Panangmatmat iti Lubong
Ti International Agency for Research on Cancer binaliwannan ti kategoria dagiti pagpangisit nga alikamen nga agusar iti ultraviolet a lawag. Dati ket “posible a makapakanser kadagiti tattao,” ngem itan, “makapakanser kadagiti tattao.”—THE LANCET ONCOLOGY, BRITAIN.
Idiay Argentina, 9 iti kada 10 a masikog ket dida kinayat nga agsikogda.—CLARÍN, ARGENTINA.
“Masansan a makatakuat dagiti biologo kadagiti baro a kita ti mula ken animal. Kada aldaw, agarup 50 ti madisdiskobreda. Dandani 17,000 a baro a mula ken animal ti natakuatan idi 2006 laeng—agarup 1% ti 1.8 milion a nainagananen a kakikita.”—TIME, U.S.A.
Paltog—Salaknib Kadi?
No ti maysa a tao ket agitugot iti paltog, mangsalaknib ngata dayta no adda mangranggas kenkuana? Kaaduanna a saan, sigun iti panagadal ti University of Pennsylvania School of Medicine, U.S.A. No ipuera dagiti insidente a pakairamanan dagiti polis, panangpaltog iti bukod a bagi, ken di inggagara a pannakapaltog, natakuatan dagiti managsirarak a ti agitugot iti paltog ket “4.5 a daras nga ad-adda a mapaltogan no maraut ngem iti daydiay awan imetna a paltog.” Nakita met iti panagadal a dadduma kadagidiay addaan paltog nabaelanda a dinepensaan ti bagida babaen iti paltogda, ngem manmano laeng dayta. Kuna ti report a “rumbeng a siaannad a mausig manen” ti pagarup a ti panagimet iti paltog ket “mangsalaknib no napeggad ti situasion.”
Dagiti Naka-lipstick a Monghe
Dagiti kabbaro a monghe idiay Thailand “daddadaelenda ti reputasion ti konserbatibo a Budismo” babaen ti panagusarda iti lipstick, panagkawesda iti nakakipkipet, “pannagnada nga agkinnikinni ken panagawitda kadagiti bag a para babbai,” kuna ti padamag manipud Bangkok. Gapu iti kababalin dagiti binabai a kabbaro a monghe, insingasing dagiti panguluen ti relihion a masuruanda iti umiso a kababalin ken tigtignay. Inlawlawag ti maysa a nalatak a mannursuro iti Budismo a ti homoseksualidad ket saan a maiparit kadagiti monghe, “ta no kasta, nasurok no kuan a kagudua kadakuada ti maikkat.”
Tren a Para Laeng iti Babbai
Adu a tawenen nga an-anusan dagiti babbai idiay India ti makilinnetlet kadagiti tren. Sadiay a mapaspasaranda ti pananginsulto, panangarikap, panangkeddel, panangmingming, ken panangrurod kadakuada dagiti lallaki a pasahero. Gapu ta umad-adu ti reklamo, inkeddeng ti gobierno nga iti sumagmamano a biahe ti tren, saan a mapalubosan dagiti lallaki nga aglugan, kuna ti periodiko a The Telegraph iti Calcutta. Isu nga iti uppat a kadakkelan a siudad iti India—New Delhi, Mumbai, Chennai, ken Calcutta— adda sumagmamano a tren a para laeng kadagiti babbai. Nakaragragsak kanon dagiti pasahero.