Dandanin Agpatingga Dagiti Didigra

GINGGINED, gubat, bisin, ken sakit—dagitoy ti sumagmamano nga impadto ni Jesus a mangtanda iti “panungpalan ti sistema ti bambanag” a pagbibiagantayo ita. (Mateo 24:3, 7, 8; Lucas 21:7, 10, 11) Siempre, saan a ni Jesus wenno ti Amana a ni Jehova a Dios ti makinggapuanan kadagita a pasamak.

Dagita a naipadto a pasamak ket tanda ti iyaay ti Pagarian ti Dios—ti nailangitan a gobierno nga iturayan ni Jesu-Kristo—ken ti pannakadadael dagiti amin a saan nga agpasakup iti kinasoberano ni Jehova. Ni Jehova ti mangimaniobra iti pannakapasamak dagita. (Daniel 2:44; 7:13, 14) Kalpasanna, agarinto ti talna iti daga, a sadiay awanton ti masapul a pagbutngan a natural a didigra. Naan-anayton a matungpal ti kari ti Dios a: “Ti ilik agnaedto iti natalna a disso a pagyanan ken kadagiti pagtaengan ti naan-anay a panagtalek ken kadagiti di masingsinga a lugar a paginanaan.”—Isaias 32:18.

Umimdenkayo iti Dios ket Agbiagkayo!

Kas nailawlawagen iti immun-una nga artikulo daytoy a serye, makaispal iti biag ti panangipangag kadagiti pakdaar. Ad-adda nga gaplikar dayta a prinsipio kadagiti pakdaar ti Dios a nailanad iti Biblia. Inkari ti Dios: “No maipapan iti daydiay umim-imdeng kaniak, agtaengto iti kinatalged ket saanto a masinga manipud alinggaget ti didigra.”—Proverbio 1:33.

Ikagkagumaan dagiti Saksi ni Jehova ti umimdeng iti Dios babaen ti regular a panangbasada iti naipaltiing a Saona ken panangyaplikarda kadagiti pannursurona. Paregtaendakay met a mangaramid iti dayta. Wen, amin dagiti situtulok nga umimdeng ken Jehova saanda a masapul a pagbutngan ti masanguanan ken ti didigra a dumteng kadagiti nadangkes. Imbes ketdi, mangnamnamada a magun-odanda ti agnanayon a biag iti Paraiso a daga, a sadiay “maragsakandanto iti napalalo iti kinaruay ti talna.”—Salmo 37:10, 11.

[Kahon iti panid 8]

LIWLIWA KADAGITI MALMALDAANGAN

Natayankayo kadin iti maysa nga ing-ingungoten, nalabit maigapu iti natural a didigra wenno dadduma pay a trahedia? Dandani 2,000 a tawen ti napalabasen, di ninamnama a natay ti nasinged a gayyem ni Jesus a ni Lazaro. Idi nadamag daytoy ni Jesus, napan idiay Betania a purokda Lazaro, ket pinagungarna ni Lazaro manipud iti ‘pannaturogna’ ken patay.—Juan 11:1-44.

Inaramid ni Jesus dayta a milagro saan laeng a gapu ta ay-ayatenna ni Lazaro ken ti pamiliana no di ket tapno pasingkedanna ti karina nga agungar “amin dagidiay adda kadagiti pakalaglagipan a tanem” bayat ti panagturay iti Pagarianna. (Juan 5:28, 29) Wen, iti umad-adanin a Paraiso, ikkatenton ni Jesus ti amin a pannakadangran a bunga ti iyaalsa idiay Eden.a—1 Juan 3:8.

[Footnote]

[Kahon/Ladawan iti panid 9]

GINGGINED A NANGBALBALIW ITI PRIORIDADKO ITI BIAG

Idi 1971, maysaak nga agtutubo nga ina ken agngayngayangay nga agbalin a soprano a kumakanta iti opera. Manipud iti lugarmi idiay Winnipeg, Manitoba, Canada, immakarak idi 1957 idiay Hollywood, California, E.U.A. Kayatko ngamin a ragpaten ti kalatko kas kumakanta.

Ni nanangko ket maysa a Saksi ni Jehova. Iti siam a kalgaw, agbiahe manipud idiay Canada tapno bisitaennak. Gundawayanna dagita a panawen a mangisarita kaniak iti maipapan iti Biblia, gapu ta patienna a dayta ti makaipaay iti kasayaatan a balakad mainaig iti kinaragsak ken biag ti pamilia. Ay-ayatek ni Nanang isu nga umimdengak met latta kenkuana. Ngem tunggal agawid, ibellengko dagiti intedna a literatura, gapu ta patiek nga umiso ti pagturturongan ti biagko.

Kalpasanna, iti agsapa ti Martes idi Pebrero 1971, riniingnak ti maysa a ginggined nga 6.6 ti kapigsana. Makatitileng ti unina, ket nakapigpigsa ti panaggunggonna. Sidadanag a tinarayko ti anakko ket nabang-aranak a makakita kenkuana a natalged iti iddana. Idi nagsardeng ti ginggined, agkaiwara dagiti nabuong a sarming ken dagiti linaon ti estantemi, ken uray la nagsabuag ti danum ti swimming pool iti paraanganmi. Nupay natalged ti pamiliak, diak makaturogen.

Nadakamat idin ni Nanang ti maipapan “kadagiti maudi nga aldaw,” inton mapasamak dagiti “dadakkel a ginggined.” (2 Timoteo 3:1; Lucas 21:7-11) Iti dayta a kalgaw, binisitanak manen ngem awanen ti awitna a literatura ti Biblia. Gapu ta awan met ti nagbanagan ti siam a tawen a panangaskasabana kaniak, impagarupna nga awan a talaga ti interesko. Ngem saan a kasta ti napasamak! Kasangsangpetna pay laeng, nagadun ti sinaludsodko kenkuana. Kellaat a bimmaaw ti tarigagayko nga agbalin a kumakanta ken nalatak.

Iti dayta met laeng a lawas, kimmuyogak kenni Nanang a nakigimong iti Kingdom Hall iti lugarmi, ket kalpasan dayta, manmanoak laengen a lumangan. Imbirokannak iti mangyadal kaniak iti Biblia. Nabautisaranak idi 1973, ket ita mangbusbusbosakon iti agarup 70 nga oras iti kada bulan a mangiwarwaragawag iti naimbag a damag ti Pagarian ti Dios. (Mateo 24:14) Wen, imbes a bimmaaw ti pammatik iti Dios gapu iti ginggined, pinabilegna ketdi ti pammatik.—Kas insalaysay ni Colleen Esparza.