Danum a Mangyeg iti Biag
Nagdaliasat ni Jesus idiay Samaria, amianan ti Jerusalem. Nabannog ken mawaw. Bayat nga agin-inana iti asideg ti bubon, nagkiddaw iti danum manipud iti maysa a Samaritana nga agsaksakdo. Nasdaaw ti babai gapu ta maysa a Judio ti agkidkiddaw kenkuana iti danum, yantangay idi umuna a siglo, adda panangidumduma iti nagbaetan dagiti Judio ken Samaritano.
Gapuna, ti masmasdaaw a babai inimtuodna ken Jesus: “Kasano a sika, nupay maysaka a Judio, dumawatka kaniak iti inumen, idinto ta maysaak a babai a Samaritana?”
Insungbat ni Jesus: “No naammuam koma ti awan bayadna a sagut ti Dios ken no siasino ti agkunkuna kenka, ‘Ikkannak ti inumen,’ nagdawatka koma kenkuana, ket inikkannaka koma iti nabiag a danum.”
Intuloy nga inlawlawag ni Jesus: “Tunggal maysa nga umin-inum itoy a danum mawawto manen. Siasinoman nga uminum manipud iti danum nga itedkonto kenkuana saanton a pulos mawaw, ngem ti danum nga itedkonto kenkuana agbalinto kenkuana nga ubbog ti danum nga agburburayok a mangipaay iti agnanayon a biag.”—Juan 4:1-15.
Ania a danum ti tuktukoyen ni Jesus?
TI BIBLIA inawaganna ti Namarsua, ni Jehova a Dios, kas “ti ubbog ti sibibiag a danum.” (Jeremias 2:13) Ti biag ket sagut ti Dios. Agbiagtayo no awatentayo ti danum nga ipapaayna, agpadpada iti pisikal ken iti naespirituan a pamay-an.
Ad-adda a kasapulantayo ita ti naespirituan a panangiwanwan. Kinapudnona, agsagsagaba dagiti tattao iti naespirituan a kinatikag. Dagiti tattao mawawda kadagiti sungbat dagiti saludsod a kas iti: Sadino ti ayan dagiti natay? Makalangentayto kadi manen ida? Apay nga ipalpalubos ti Dios ti panagsagaba? Agpatingganto kadi ti gubat, krimen, bisin, ken sakit? Patien dagiti Saksi ni Jehova a dagiti makapnek a sungbat kadagitoy a saludsod ket masarakan kadagiti makapagin-awa a “danum” iti Sao ti Dios, ti Biblia.
Iti pannakisarita ni Jesus iti Samaritana, kas nadakamaten, imparipiripna ti makaited-biag a danum ti kinapudno nga agubbog iti Sao ti Dios. Awisendakayo dagiti Saksi ni Jehova nga uminum kadagiti nasin-aw a danum ti kinapudno. Masarakan daytoy nga awis iti maudi a libro ti Biblia: “Ti asinoman a mawaw umay koma; ti asinoman a mayat awatenna koma ti danum ti biag nga awan bayadna.”—Apocalipsis 22:17.
Tapno ad-adu pay ti maammuanyo maipapan kadagiti gunggona nga iyeg ti Pagarian ti Dios iti sangatauan, makisaritakayo kadagiti Saksi ni Jehova iti kaasitgan a Kingdom Hall wenno agsuratkayo iti maitutop nga adres a nakalista iti panid 5 daytoy a magasin. Mabalinyo met a kitaen ti Web site a www.watchtower.org.
[Kahon iti panid 8, 9]
TI KADI RELIHION PENKENNA TI PANNAKAWAW TI TAO?
Tapno makainum kadagiti makapagin-awa a danum ti kinapudno, saan nga umdas ti basta pannakimisa wenno panagbalin a relihioso. Kinapudnona, adu kadagiti kangrunaan a relihion ita ti nangpakaro kadagiti parikut ti tao imbes a mangrisut kadagita. Usigenyo ti maysa a pagarigan: Kadagiti panawen ti gubat, dagiti Katoliko patayenda ti padada a Katoliko, dagiti Protestante patayenda ti padada a Protestante—bayat a ti agsumbangir a dasig ikarkararagda ti tulong ti Dios tapno agballigida!
Malaksid kadagita, adu ti damag maipapan kadagiti eskandalo iti simbaan a nakairamanan dagiti klero a nangdispalko kadagiti pondo wenno nangabuso kadagiti ubbing. Talaga a narugit ti danum nga aggubuay iti kaaduan a relihion. (Apocalipsis 17:4-6; 18:1-5) Kasta ti panangiladawan ti Biblia kas mabasa iti Tito 1:16: “Silalatak nga ideklarada nga ammoda ti Dios, ngem paglikudanda babaen kadagiti aramidda.” Nagbassit ti naaramidan ti relihion a mangpennek iti pannakawaw ti tao kadagitoy tiempo ti naespirituan a tikag.
[Kahon/Ladawan iti panid 9]
Babaen ti 19 a kapitulona, ti 224 ti panidna a publikasion nga Ania a Talaga ti Isursuro ti Biblia? ilawlawagna dagiti sungbat ti Biblia kadagiti gagangay a saludsod a kas iti:
“Ania ti panggep ti Dios iti daga?”
“Sadino ti ayan dagiti natay?”
“Agbibiagtayo kadin kadagiti ‘maudi nga aldaw’?”
“Apay nga ipalubos ti Dios ti panagsagaba?”
[Ladawan iti panid 9]
Masarakanyo ti ‘danum ti kinapudno’ iti Kingdom Hall iti lugaryo