Nabannog nga Ubbing

◼ “Diak nalpas ta nabannogakon,” kuna ti agtawen iti walo a ni Pablo, idi sinaludsod ti maestrana ti maipapan iti asaynmentna. Kas iti daytoy a makaturturog nga ubing a taga-Espania, adu nga ubbing ti maipaspasango iti makabannog nga agmalem, a pakairamanan ti 12 nga oras wenno ad-adu pay a busbosenda iti panageskuela ken panagaramid iti asaynmentda. Apay a nagadu ti homework-da?

Dadduma a nagannak ti mangipasalista kadagiti annakda kadagiti aktibidad nga awan pakainaiganna iti eskuelaan tapno agtalinaedda nga okupado agingga a makaawid dagiti nagannakda. Adda met dagidiay mangipaannurot iti nainget nga eskediul kadagiti annakda gapu ta kayatda nga agbalin dagitoy a nalaing idiay eskuelaan ken maaddaan iti naballigi a karera. Tapno maibanagda dayta, adu a nagannak idiay South Korea ti mangipasalista iti annakda kadagiti eskuelaan nga agkalikagum iti naanep unay a panagadal. Maipasango dagiti annak iti nainget nga eskediul, a no dadduma, mangrugi dayta iti 7:30 ti bigat agingga iti tengnga ti rabii wenno naladladaw pay iti uneg ti pito nga aldaw iti kada lawas. “Aramiden dagiti nagannak ti amin a kabaelanda tapno laeng mapageskuelada dagiti annakda kadagiti de kalidad nga unibersidad,” kuna ti New York Times.

Kuna ti linawas a pagbasaan a Mujer hoy idiay Espania: “Nupay kayatda ti kasayaatan kadagiti annakda, adda dagiti nagannak nga adu ken nangato unay ti kalikagumanda kadakuada.” Tapno matungpal dagita a kalikagum, piliten dagiti annak a ragpaten dagita nga uray la mabambannogda. “Sigun iti obserbasionmi, adu unay ti makalkalikaguman kadagiti agtutubo,” kuna ni Antonio Cano, presidente ti Spanish Society for the Study of Anxiety and Stress. Sigun iti maysa met a propesor, mabambannog unay ti 40 a porsiento nga ubbing idiay Espania nga awan pay 15 ti tawenna. Napeggad dayta ta nalabit agturong pay iti panagpakamatay. Idiay South Korea, kas pagarigan, “kadagiti agtawen iti 10 agingga iti 19, ti panagpakamatay ti maikadua a kangrunaan a pakaigapuan ti ipapatay, a sumaruno iti aksidente ti lugan,” kuna ti The New York Times.

Siempre, masapul met nga igaed dagiti agtutubo ti ageskuela ket rumbeng nga ipaay dagiti nagannak ti amin a kabaelanda a tulong, yantangay saanton a maulit dagita a tawen. Ngem “saan pay nga adulto dagiti ubbing. Saanda pay a kabaelan dagiti makabannog nga aktibidad iti agmalem,” kuna ti maysa a maestra a ni Irene Arrimadas. Gapu ta ammo dayta dagiti naayat a nagannak, siguraduenda koma a matagiragsak dagiti ubbing ti umdas nga inana ken makagunggona nga aktibidad ti pamilia. Kas panangipaganetget iti kinapateg ti kinatimbeng, insurat ti masirib nga ari a ni Solomon: “Nasaysayaat ti sangarakem nga inana ngem iti dua a rakem a napinget a panagtrabaho ken panangkamkamat iti angin.”—Eclesiastes 4:6.a

[Footnote]