Masarakam ti Pudno a Kinaragsak!
ADU a tattao iti intero a lubong ti kasla mamati a ti nangina ken kabaruan a modelo a kotse, adu a kuarta iti banko, nangato ken nadayaw a karera, dakkel a balay, ken dagiti kabaruan nga elektroniko nga alikamen, agraman ti napintas a langa wenno maskulado a pammagi dagiti sekreto ti kinaragsak. Ngem talaga kadi a ti kinaragsak ket agpannuray kadagita a material ken pisikal a kinabaknang?
Addan “nagadu a panagsirarak maipapan iti kinaragsak, panangnamnama, panangipamaysa kadagiti naimbag a banag ken naimbag a kababalin,” kuna ti espesial a report ti magasin a Time. Adu ti agsiddaaw kadagiti resulta dagita a panagadal. Nakaskasdaaw ti panagpapada dagiti ebidensia a mangipakita nga al-allilawen dagiti tattao ti bagbagida no pagarupenda a ti kuarta, kinalatak, wenno kinapintas ti mangparagsak kadakuada. Kinapudnona, ibangbangonda ti panagbiagda iti pamuon a mabalin a makadangran iti kapanunotanda wenno mabalin pay ketdi nga agsagabada iti nakaro a panagliday.
Idiay Estados Unidos, adu a tattao ti nabakbaknang itan ngem idi. “Ngem kinapudnona, dinatay pinagbalin a naragragsak,” kuna ti magasin a Time. Siempre, kasta met la ti maibagatayo maipapan kadagiti tattao iti dadduma a pagilian. Nupay kellaat ken napartak a rimmang-ay ti ekonomia ti China, immadu met dagiti naliday. Ti panagpakamatay ti nagbalinen a “kangrunaan a pakatayan dagiti agtawen iti nagbaetan ti 15 ken 34” sadiay, kuna ti magasin nga Access Asia a rummuar iti maminsan iti kada tallo a bulan. Ti pannakapilit dagiti agtutubo nga agballigi iti narigat a pagbiagan ken makapasikor a lubong a mangipangpangruna iti pananggun-od iti karera ken kinabaknang ti kasla maysa a kangrunaan a makagapu iti kastoy a pagannayasan.
Nabatad a ti ad-adu a material a sanikua dina kissayan ti panagdanag ken panagsikor; kinapudnona, pakaruenna pay ketdi dagitoy. “Ti wagas ti panagbiagtayo a mismo ita nagbalinen a kangrunaan a pakaigapuan ti panagdanag ken panagsikortayo,” kinuna ti maysa a panagadal iti unibersidad. Sigun iti mangus-usig iti kasasaad ti kagimongan a ni Van Wishard, “ti kinasalun-at ti isip ken rikna ti kapartakan nga umadu a kita ti insurance para iti salun-at a baybayadan ti adu a kompania.”
Uray dagiti ubbing ket maapektaran met iti napartak ti panagbaliwna a lubongtayo. Addan dagiti magun-odan a libro para kadagiti ubbing a walo ti tawenda a mangbalakad kadakuada “no kasano a mailasinda dagiti sintoma ti panagsikor ken no kasano a tamingenda dayta,” kuna ni Wishard. Ken sigun iti listaan a mangipaay iti impormasion maipapan iti depression, umad-adu iti nakaskasdaaw a 23 a porsiento iti makatawen ti bilang ti ubbing iti adu a pagilian iti Laud, a natakuatan nga agsagsagaba iti depression. Kanayonanna, “dagiti di pay ageskuela ti kapartakan nga umadu a pakailakuan dagiti agas a pangsumra iti panagliday.”
Kumarkaro met ti panagbuteng—ken saan laeng a gapu iti mapagduaduaan nga ekonomia. Gapu iti iyaadu ti napolitikaan ken narelihiosuan a kinamanaglablabes, kabuteng ti adu a tattao dagiti pagam-amkan a mabalin a mapasamak iti masanguanan. Adda kadi magun-odan a tulong?
Agarup dua a ribu a tawen ti napalabasen, insuro ni Jesus ti wagas ti panagbiag a naiduma ti panangbang-arna ken mangpabassit iti panagsikor. Simple ti kangrunaan a pannursurona ngem nakapatpateg dayta a kinapudno. Kinunana: “Naragsak dagidiay sipapanunot iti naespirituan a kasapulanda.” (Mateo 5:3) Wen, pinaregta ni Jesus dagiti agdengdengngeg kenkuana nga ipamaysada ti kapatgan a kasapulan ti tao—ti naespirituan a kinapudno maipapan iti Namarsua kadatayo ken ti panggepna para kadatayo.
Kas makitatayto kadagiti sumaganad nga artikulo, matulongannatayo dayta a kinapudno tapno maamiristayo no ania ti pudno a napateg. Dayta ti mangiturong iti naragragsak ken ad-adda a makapnek a biag. Ti kasta a naespirituan a kinapudno ti mangted met kadatayo iti naraniag a namnama.
[Blurb iti panid 3]
Ti aya kinaragsak agpannuray kadagiti namaterialan a sanikua?