masapul a ti panunot ken pusona a mismo ti manggutugot kenkuana a mangabaruanan. Kalpasanna, sipapasnek a pagbabawyanna dagiti napalabas a basolna ken tarigagayannan ti agbalbaliw. Iti adu a pagbaludan iti intero a lubong, sibaballigi a nangabaruanan dagiti preso babaen iti panangyadal iti Biblia nga idadaulo dagiti Saksi ni Jehova. Usigentayo ti kasta a programada idiay Mexico.

Sarsarungkaran dagiti Saksi ni Jehova ti 150 a pagbaludan iti Mexico. Mangituktukonda iti programa a panagbasa iti Biblia agraman panangisuro kadagiti naimbag a kababalin ken doktrina ti Biblia. Kas pagarigan, iti maysa a pagbaludan iti Ciudad Juárez, Chihuahua, agarup 1,200 a balud ti regular a kaskasabaan dagiti ministro a Saksi ni Jehova. Dakkel ti panagraem dagiti balud kadakuada ken salaknibanda pay ida kadagiti napeggad a kasasaad. Naminsan, rimsua ti riribuk iti dayta a pagbaludan. Dadduma kadagiti kadaksan a kriminal ti namagtalna iti kasasaad isu a nakaawid dagiti Saksi a dida naan-ano.

Ti Mayo 8, 2001 a ruar ti Agriingkayo! nga addaan iti serye ti akkubna a “Makapagbalbaliw Kadi Dagiti Balud?” ket nagustuan agpadpada dagiti balud ken autoridad iti pagbaludan. Iti pagbaludan idiay San Luis Río Colorado, Sonora, 12 a Saksi ti nangiwaras iti 2,149 a kopia dayta a magasin.

No adda interesado unay iti Biblia, linawas nga agsubli dagiti Saksi tapno isuroda ti Biblia ken mangangay kadagiti narelihiosuan a gimong. Kasano kaballigi daytoy a programa a panangisuro iti Biblia tapno mangabaruanan dagiti balud?

Dagiti Balud Nagbalinda a Kristiano a Ministro

Ni Jorge ket nangrugi nga agaramid iti krimen sakbay pay nga agtawen iti 20. Nawayawayaan kalpasan a naikarona ti 13 a tawen a sentensiana iti pagbaludan idiay Islas Marías. Ngem di nagbayag, nagsubli manen iti maiparit a panagnegosiona iti droga. Kas propesional a pumapaltog, nasursurona nga ibanag dagiti bilin a pumatay isu nga idi agangay, 32 a tattao ti napapatayna. Idi naibalud manen, pinakaammuan dagiti abogadona a kayat dagiti dati nga apo-apo ti sindikato a nakimiembruanna ti agpiansa iti dakkel tapno mawayawayaan. Kayat dagiti apo-apona a mawayawayaan tapno adda manen maipapatayda kenkuana. Ngem iti daytoy a tiempo, ni Jorge ket agpapayadalen iti Biblia kadagiti Saksi ni Jehova. Rimmang-ayen iti naespirituan agingga a nagbautisar ken nagbalinen nga amin-tiempo a manangaskasaba, wenno ministro a payunir iti dayta a pagbaludan. Kayatna aya ti mawayawayaan tapno agtrabaho manen kadagiti apo-apona iti maiparit a panagnegosio iti droga wenno agtalinaed lattan iti pagbaludan ken agserbi ken Jehova? “Kaykayatko ti agtalinaed ditoy pagbaludan tapno maikarok ti amin a dakes nga inaramidko,” kinuna ni Jorge. “Ita, agserserbiakon ken Jehova a Dios, ti Soberano nga Apo.” Nagtalinaed ni Jorge a matalek iti Dios ken natay nga addaan iti namnama a mapagungar. Kastoy ti masao ti kakaduana nga agad-adal metten iti Biblia, ‘Ammona ti kinapudno ket ti kinapudno ti nangwayawaya kenkuana.’​—Juan 8:32.

Ni David, a mangikarkaro iti sentensiana a 110 a tawen gapu iti panangpapatay, panangkidnap, ken panagtakaw, ket naipreso iti siiinget a maguguardiaan a paset ti pagbaludan nga agpaay kadagiti napeggad a kriminal. Ngem gapu ta simmayaat unay ti kababalinna sipud idi rinugianna ti nakipagadal iti Biblia kadagiti Saksi ni Jehova, naikkan iti naisangsangayan a permiso a tumabuno iti gimong iti ruar ti pagbaludan babaen ti panangkuyog ti maysa a guardia. Nagbalbaliw ti biagna sigun kadagiti pagannurotan ti Biblia, isu a mangaskasaba itan ken walo a padana a balud ti iyad-adalannan iti Biblia. Nasdaaw unay ti mismo a pamiliana gapu iti panagbalbaliwna isu a sarsarungkarandan tapno maisurona ti Biblia kadakuada. Kastoy ti kinuna ni David, “Pulos a diak mamingga nga agyaman ken Jehova gapu iti impaayna kaniak a naespirituan a wayawaya.”

Gapu iti programa dagiti Saksi ni Jehova a panangyadal iti Biblia, 175 a balud iti 79 a pagbaludan iti Mexico ti inanamonganen ti kongregasion Kristiano a mangasaba, ket 80 kadagitoy ti nabautisaranen. Agdagup iti 703 ti iyad-adalanda iti Biblia a kadua ti dadduma pay a balud. Agarup 900 met a balud ti tumabtabuno kadagiti Nakristianuan a gimong a maang-angay kadagiti pagbaludan.

Pammadayaw Dagiti Autoridad

Padayawan dagiti autoridad iti pagbaludan ti ar-aramiden dagiti Saksi ni Jehova. Kas pagarigan, dagiti opisial iti pagbaludan iti Tekax, Yucatán, inikkanda ida iti sertipiko a pammadayaw gapu kadagiti “naisangsangayan a panangisakit ken panangtulongda” kadagiti balud kabayatan ti tawen 2002.

Idi damo nga inangay dagiti Saksi ti programa a panangisuro iti Biblia, ti inggrupo a panaggigimongda ti siiinget a binantayan ti sumagmamano a guardia. Ngem idi agangay, bayat a sumaysayaat ti kababalin dagiti balud, raraemen idan dagiti guardia, agingga a maysa laengen ti natudingan a mangbantay kadakuada.

Ti pagbaludan iti Ciudad Juárez ket adda bukodna a Kingdom Hall. Napatgan ti permiso a maiserrek dagiti materiales a pagbangon tapno ti dati a di maus-usar a metal nga estruktura ket agbalin a lugar a pagdaydayawan. Ti 13 a bautisado a balud ken dagiti iyad-adalanda a padada a balud ti nagtitinnulong a nagibangon. Ti pasdek ket addaan iti sound system, banio, tugtugaw a kas kadagiti tugaw iti pagsinean, ken mabalin a pagtugawan ti 100. Agarup 50 a tattao ti regular a tumabtabuno iti lima a linawas a panaggigimong.

Wen, posible ti mangabaruanan babaen iti panangisuro iti Biblia. Kas iti nadakamat iti Biblia a ni Manases nga ari ti Juda ken nakaaramid idi kadagiti nakaro a kinadakes sa naibalud idiay Babilonia ngem nagbabawi ken inkararagna a mapakawan, mapasayaat met ita dagiti balud ti kababalinda tapno agbalinda a managbuteng iti Dios.​—2 Cronicas 33:12, 13.

[Ladawan iti panid 20, 21]

Panagbautisar iti uneg ti pagbaludan

[Ladawan iti panid 20, 21]

Dagiti amin-tiempo a ministro ken dagiti instruktorda iti Pioneer Service School iti uneg ti pagbaludan