Nakatulong iti Panagbitla ti Maysa nga Estudiante
Adu a ganggannaet ti agad-adal iti maysa a bokasional nga eskuelaan idiay Alemania. Naggapuda idiay Francia, Georgia, India, Lebanon, Poland, Russia, South Africa, Ukraine, Vietnam, ken iti dati a Yugoslavia.
Nagsurat ti maysa nga estudiante: “Idi dinamag ti maestrami no siasino ti mayat nga agbitla, nagboluntarioak. Pinilik ti suheto a ‘Dagiti Praktikal a Sungbat Kadagiti Saludsod nga Iyim-imtuod Dagiti Agtutubo.’ Imbasarko dayta iti libro a Dagiti Saludsod nga Iyimtuod ti Agtutubo—Dagiti Sungbat nga Epektibo. Nagustuan dagiti estudiante ti nadumaduma a suheto iti libro ken dagiti nagsayaat a balakadna.
“Kalpasan ti panagbitlak, nagyaman dagiti estudiante babaen ti napigsa a panagpalakpakda. Yantangay aminda ket agad-adal iti nadumaduma a lenguahe ken nalaingda iti Ingles, napaimaak ida iti 30 nga Ingles a kopia ti libro nga Iyimtuod ti Agtutubo. Inikkak met ti maestrami iti kopiana iti pagsasao nga Aleman.”
Kadagiti simmaruno nga aldaw, intultuloy dayta nga estudiante ti pannakipatangna iti dadduma a kaeskuelaanna maipapan kadagiti pannursuro ti Biblia, ket nangipakitada iti interes. Inikkanna ida iti dadduma pay a naibasar-Biblia a literatura iti pagsasao nga Arabe, Bengali, Espaniol, Georgiano, Polaco, Ruso, ken Vietnamese.
Nalabit adda am-ammom nga agtutubo a matulongan ti libro nga Iyimtuod ti Agtutubo. Dagitoy ti dadduma iti 39 a kapitulona: “Kasanoak a Maaddaan ti Pudpudno a Gagayyem?,” “Ti Ngay Panagdenna Sakbay ti Panagasawa?,” ken “Kasanok a Masierto No Pudno nga Ayat Dayta?” Mabalinmo ti agkiddaw iti kopiam no suratam ti naipakuyog a kahon ken ibusonmo dayta iti naipaay nga adres wenno iti maitutop nga adres iti panid 5 daytoy a magasin.
□ Kayatko ti maaddaan iti kopia ti libro a naipakita ditoy.
□ Interesadoak iti libre a panagadal iti Biblia.