Ania ti Ammom Maipapan Kadagiti Saksi ni Jehova?
“Iti Internet, adun ti nabasak maipapan kadagiti Saksi ni Jehova. Addan dagiti nangngegko a sumagmamano a sayangguseng ken adu a pammadakes kadakuada isu a saan a nasayaat ti panangmatmatko kadagiti Saksi ni Jehova,” insurat ti maysa a masansanay a reporter idiay Denmark.
KALPASANNA, ininterbiu dayta a reporter ti maysa a pamilia a Saksi. Ania ti resultana? “Nagbaliw ti panangmatmatko kadakuada apaman a nakastrekak iti pagtaenganda!” insuratna. “Nalabit saan unay nga am-ammo ida dagiti tattao, wenno mabalin nga alistotayo unay a mangipapan. Kastaak idi ngem nagkamaliak gayam.”—Cecilie Feyling iti Jydske Vestkysten.
Gapu ta nakalangenna dagiti Saksi ni Jehova iti pagtrabahuan, ti maysa a human resources consultant iti kompania nga aduan iti puesto idiay Europa kinunana a mapagtalkan dagiti Saksi isu a kaykayatna nga alaen ida kas empleado.
Siempre, nalatlatak dagiti Saksi ni Jehova gapu iti trabahoda a panangasaba iti publiko. Ammoda nga adda dagiti maay-ayatan a makisarita maipapan iti Biblia idinto ta adda met dagiti agkedked. Kinapudnona, nasurok a pito a milion iti dandani amin a pagilian ti regular a makipagad-adal iti Biblia kadagiti Saksi. Inton agangay, dadduma kadakuada ti agbalinto met a mannursuro iti Biblia. Kas pagarigan, iti Estados Unidos, inreport ti National Council of Churches a kadagiti 25 a kadadakkelan a relihion, dagiti Saksi ni Jehova ti 1 kadagiti 4 laeng nga immadu ti miembrona.
Apay a minilion ti makipagad-adal iti Biblia kadagiti Saksi? Kasano ti panagadalda? Manamnama kadi nga agbalinda a Saksi? Uray no awan panggepmo nga agbalin a Saksi ni Jehova, karbengam a maammuan dagiti agpayso a sungbat kadagita a saludsod. Isu a dimo patien a dagus dagiti mangngegmo a pammadakes wenno sayangguseng no di ket ammuem dagiti kinapudno. Kuna ti Biblia iti Proverbio 14:15: “Ti maag patienna amin a mangngegna ngem ti masirib maamirisna a kasapulanna ti pammaneknek.”—The New English Bible.
Sapay koma ta matulongannaka daytoy a ruar ti Agriingkayo! tapno siuumiso a maam-ammom a naimbag dagiti Saksi ni Jehova. Kinapudnona, ti laengen panangbasam iti daytoy a magasin ket mangipakita a nalawa ti panagpampanunotmo ken dika mangidumduma. Paregtaendaka a bayat a basbasaem ti sumaganad nga uppat nga artikulo ken dagiti naipakuyog a kahon, kitaem dagiti naisitar a teksto iti mismo a Bibliam.a Ti panangaramid iti dayta ket nainsiriban, ken kas kuna ti Biblia, ‘natakneng.’—Aramid 17:11.
a No awan Bibliam ngem makapag-Internet-ka, mabalinmo a kitaen dagiti teksto ti Biblia iti www.watchtower.org. Makitam sadiay ti kahon a “Read the Bible Online.” Naglaon met dayta a Web site kadagiti naibasar-Biblia a literatura iti nasurok a 380 a lenguahe.