Ti Naamo ken Napigsa a Shetland Pony
● Kadagiti zoo iti dadduma a lugar, mabalin a nakakita wenno nakasakayka payen iti Shetland pony. Kas ipasimudaag ti naganda, naggapuda iti Shetland Islands iti amianan a daya ti Scotland. Kinapudnona, dagiti arkeologo sadiay ket nakakabakab kadagiti tulang dagiti babassit a kabalio a nagbiag rinibu a tawenen ti napalabas.
Dagiti Shetland pony ket nalaka a mailasin gapu kadagiti ababa a gurongda, atiddog a buok iti teltel ken ipusda, ken napuskol a burborda a panglabanda iti nalam-ek a paniempo iti lugar a nagtaudanda. Kadawyanna a nangisit wenno maris kape ti kolorda, ken 28 aginggat’ 42 a pulgada ti katayagda. Saan a kas iti dadduma a kabalio, ti katayag dagiti Shetland pony ket marukod babaen iti pulgada. Malaksid kadagiti American Shetland a saan a lumbes iti 46 a pulgada ti katayagda, 42 a pulgada ti rukod ti katayagan pay laeng a Shetland pony.
Bassit dagiti Shetland pony ngem napigsada. Kinapudnona, no ti kabassitda ti pagibasaran, dagitoy ti kapigsaan kadagiti amin a kita ti kabalio. Gapuna, maus-usarda idi a pagarado, pagbunag kadagiti ganagan, ken agtrabaho kadagiti pagminasan iti karbon, ta dagiti laeng babassit nga animal ti makastrek kadagiti usok. Adu kadagitoy ti saanen a rimrimmuar sipud idi nagtrabahodan kadagiti pagminasan.
Ti Shetland pony ket mayat a taraknen dagiti ubbing ta naamo ken nasingpet no masuruan a naimbag. Nalabit dayta ti makagapu a nasayaat dagiti resulta idi nausar dagitoy a kita ti kabalio kadagiti programa a pang-therapy kadagiti addaan iti pisikal a depekto.
Gapu ta makaay-ayo dagiti galadda ken nalakada a mairuam iti nadumaduma a kasasaad ti aglawlaw, mailaklakodan iti amin a paset ti lubong. Adu payen ti nabuangay a gunglo dagiti agtartaraken ken pagrehistruan kadagiti taraken a pony. Ngem ti naganna a Shetland pony ket nainaig pay laeng iti nagtaudanna nga isla, a sadiay mamanmantener ti kinasalun-at ken kinapuro ti pulina.
[Ladawan iti panid 24]
No ti kabassitda ti pagibasaran, dagitoy ti kapigsaan kadagiti amin a kita ti kabalio
[Picture Credit Line iti panid 24]
© S Sailer/A Sailer/age fotostock