Tulong a Mangsalaknib Kadagiti Annaktayo

Itay napan a tawen, adda babai a taga-Virginia, E.U.A., a nagsurat tapno iyebkasna ti panangapresiarna iti libro nga Agsursuroka iti Naindaklan a Mannursuro. Kastoy ti kunana: “Sakbay a maturog dagiti appokok, kastoy ti ibagada: ‘Lola, ibasaannakami man iti estoria manipud iti libro ni Jesus.’ Agtawenda iti 4, 6, ken 7, ket kaay-ayoda unay dagiti estoria.”

Kastoy ti inlawlawag daytoy a lola: “Binasak ti kapitulo 32 a napauluan iti ‘No Kasano a Nasalakniban ni Jesus.’ Talaga a nagustuak agsipud ta kalpasan a napagsasaritaanmi no kasano a ni Jehova sinalaknibanna ni Jesus, makatulong ti binasak tapno masalakniban dagiti appokok ti bagbagida babaen ti panangtedna kadakuada iti praktikal a balakad. Kunana: ‘No adda agpanggep a mangaramid iti kasta, ipapilitmo nga ibaga ti kastoy iti napigsa a timek: “Isardengmo dayta! Ipulongka!”’”

Idiay Mexico, imbaga ti ina ti lima ti tawenna nga ubing a babai nga agnagan iti Betsaida a kapaminduan a basbasaenda nga agina ti libro a Mannursuro. Kinuna ti ina: “Dumakdakes ti lubong, ket kumarkaro dagiti pakarigatan a pakaipasanguan ti annaktayo. Kinuna ti anakko nga agyaman gapu iti maisursuro kenkuana no kasano a masalaknibanna ti bagina manipud kadagiti dakes nga impluensia, kas kadagiti nadakamat iti panid 32.”

Daytoy nagpintas ti pannakayilustrarna a libro nga addaan iti 256 a panid a kadkadakkel daytoy a magasin ket napaneknekanen a pudno a makatulong kadagiti nagannak iti panangsurotda iti panangiwanwan kadagiti annakda. (Proverbio 22:6) Simple ti pannakaisalaysay dagiti adalen, a naibasar kadagiti pannursuro ni Jesu-Kristo ngem maibagay iti amin nga edad. Mabalinmo ti agkiddaw iti kopiam no suratam ti naipakuyog a kupon ken ibusonmo dayta iti naipaay nga adres wenno iti maitutop nga adres iti panid 5 daytoy a magasin.

□ Pangngaasiyo ta patulodandak iti kopia ti libro nga Agsursuroka iti Naindaklan a Mannursuro.

□ Interesadoak iti libre a panagadal iti Biblia.